ह्याविट्याट पावरले माग्यो आईपीओको अनुमति
काठमाडाैं । सिंगटी हाईड्रो इनर्जी प्रमुख प्रवर्द्धक रहेको ह्याविट्याट पावर कम्पनीले आईपीओ निष्काशनको अनुमतिका लागि नेपाल धितोपत्र बोर्डमा आवेदन दिएको छ । कम्पनीले ११ करोड रुपैयाँ बराबरको ११ लाख कित्ता आईपीओ निष्काशनको माग गर्दै बोर्डमा निवेदन दिएको हो । आईपीओ निष्काशनको लागि कम्पनीले मुक्तिनाथ क्यापिटल बिक्री प्रबन्धक रुपमा चयन गरेको छ । कम्पनीले आफ्नो जारी पूँजी ५५ करोडको २० प्रतिशत अर्थात ११ लाख कित्ता साधारण शेयर सर्वसाधारणहरुमा जारी गर्ने छ । कम्पनीले जारी पूँजीको १० प्रतिशत अर्थात ५ लाख ५० हजार कित्ता साधारण शेयर आयोजना प्रभावित क्षेत्रका स्थानीय बासिन्दाहरुको लागि र बाँकी १० प्रतिशत अर्थात ५ लाख ५० हजार कित्ता साधारण शेयर सर्वसाधारणहरुलाई जारी गर्ने जनाएको छ । ह्याविट्याट पावर कम्पनीले पाँचथर जिल्लामा ९.९ मेवा क्षमताको हेवाखोला ए साना जल विद्युत आयोजनाको निर्माण गरिरहेको छ । कम्पनीका अनुसार आयोजनाको कार्य ७० प्रतिशत सम्पन्न भइसकेको र यहि आवको चैत्र मसान्त सम्ममा निर्माण सम्पन्न गर्ने लक्ष्य रहेको छ। कम्पनीका अनुसार आयोजनाको प्रति मे।वा। लागत रु १९ करोड मात्र रहेको छ ।
२० प्रतिशत लाभांश वितरण गर्ने हिमालयन डिष्टिलरीको घोषणा
काठमाडौं । हिमालयन डिष्टिलरी लमिटेडले लाभांश घोषणा गरेको छ । कम्पनीले गत आर्थिक वर्ष २०८०/०८१ को वितरणयोग्य मुनाफाबाट लाभांश घोषणा गरेको हो । कम्पनीले हाल कायम चुक्ता पूँजीको २० प्रतिशतका दरले लाभांश वितरण गर्ने घोषणा गरेको हो । सोमध्ये १५ प्रतिशत बोनस सेयर रहेको छ भने ५ प्रतिशत नगद लाभांश (कर प्रयोजनार्थ सहित) रहेको छ। मंसिर २३ गते बसेको कम्पनीको सञ्चालक समितिको बैठकले सो दरमा लाभांश वितरण गर्ने निर्णय गरेको हो ।आगामी वार्षिक साधारण सभाबाट पारित गरेपश्चात सो दरमा लाभांश वितरण गरिनेछ । साधारण सभा तथा लाभांश वितरण प्रयोजनार्थ कम्पनीले पुस १९ गते एक दिनका लागि बुकक्लोज गर्ने भएको छ । जसअनुसार पुस १८ गतेसम्म नेप्सेमा कारोबार भइ कायम सेयरधनीहरुले कम्पनीको साधारण सभामा सहभागिता जनाउन तथा कम्पनीले वितरण गर्ने लाभांश प्राप्त गर्न सक्नेछन् ।
एसियन कंक्रिटोले आइपीओ जारी गर्ने, बिक्री प्रबन्धकमा नबिल इन्भेस्टमेन्ट
काठमाडौं । एसियन कंक्रिटोले निकट भविष्यमा नियमनकारी निकायहरुबाट आवश्यक स्वीकृति प्राप्त गरी सर्वसाधारणका लागि आइपीओ जारी गर्ने भएको छ । कम्पनीले प्राथमिक सेयर निष्कासनका लागि बिक्री प्रबन्धकका रुपमा नबिल इन्भेस्टमेन्ट बैंकिङलाई नियुक्त गरेको छ । आइपीओ बिक्री प्रबन्धक नियुक्तिसम्बन्धी सम्झौतापत्रमा एसियन कंक्रिटोका अध्यक्ष तथा प्रबन्ध निर्देशक मनीष रुंगटा तथा नबिल इन्भेस्टमेन्ट बैंकिङका प्रमुख कार्यकारी अधिकृत मनीषनारायण जोशीले हस्ताक्षर गरेका छन् । आइपीओ ल्याउन लागेको कम्पनीका सञ्चालकहरु गौरव अग्रवाल, राजेश जाटिया, राजेशकुमार अग्रवाल र कम्पनीका सेल्स एन्ड मार्केटिङका उपाध्यक्ष श्यामल झाको रोहबरमा सम्झौतापत्रमा हस्ताक्षर भएको हो । एसियन कंक्रिटोले नेपालको निर्माण उद्योगमा उत्कृष्टता प्रमाणित गर्दै सबैभन्दा रुचाइएको नाम बन्न सफल भएको छ । उत्कृष्ट कच्चा मालको प्रयोगदेखि असाधारण जर्मन टेक्लोलोजीको साथ उत्पादित प्रत्येक ब्लकहरु चाहे निर्माणको कुरामा होस् या त डिजाइन र आकारको सन्दर्भमा होस् उच्च गुणस्तरको रहेका छन् । नेपालदेखि भारतमा समेत आफ्नो बलियो व्यापारिक सञ्जाल फैलाउन सफल कम्पनीको ल्यान्डस्केफिङ उत्पादनहरु जस्तै पेभर, ब्लक, इटृा र टाइलहरुको खोजीमा रहेकालाई एसियन कंक्रिटो सही रोजाइ हुन सक्ने कम्पनीले जनाएको छ ।
