विदेश जान एक महिनामै ४२ हजार ६९३ जनाले लिए श्रमस्वीकृति
काठमाडाैं । चालु आर्थिक वर्ष २०८३/८४ को पहिलो महिना अर्थात साउनमा वैदेशिक रोजगारीका लागि ४२ हजार ६९३ जनाले श्रम स्वीकृति (संस्थागत तथा व्यक्तिगत) लिएका छन् । नेपाल राष्ट्र बैंकले शुक्रबार सार्वजनिक गरेको साउनसम्मको देशको आर्थिक तथा वित्तीय स्थितिअनुसार संस्थागत तथा व्यक्तिगत गरी सो संख्याले वैदेशिक रोजगारीको लागि श्रम स्वीकृति लिएका हुन् । अघिल्लो आवको तुलनामा चालु आवको साउनमा श्रम स्वीकृति लिनेको संख्या घटेको छ । अघिल्लो वर्षको सोही अवधिमा यस्तो संख्या ४४ हजार ४४६ थियो । त्यस्तै एक महिनामा २७ हजार ७४८ जनाले पुनः श्रम स्वीकृति लिएका छन् । अघिल्लो आवको सोही अवधिमा यो संख्या २३ हजार ६४४ थियो ।
महँगीको दर बढेर ५.९६ प्रतिशत पुग्यो
काठमाडौं । चालु आर्थिक वर्ष २०८३/८४ को पहिलो महिना साउनमा नेपालको वार्षिक विन्दुगत उपभोक्ता मुद्रास्फीति ५.९६ प्रतिशत पुगेको छ । नेपाल राष्ट्र बैंकले सार्वजनिक गरेको साउन महिनाको आर्थिक तथा वित्तीय अवस्थासम्बन्धी तथ्याङ्कअनुसार गत वर्षको सोही महिनामा मुद्रास्फीति १.६८ प्रतिशत थियो । समीक्षा महिनामा खाद्य तथा पेय पदार्थ समूहको मुद्रास्फीति ६.७७ प्रतिशत रहेको छ । गैरखाद्य तथा सेवा समूहको मुद्रास्फीति ५.५२ प्रतिशत पुगेको छ । गत वर्षको सोही अवधिमा खाद्य तथा पेय पदार्थ समूहको मुद्रास्फीति २.२८ प्रतिशतले ऋणात्मक थियो भने गैरखाद्य तथा सेवा समूहको मुद्रास्फीति ३.९५ प्रतिशत थियो । खाद्य तथा पेय पदार्थ समूहअन्तर्गत घ्यू तथा तेलको मूल्य १५.६२ प्रतिशत, फलफूलको १५.३९ प्रतिशत, माछा तथा मासुको ८.६५ प्रतिशत, तरकारीको ६.९० प्रतिशत र मरमसलाको मूल्य ४.८० प्रतिशतले बढेको छ । गैरखाद्य तथा सेवा समूहअन्तर्गत यातायातको मूल्य १३.१७ प्रतिशत, मदिराजन्य पेय पदार्थको ७.२० प्रतिशत, कपडा तथा जुत्ताचप्पलको ५.५२ प्रतिशत र सुर्तीजन्य पदार्थको ४.९७ प्रतिशतले बढेको राष्ट्र बैंकले जनाएको छ । क्षेत्रगत रूपमा हेर्दा साउनमा ग्रामीण क्षेत्रको उपभोक्ता मूल्य सूचकाङ्क ६.१८ प्रतिशत र सहरी क्षेत्रको ५.८८ प्रतिशतले बढेको छ । प्रदेशगत रूपमा सबैभन्दा बढी मुद्रास्फीति मधेश प्रदेशमा ६.९४ प्रतिशत रहेको छ । सबैभन्दा कम सुदूरपश्चिम प्रदेशमा ४.६१ प्रतिशत रहेको छ । यस्तै, काठमाडौं उपत्यकामा ४.८१ प्रतिशत, तराईमा ६.६४ प्रतिशत, पहाडमा ५.९५ प्रतिशत र हिमाली क्षेत्रमा ५.१० प्रतिशत मुद्रास्फीति रहेको छ । यसैगरी, साउनमा वार्षिक विन्दुगत थोक मुद्रास्फीति ८.२७ प्रतिशत पुगेको छ। गत वर्षको सोही महिनामा थोक मुद्रास्फीति २.३७ प्रतिशत थियो । समीक्षा अवधिमा उपभोग्य वस्तुको थोक मुद्रास्फीति ०.०५ प्रतिशतले ऋणात्मक रहेको छ । मध्यवर्ती वस्तुको थोक मुद्रास्फीति १३.६२ प्रतिशत र पुँजीगत वस्तुको ६.४५ प्रतिशत रहेको छ । निर्माण सामग्रीको थोक मूल्य ४.८९ प्रतिशतले बढेको छ । नेपाल राष्ट्र बैंकका अनुसार २०८३ साउनमा नेपालको उपभोक्ता मुद्रास्फीति ५.९६ प्रतिशत रहेको छ भने सन् २०२६ अगस्टमा भारतको उपभोक्ता मुद्रास्फीति ४.८२ प्रतिशत रहेको छ ।
विदेशी विनिमय सञ्चिति ३९ खर्ब पुग्यो, २१.८ महिनाको आयात धान्ने
काठमाडौं । विदेशी विनिमय सञ्चिति ३९ खर्ब रुपैयाँ पुगेको छ । नेपाल राष्ट्र बैंकले सार्वजनिक गरेको तथ्याङ्क साउन मसान्तसम्ममा कुल विदेशी विनिमय सञ्चिति १.२ प्रतिशतले वृद्धि भएर ३९ खर्ब ४६ अर्ब २३ करोड रुपैयाँ पुगेको हो । राष्ट्र बैंकका अनुसार असार मसान्तमा ३८ खर्ब ९७ अर्ब ६७ करोड रुपैयाँ कुल विदेशी विनिमय सञ्चिति थियो । अमेरिकी डलरमा भने यस्तो सञ्चिति असार मसान्तको २५ अर्ब ३१ करोडबाट २.१ प्रतिशतले वृद्धि भई साउन मसान्तमा २५ अर्ब ८४ करोड डलर पुगेको छ । कुल विदेशी विनिमय सञ्चितिमध्ये राष्ट्र बैंकमा रहेको सञ्चिति पनि १.३ प्रतिशतले बढेको छ । असार मसान्तमा ३४ खर्ब ७३ अर्ब १९ करोड रुपैयाँ रहेको राष्ट्र बैंकको सञ्चिति साउन मसान्तमा बढेर ३५ खर्ब १७ अर्ब ९९ करोड रुपैयाँ पुगेको छ । त्यस्तै, बैंक तथा वित्तीय संस्था (नेपाल राष्ट्र बैंकबाहेक) सँग रहेको विदेशी विनिमय सञ्चिति ०.९ प्रतिशतले वृद्धि भएको छ । असार मसान्तमा ४ खर्ब २४ अर्ब ४८ करोड रुपैयाँ रहेको यस्तो सञ्चिति साउन मसान्तमा बढेर ४ खर्ब २८ अर्ब २२ करोड रुपैयाँ पुगेको राष्ट्र बैंकले जनाएको छ । २०८३ साउन मसान्तमा कुल विदेशी विनिमय सञ्चितिमा भारतीय मुद्राको हिस्सा २१.८ प्रतिशत रहेको छ । चालु आर्थिक वर्ष २०८३÷८४ को साउन महिनाको आयातलाई आधार मान्दा बैंकिङ क्षेत्रसँग रहेको विदेशी विनिमय सञ्चितिले २१.८ महिनाको वस्तु आयात धान्न पर्याप्त हुने देखिएको छ । त्यस्तै, विद्यमान सञ्चितिले १८.८ महिनाको वस्तु तथा सेवा आयात धान्न सक्ने नेपाल राष्ट्र बैंकले जनाएको छ । राष्ट्र बैंकका अनुसार साउन मसान्तमा विदेशी विनिमय सञ्चितिको कुल गार्हस्थ्य उत्पादन (जीडीपी), कुल आयात र विस्तृत मुद्राप्रदायसँगको अनुपात क्रमशः ५९.८ प्रतिशत, १५७ प्रतिशत र ४४.५ प्रतिशत रहेको छ । असार मसान्तमा यी अनुपात क्रमशः ५९.१ प्रतिशत, १६३.४ प्रतिशत र ४३.८ प्रतिशत रहेका थिए। यसअनुसार एक महिनाको अवधिमा विदेशी विनिमय सञ्चितिको जीडीपीसँगको अनुपात ०.७ प्रतिशत बिन्दुले र विस्तृत मुद्राप्रदायसँगको अनुपात ०.७ प्रतिशत बिन्दुले बढेको छ भने कुल आयातसँगको अनुपात ६.४ प्रतिशत बिन्दुले घटेको छ ।
दशैं–तिहार अफरमा सीएफमोटो २५० डुअल ईएफआईमा २० हजार छुट
काठमाडौं । नेपालका लागि सीएफमोटो मोटरसाइकलको आधिकारिक वितरक ऋषि ट्रेड सेन्टरले दशैं र तिहारलाई लक्षित गर्दै विशेष चाडपर्व अफर सार्वजनिक गरेको छ । कम्पनीले ‘दशैं भाइब, तिहार लाइट्स र सीएफमोटो राइड्स’ नामक अभियानअन्तर्गत सीएफमोटो २५० डुअल ईएफआई मोटरसाइकलमा नगद छुटदेखि फाइनान्स र वारेन्टीसम्मका सुविधा उपलब्ध गराउने जनाएको छ । कम्पनीका अनुसार नगदमा सीएफमोटो २५० डुअल ईएफआई खरिद गर्ने ग्राहकले २० हजार रुपैयाँ फ्ल्याट छुट पाउनेछन् । साथै, ४० प्रतिशत डाउन पेमेन्ट बाटै मोटरसाइकल खरिद गर्न सकिने फाइनान्स सुविधा पनि उपलब्ध गराइएको छ । यस अफरअन्तर्गत जुनसुकै ब्रान्डको पुरानो दुईपांग्रे सवारी साट्ने ग्राहकलाई अतिरिक्त मूल्याङ्कन (एक्स्ट्रा भ्यालुएसन) को सुविधा पनि दिइने कम्पनीले जनाएको छ । मोटरसाइकल खरिद गर्ने ग्राहकलाई प्रिमियम ह्यान्डगार्ड र प्रमाणित फुल–फेस हेल्मेट निःशुल्क उपलब्ध गराइनेछ । कम्पनीले सीएफमोटो २५० डुअल ईएफआईमा ५ वर्षको इन्जिन वारेन्टी समेत दिने घोषणा गरेको छ । साथै, देशभर रहेका आधिकारिक सेवा केन्द्रमा सक्कली स्पेयर पार्ट्स र प्राविधिक सेवा उपलब्ध गराउने प्रतिबद्धता पनि जनाएको छ । ऋषि ट्रेड सेन्टरका अनुसार यो चाडपर्व अफर नेपालभर रहेका सबै आधिकारिक सीएफमोटो शोरुम र डिलर नेटवर्कमा सीमित अवधिका लागि लागू हुनेछ ।
विद्यार्थी भएर जापान पुगेका थापा जापानकै लागि राजदूतमा सिफारिस
काठमाडौं । सरकारले जापानका लागि नेपाली राजदूतमा जिज्ञानकुमार थापालाई सिफारिस गरेको छ । शुक्रबार (आज) बसेको मन्त्रिपरिषद्को बैठकले उनीसहित १३ जनालाई विभिन्न राष्ट्रका लागि राजदूतमा सिफारिस गरेको हो । थापा ललितपुरको धापाखेलमा जन्मिएका हुन् । उनी सन् २००० मा उच्च शिक्षा अध्ययनका लागि जापान पुगेका थिए । थापाले अन्तर्राष्ट्रिय सहयोगमा स्नातक तथा अन्तर्राष्ट्रिय सम्बन्ध र कानूनमा स्नातकोत्तर अध्ययन गरेका छन् । जापानमा लामो समय अध्ययन, अध्यापन, अनुसन्धान तथा पेशागत क्षेत्रमा सक्रिय छन् । थापाले जापानी प्रशासन, स्थानीय निकाय, शैक्षिक संस्था तथा जापानस्थित नेपाली समुदायसँग काम गरेको अनुभव हासिल गरेका छन् । नेपालका राष्ट्रपति, परराष्ट्रमन्त्री तथा अन्य उच्च सरकारी अधिकारीहरूको जापान भ्रमणका क्रममा समेत थापाले विभिन्न अवसरमा समन्वयकारी भूमिका निर्वाह गर्दै आएका थिए । नेपाल–जापानबीच भएका उच्चस्तरीय भेटवार्ता तथा औपचारिक कार्यक्रममा समेत थापा प्रत्यक्ष रूपमा संलग्न हुँदै आएका थिए । जापानी सञ्चारमाध्यममा समेत परिचित थापाले करिब एक दशक टोक्यो एमएक्स टीभीमा नेपाल–जापान सम्बन्ध तथा अन्तर्राष्ट्रिय विषयमा समाचार विश्लेषकका रूपमा काम गरेका थिए । उनले जापानको सार्वजनिक प्रसारक एनएचके लगायतका सञ्चारमाध्यममा नेपाल, जापान तथा अन्तर्राष्ट्रिय विषयमा आफ्ना धारणा प्रस्तुत गर्दै आएका छन् । थापासँग नेपाल र जापानका स्थानीय सरकार, विश्वविद्यालय, पर्यटन तथा सांस्कृतिक संस्थाबीच सम्बन्ध विस्तारमा समेत काम गरेको अनुभव रहेको उनीनिकटस्थ बताउँछन् । थापासँग जापानी समाजमा लामो समय काम गरेको अनुभव छ । उनी सरकारी तथा स्थानीय तहसम्मको सम्बन्ध, जापानी भाषामाथिको पकड र नेपाल–जापान सम्बन्धमा प्रत्यक्ष संलग्नताका कारण उनी जापानको राजनीतिक, प्रशासनिक तथा सामाजिक परिवेशसँग परिचित रहेका छन् । उनको नियुक्तिसँगै नेपाल–जापानबीचको आर्थिक, कूटनीतिक, पर्यटन, सांस्कृतिक तथा जनस्तरीय सम्बन्धलाई थप विस्तार गर्ने अवसरका रूपमा हेरिएको छ । जापानमा रहेका नेपाली नागरिकको हित तथा दुई देशबीचको सहकार्यलाई थप प्रभावकारी बनाउने अपेक्षा गरिएको छ ।
नोभा क्राउन प्रिमियम आइसक्रिमको ब्रान्ड एम्बेसडरमा शिल्पा मास्के
काठमाडौं । फिसटेल डेरी प्रालि अन्तर्गतको प्रिमियम आइसक्रिम ब्रान्ड नोभा क्राउन प्रिमियम आइसक्रिमले अभिनेत्री शिल्पा मास्केलाई ब्रान्ड एम्बेसडर नियुक्त गरेको छ । काठमाडौंमा आयोजित एक कार्यक्रमबीच अभिनेत्री मास्के र नोभा क्राउनका ब्रान्ड सुपरभाइजर प्रायुष निरौलाबीच ब्रान्ड एम्बेसडरसम्बन्धी सम्झौता भएको हो । सम्झौतासँगै मास्के नोभा क्राउनका विभिन्न ब्रान्ड प्रवद्र्धन तथा सञ्चार अभियानमा सहभागी हुने भएकी छन् । सम्झौतापछि ब्रान्ड सुपरभाइजर निरौलाले मास्केको प्रतिभा, व्यक्तित्व र युवा पुस्तामाझको लोकप्रियता नोभा क्राउनको ब्रान्ड पहिचानसँग मेल खाने बताए । उनका अनुसार मास्केसँगको सहकार्यले उपभोक्तासँग ब्रान्डको सम्बन्ध थप विस्तार गर्न सहयोग पुग्ने अपेक्षा गरिएको छ । अभिनेत्री मास्केले पनि नोभा क्राउनसँग जोडिन पाउँदा खुसी व्यक्त गर्दै प्रिमियम आइसक्रिम अनुभव प्रदान गर्ने उद्देश्य बोकेको ब्रान्डसँग सहकार्य गर्न पाउँदा उत्साहित रहेको बताइन् । कम्पनीका अनुसार ब्रान्ड एम्बेसडरका रूपमा मास्के नोभा क्राउनका विज्ञापन, डिजिटल सामग्री, सामाजिक सञ्जाल अभियान, प्रवद्र्धनात्मक कार्यक्रम तथा विभिन्न मार्केटिङ गतिविधिमा सहभागी हुनेछिन् । मास्केसँगको सहकार्यले विशेषगरी युवा तथा आधुनिक जीवनशैली अपनाउने उपभोक्तामाझ नोभा क्राउनको पहुँच विस्तार गर्न र प्रिमियम आइसक्रिम ब्रान्डका रूपमा आफ्नो पहिचान थप बलियो बनाउन सहयोग पुग्ने कम्पनीको विश्वास छ । फिसटेल डेरी प्रालि अन्तर्गतको नोभा क्राउन प्रिमियम आइसक्रिमले गुणस्तरीय उत्पादन तथा उत्कृष्ट आइसक्रिम अनुभव प्रदान गर्ने उद्देश्यका साथ नेपाली बजारमा आफ्ना उत्पादन तथा ब्रान्ड गतिविधि विस्तार गर्दै आएको कम्पनीले जनाएको छ ।
जेनजी सांसदहरूसँग प्रधानमन्त्री शाहले के भने ?
काठमाडौं । प्रधानमन्त्री बालेन्द्र साहले जेन–जी उमेर समूहका सांसदहरूलाई आफ्नै पुस्ताका लागि स्वदेशमै रोजगारी र अवसर सिर्जना गर्न सक्रिय भूमिका खेल्न आग्रह गरेका छन् । सिंहदरबारस्थित प्रधानमन्त्री तथा मन्त्रिपरिषद्को कार्यालयमा शुक्रबार जेनजी उमेर समूहका सांसदहरूसँग भएको अन्तरक्रियामा प्रधानमन्त्री साहले युवापुस्ताका मुद्दालाई संसदमा प्राथमिकताका साथ उठाउन आग्रह गरेका हुन् । राष्ट्रिय स्वतन्त्र पार्टीका सांसद मनिष खनालकाअनुसार प्रधानमन्त्रीले जेन–जी सांसदहरूले डिजिटलाइजेसन, ई–गभर्नेन्स, आर्टिफिसियल इन्टेलिजेन्स, खेलकुद, कला तथा विदेशमा रहेका युवाका विषयलाई समेत संसदको एजेण्डा बनाउनुपर्ने धारणा राखेका थिए । प्रधानमन्त्रीले संसदका गतिविधि आफूले नियमित रूपमा नियालिरहेको र जेन–जी सांसदहरूबाट नयाँ सोच र फरक एजेण्डाको अपेक्षा रहेको बताएका थिए । अन्तरक्रियामा प्रधानमन्त्रीले राजनीतिलाई मात्र पेशा नबनाई सांसदहरूले आफ्नो छुट्टै व्यवसाय वा पेशागत आधारसमेत निर्माण गर्नुपर्ने धारणा राखेको रास्वपाका सांसद केपी खनालले बताए । उनका अनुसार प्रधानमन्त्रीले जेनजी पुस्ताका सांसदसहित युवाहरूलाई उद्यमशीलतामा जोडिन र ‘साइड बिजनेस’ मार्फत आत्मनिर्भर बन्न प्रोत्साहित गरेका थिए । स्टार्टअप तथा सूचना प्रविधि क्षेत्रबारे पनि छलफल भएको थियो । नेपालमा आईटी व्यवसाय दर्ता र सञ्चालनका लागि सहज वातावरण निर्माण गर्नुपर्ने विषय सांसदहरूले उठाएका थिए । प्रधानमन्त्रीले नेपालमै व्यवसाय दर्ता गर्ने वातावरण बनाउन सरकार तयार रहेको र समस्या आए सरकारसँग सुझाव तथा समन्वय गर्न आग्रह गरेको सांसद खनालले बताए । प्रधानमन्त्रीले जेन–जी पुस्ताका युवालाई स्वदेशमै रोजगारी सिर्जना गर्ने वातावरण बनाउन सरकार प्रतिबद्ध रहेको बताएका थिए । त्यसका लागि बैंकिङ कर्जा प्रक्रियालाई सहज बनाउने तथा नयाँ व्यवसायलाई प्रोत्साहन गर्ने विषयमा समेत छलफल भएको थियो । छलफलमा जेनजी आन्दोलनका क्रममा पक्राउ परेका, घाइते तथा मृत्यु भएका व्यक्तिका विषय पनि उठाइएको सांसदहरूले बताएका छन् । सांसद खनालका अनुसार आन्दोलनका क्रममा संलग्न भएको आरोपमा पक्राउ परेकाहरूको मुद्दाबारे गृह मन्त्रालयअन्तर्गत अध्ययन समिति गठन भएको छ । समितिले मुद्दाहरूको वर्गीकरण गरी विद्यमान कानूनअनुसार फिर्ता लिन सकिने मुद्दाको प्रक्रिया अघि बढाउने विषयमा काम गरिरहेको उनले बताए । तर गम्भीर प्रकृतिका अपराध, हातहतियार, ज्यानसम्बन्धी कसुर तथा लुटपाटलगायतका घटनामा संलग्न देखिएकाहरूको हकमा कानूनी प्रक्रिया कायम रहने सांसद खनालको भनाइ छ । उनका अनुसार समितिले छिट्टै प्रतिवेदन बुझाउने र त्यसका आधारमा सरकारले प्रक्रिया अघि बढाउने बताइएको छ । सांसद खनालले प्रधानमन्त्रीले जेनजी उमेर समूहका सांसदहरूबाट आफ्नै पुस्ताका मुद्दालाई फरक ढंगले संसदमा प्रस्तुत गर्ने अपेक्षा राखेको बताए । उनका अनुसार अहिले विद्यालय तथा कक्षा १२ मा अध्ययनरत विद्यार्थी, विदेशमा रहेका युवा, खेलकुद र कला क्षेत्रमा रहेका युवालगायतका समूहका समस्या र अपेक्षालाई संसदको मूल एजेण्डा बनाउनुपर्ने प्रधानमन्त्री साहको भनाइ छ । अन्तरक्रियामा सहभागी सांसदहरूलाई प्रधानमन्त्रीले स्थलगत अध्ययन तथा अनुसन्धान गर्न, सूचना–प्रविधिको उच्चतम प्रयोग गर्न, समस्या समाधानमुखी दृष्टिकोण अपनाउन र पुराना तथा अव्यावहारिक सोच त्याग्न सुझाव दिएको प्रधानमन्त्रीको सचिवालयले जनाएको छ । सांसदहरूलाई रचनात्मक आलोचना गर्न आग्रह प्रधानमन्त्रीले सरकारका कामकारबाहीबारे सांसदहरूले रचनात्मक आलोचना तथा सुझाव दिनुपर्ने बताएको सांसदहरूले जानकारी दिएका छन् । समस्या देखिए त्यसको समाधानका लागि सरकारसँग समन्वय गर्न पनि प्रधानमन्त्रीले आग्रह गरेका थिए । रास्वपाका सांसद बब्लु गुप्ताका अनुसार प्रधानमन्त्रीले संसदमा जेन–जी सांसदहरूको गतिविधि र नयाँ विचारमा आफूले चासो राख्ने गरेको बताएका थिए । गुप्ताले सरकार सञ्चालनका क्रममा कमजोरी भए सच्याउँदै अघि बढ्ने प्रतिवद्धता आफूहरूले पनि व्यक्त गरेको बताए । अन्तरक्रियामा प्रधानमन्त्रीले जेन–जी पुस्ताका सांसदहरूलाई अभिभावकीय मार्गदर्शनका रूपमा आफ्नै पुस्ताका लागि स्वदेशमै अवसर सिर्जना गर्ने र आत्मनिर्भर बन्ने अभियानमा लाग्न आग्रह गरेका थिए । सहभागी सांसदहरूले पनि त्यसलाई सकारात्मक रूपमा लिँदै युवा पुस्ताका मुद्दा संसदमा प्रभावकारी रूपमा उठाउने प्रतिवद्धता व्यक्त गरेका थिए ।
डा. अर्जुन सापकोटाविरुद्ध २ करोड बढीको भ्रष्टाचार मुद्दा
काठमाडौं । अख्तियार दुरुपयोग अनुसन्धान आयोगले स्वास्थ्य सेवा विभागका तत्कालीन वरिष्ठ स्वास्थ्य प्रशासक (दशौं तह) डा. अर्जुन प्रसाद सापकोटाविरुद्ध २ करोड ३ लाख ९४ हजार रुपैयाँभन्दा बढीको गैरकानुनी सम्पत्ति आर्जन गरेको आरोपमा विशेष अदालतमा भ्रष्टाचार मुद्दा दायर गरेको छ । अख्तियारले शुक्रबार विशेष अदालत काठमाडौंमा दायर गरेको आरोपपत्रअनुसार डा. सापकोटाले सरकारी सेवामा रहँदा आफ्नो आयभन्दा धेरै सम्पत्ति जोडेको र त्यसको वैधानिक स्रोत पुष्टि गर्न नसकेको निष्कर्ष निकालेको छ । आयोगले डा. सापकोटाको २०५२ माघ २८ देखि २०८० जेठ ३० गतेसम्मको आय–व्यय विश्लेषण गरेको थियो । अनुसन्धानमा उनको वैधानिक आय ३ करोड ३५ लाख ७७ हजार २६० रुपैयाँ रहेको देखिएको छ । तर सोही अवधिमा जग्गा खरिद, घर निर्माण, सवारीसाधन, सेयर, बीमा, विदेश भ्रमण, अध्ययन खर्च, सुन खरिद, बैंक मौज्दातलगायत शीर्षकमा ५ करोड ३९ लाख ७१ हजार ८७५ रुपैयाँ खर्च तथा लगानी गरेको अख्तियारको दाबी छ । यसरी आयभन्दा २ करोड ३ लाख ९४ हजार ६१५ रुपैयाँ बढी खर्च र लगानी भएको तथा त्यसको स्रोत पुष्टि गर्न नसकेको भन्दै अख्तियारले उक्त रकम बराबरको गैरकानुनी सम्पत्ति आर्जन गरेको आरोप लगाएको हो । अख्तियारले डा. सापकोटामाथि बिगो बराबर जरिवाना, कैद र गैरकानुनी सम्पत्ति जफतको माग गरेको छ । साथै, सम्पत्ति विवरणमा वास्तविक सम्पत्ति लुकाएर झुट्टा विवरण पेश गरेको आरोपमा थप सजायको मागसमेत गरिएको छ । आयोगले डा. सापकोटाकी श्रीमती निरजा पण्डितलाई पनि प्रतिवादी बनाएको छ । अख्तियारका अनुसार श्रीमतीको नाममा रहेको स्रोत नखुलेको सम्पत्ति जफत गर्ने प्रयोजनका लागि उनलाई प्रतिवादी कायम गरिएको हो ।
