बिहीबार नेपालभर ४८ सय ३१ काेराेना संक्रमित थपिए, ३५ जनाकाे मृत्यु
काठमाडाैं । नेपालमा बिहीबार ४ हजार ८३१ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयको अनुसार आज ४८३१ जनामा कोरोना संक्रमण पुष्टि भएको हो । यो सहित नेपालमा कोरोना संक्रमित हुनेको संख्या ३ लाख १७ हजार ५३० जना पुगेको छ भने सकृिय संक्रमितकाे संख्या ३४ हजार ११७ पुगेकाे छ । यस्तै आज ८८८ जना निको भएसँगैं हालसम्म २ लाख ८० हजार १६७ जना निको भएर घर गइसकेका छन । पछिल्लाे २४ घण्टामा नेपालमा काेराेना संक्रमणकाे कारण २३ जनाकाे मृत्यु भएकाे छ ।
बेनी अस्पतालका चिकित्सकले मोबाइलबाटै परामर्श दिने
बनी । बेनी अस्पतालले स्वास्थ्य मन्त्रालयको निर्णय र निर्देशनअनुसार बुधबारदेखि बहिरंग सेवा बन्द भएपछि ‘हेलो डक्टर’ सेवा सुरु गरेको छ । तीव्ररूपमा फैलिएको दोस्रो लहरको कोरोना भाइरस नियन्त्रण गर्न र थप बढ्न नदिनका लागि अस्पतालले सिकिस्तबाहेकका बिरामीलाई अस्पताल नआउन अनुरोध गर्दै मोबाइलबाटै चिकित्सकले परामर्श दिने सेवा शुरु गरेको हो । अस्पतालका नौ चिकित्सक, आकस्मिक, भर्ना कक्ष र व्यवस्थापन समितिका अध्यक्षको मोबाइलमा सम्पर्क गरेर बिरामी अथवा आफन्तले फोन गरेर चिकित्सकबाट परामर्श लिन पाउने व्यवस्था मिलाएको अस्पतालले जनाएको छ । अस्पतालले नियमित औषधि सेवा गर्ने बीमा गरेका सेवाग्राहीका लागि समेत अस्पतालको सेवा लिनका लागि समय तालिका बनाएर सार्वजनिक गरेको छ । बेनपाका वडा नं ७ र १ का बासिन्दाका लागि आइतबार, बेनपा–२, मालिका र मङ्गला गाउँपालिकालाई सोमबार, जलजला गाउँपालिका, बेनपा–४ र १० लाई मङ्गलबार, बेनपा–८ र ९ लाई बुधबार, बेनपा–४, ६ र धवलागिरि गाउँपालिकालाई बिहीबार तथा रगुगङ्गा, अन्नपूर्ण गाउँपालिका र बेनपा–५ लाई शुक्रबारको समय तालिका बनाइएको छ । अस्पतालमा भीडभाडका कारण कोरोना सङ्क्रमण फैलने जोखिम बढेकाले आकस्मिक र प्रसूतिबाहेकका सेवा बन्द गरेको छ । केही दिनयता म्याग्दीमा लक्षणसहितका कोरोना सङ्क्रमितको सङ्ख्या बढ्दो छ । बुधबार म्याग्दीका १० जनामा कोरोना सङ्क्रमण पुष्टि भएको प्रदेश स्वास्थ्य निर्देशनालयले जारी गरेको विज्ञप्तिमा उल्लेख छ ।
अक्सिजन उत्पादक भन्छन्ः अक्सिजनको अभाव छैन, अस्पताल र व्यक्तिले स्टक राख्दा समस्या भयो
काठमाडौं । जुन चिजको बढी हल्ला चल्छ, त्यो चिजको अभाव हुने, लुकाउने, काजोबजारी गर्ने, बढी खरिद गरेर अनावश्यक रुपमा भण्डारण गर्ने प्रवृत्ति नयाँ होइन । विगतमा पनि ग्यास, खाद्यान्न तथा अन्य आवश्यकीय वस्तुहरु साँच्चिकै अभाव भएर नभई कृत्रिम अभाव सिर्जना गर्ने र मानिसले चाहिएभन्दा बढी भण्डारण गर्ने गर्दा समस्या निम्तिएका उदाहरण प्रशस्त छन् । नयाँ भेरियन्टसहित दोस्रो लहर चलिरहेको कोरोनाकालको वर्तमान विषम परिस्थितिमा उक्त प्रवृत्ति दोहोरिने संकेत देखा परेको छ । त्यो संकट टार्नै विषयमा सरकारले गम्भीरतापूर्वक कदम चाल्नुपर्ने देखिएको छ । नेपाल अक्सिजन उत्पादक संघका अनुसार अहिले नेपालमा अक्सिजन पर्याप्त मात्रामा छ । माग कम भएकैले उद्योग पूर्ण क्षमतामा चलेकै छैन तर पनि हल्लैहल्लाका कारण अक्सिजन अभाव हुने आशङ्कामा अहिले मानिसले चाहिएभन्दा बढी भण्डारण गर्न थालेकाले अलिकति समस्या हुने हो की भन्ने देखिएको सङ्का अध्यक्ष गौरव शारदा बताउँछन् । उनले सिलिण्डर (भाँडो) भने सीमित रहेको स्वीकार गरे । ‘पर्याप्त सिलिण्डर हुने हो भने कुनै समस्या आउने थिएन, नेपालमा सिलिण्डर नबन्ने, यसअघि चालु रहेका सिलिण्डर सीमित छ, त्यही सिलिण्डर मानिसले घरमा राख्यो भने समस्या हुने नै भयो, त्यसैले सिलिण्डर खरिदका लागि सरकारलाई सुझाव दिएका छौँ’, उनले भने । नेपालमा साविकभन्दा निक्कै बढी अक्सिजन उत्पादन भइरहेको छ । गत वर्षको यो समयमा २० प्रतिशत मात्रै अक्सिजन उत्पादन भएको थियो । तर यसपटक भारतमा देखिएको अभावले नेपालमा खपत ह्वात्तै बढेको छ । तर त्यो प्रयोग हुनुभन्दा पनि स्टकमा गएको अनुमान संघको छ । अभाव हुने हल्ला सुनेका मानिसले मात्रै होइन, अस्पतालले समेत अक्सिजन सिलिण्डर स्टक राख्न लागेका छन् । उनले भने, ‘नेपालमा क्षमतानुसारको अक्सिजन उद्योग चलेकै छैन, त्यो सबै चल्यो भने दैनिक आठ हजार सिलिण्डर अक्सिजन उत्पादन गर्न सकिन्छ, त्यसले नेपालको पूरै माग धान्छ । भारतमा अभाव भएको कारणले नेपालमा पनि अभाव हुन्छ कि भनेर व्यक्तिले र केही अस्पतालले सिलिडर स्टक राख्न थाल्नु नै समस्या हो । अझ विभिन्न अस्पतालले चलाइरहेको प्लान्टको उत्पादन छुट्टै छ ।’ उनका अनुसार काठमाडौंमा अहिले दैनिक पाँचदेखि ६ हजार सिलिण्डर अक्सिजनको माग छ । माग पूरा गर्न अहिले कुनै समस्या छैन । ‘अलिकति नेपालगञ्ज क्षेत्र र तराईमा केही ठाउँमा माग बढेको छ, पूर्वी नेपालमा क्षमताको २० प्रतिशत पनि उत्पादन भएको छैन, त्यसैले ढुक्क हुनुस् अक्सिजनको अभाव हुँदैन’, अध्यक्ष शारदाले भने, ‘स्टक राख्ने विषयमा भने गम्भीर हुनै पर्छ, त्यसरी स्टक राख्न जरुरी नै छैन ।’ अक्सिजन उत्पादन गर्ने २४ उद्योग हाल नेपालमा अक्सिजन उत्पादन गर्ने २४ वटा उद्योग छन् । त्यसमध्ये आठ उद्योग काठमाडौंमा छन भन एउटा उद्योग चलेको छैन । स्वास्थ्य तथा जनसंख्या मन्त्रालयका अनुसार हाल मुलुकका ३० अस्पतालमा अक्सिजन प्लान्ट जडान भएको छ । ती अस्पतालले दैनिक दुई हजार ५४९ सिलिण्डर अक्सिजन भर्नसक्ने क्षमता राख्छ । केही अस्पतालमा लिक्विड अक्सिजन ट्याङ्कसमेत रहेको मन्त्रालयका सहप्रवक्ता डा समिरकुमार अधिकारी बताउँछन् । उनका अनुसार तीन अस्पतालमा करिब छ हजार सिलिण्डर भरिएका छन् । अक्सिजन विक्रेताबाट दैनिक आठ हजार सिलिण्डर भर्न सक्ने जानकारी आएको स्वास्थ्य मन्त्रालयले जनाएको छ । सीमित रहेकाले सिलिण्डर अभाव हुनसक्ने हुँदा सिलिण्डर ल्याउने विषयमा कूटनीतिक पहल जारी रहेको मन्त्रालयले जनाएको छ । अक्सिजन व्यवसायीले भने नेपालमा अक्सिजन अभाव नहुने तर सिलिण्डरको अभाव हुनसक्ने भन्दै त्यसतर्फ सरकारको ध्यानाकर्षण गराएका छन् । अध्यक्ष शारदाले सीसीएमसी र स्वास्थ्य मन्त्रालयसँगको छलफलमा नयाँ सिलिण्डर आयात गर्नेतर्फ सरकारलाई सुझाव दिएको जनाए । ‘तल्कालै भारतबाट सिलिण्डर ल्याउन सम्भव देखिँदैन, चीनबाट जीटुजीमार्फत सिलिण्डर ल्याउनुपर्छ । तब मात्रै समस्या हटेर जान्छ’, उनले भने ।
