भिभोको क्रिककार्निवलमा केटीएम आरसी २०० जित्ने मौका
काठमाडौं । स्मार्टफोन ब्रान्ड र नेपाल प्रिमियर लिग (एनपीएल) को आधिकारिक स्मार्टफोन साझेदार भिभोले ‘क्रिककार्निवल’ को सुरुवात गरेको छ । नेपालमा आफ्नो सफल सात वर्ष पूरा गरेको खुसीमा भीभोले आफ्नो ७ औं सेल्स कार्निवलको सुरु गरेको हो । यो कार्यक्रम ४ डिसेम्बरदेखि सुरु भइसकेको छ भने ३१ डिसेम्बरसम्म सञ्चालन हुने भीभो नेपालले जनाएको छ । क्रिककार्निवलमा भिभो स्मार्टफोन खरिद गर्दा आकर्षक पुरस्कार र विशेष सुविधा प्राप्त गर्न सकिने जनाइएको छ । क्रिककार्निवलअन्तर्गत भिभोले ग्राहकहरूलाई केटीएम आरसी २०० बम्पर पुरस्कार जित्ने मौका दिएको छ । अन्य पुरस्कारहरूमा भिभो स्मार्टफोन, टीडब्ल्यूएस इयरबड्स, ६ महिना सम्मको विस्तारित वारेन्टी र थप सरप्राइजहरू समावेश छन् । भिभोले नेपालमा आफ्नो ७ वर्ष पुरा भएको उपलक्ष्यमा आफ्नो पुरानो ग्राहकहरूको सम्मानमा ७ भाग्यशाली भिभो भी ७ प्रयोगकर्ताहरूका लागि विशेष एक्सचेन्ज अफर ल्याएको छ । यी ग्राहकहरूले आफ्नो भिभो भी ७, भिभो भी ४० सँग केवल ३१ हजारमा एक्सचेन्ज गर्न पाउनेछन् ।
झापामा ९३७ मेट्रिक टन कोदो उत्पादन
भद्रपुर । जिल्लामा यसवर्ष नौ सय ३७ दशमलव ६७ मेट्रिक टन कोदो उत्पादन भएको छ । कृषि ज्ञान केन्द्र झापाका अनुसार सात सय २६ दशमलव ८८ हेक्टर क्षेत्रफलमा उक्त परिणाममा कोदो उत्पादन भएको हो । यस वर्ष प्रति हेक्टर एक दशमलव २९ मेट्रिक टनका दरले कोदो उत्पादन भएको ज्ञान केन्द्रका सूचना अधिकारी चेतराज भण्डारीले बताए । उनका अनुसार अधिंकाश स्थानीय तहले कोदो उत्पादनका लागि अनुदान दिएका छन् । भद्रपुर नगरपालिकाले परम्परागत बाली प्रवर्द्धन कार्यक्रम अन्तर्गत यसवर्ष कोदो खेतीका लागि दुई सय ५१ कठ्ठा क्षेत्रफलमा प्रति कठ्ठा एक हजार रुपैयाँका दरले प्रोत्साहनस्वरुप किसानलाई अनुदान दिएको नगरपालिकाको कृषि शाखाका अधिकृत सुमन विमलीले बताए । कोदो जस्ता बालीले हाम्रो परम्परा, संस्कार र पहिचान संरक्षण हुनाका साथै किसानको आयआर्जनमा सहयोग पुग्ने भद्रपुर नगरपालिकाका नगर प्रमुख गणेश पोखरेलले बताए । रैथाने बाली प्रवर्द्धन कार्यक्रमले कृषिमा विविधता ल्याउने मात्र नभइ स्थानीय समुदायको जीवनस्तर सुधार गर्न योगदान पु¥याउने उनको भनाइ छ । नगरपालिकाले आगामी वर्षमा कोदो खेतीको क्षेत्रफल विस्तार गर्दै प्रविधि हस्तान्तरण र उत्पादन वृद्धि गर्ने लक्ष्य लिएको छ ।
हरेक वर्ष १३ अर्ब डलरको तेल किन्ने तयारी गर्दै मुकेश अम्बानी
काठमाडौं । भारतीय कम्पनी रिलायन्स इन्डस्ट्रीजका अध्यक्ष मुकेश अम्बानीले हरेक वर्ष १३ अर्ब डलरको तेल किन्ने तयारी गरेका छन् । यसका लागि उनले रुसको रोजनेफ्टसँग १० वर्षका लागि वार्षिक १२-१३ अर्ब डलरको कच्चा तेल आयात गर्ने सम्झौता गरेको भारतीय सञ्चारमाध्यमहरूले जनाएका छन् । सम्झौताअनुसार रुसको सार्वजनिक क्षेत्रको पेट्रोलियम कम्पनी रोजनेफ्टले रिलायन्सलाई दैनिक ५ लाख ब्यारेल (वार्षिक २ करोड ५० लाख टन) कच्चा तेल आपूर्ति गर्नेछ । अम्बानीले वार्षिक रूपमा १२ देखि १३ बिलियन डलरको तेल किन्नेछन् । यसबारे सोध्दा रिलायन्सका प्रवक्ताले रसिया भारतका लागि कच्चा तेलको सबैभन्दा ठूलो आपूर्तिकर्ता भएको बताए । उनले भने, ‘हामी कच्चा तेल खरिदका लागि रसियालगायत धेरै अन्तर्राष्ट्रिय आपूर्तिकर्ताहरूसँग संधै संलग्न छौं । बजारको अवस्थाअनुसार अर्थतन्त्रका आधारमा कार्गोको संख्या फरक पर्नेछ ।’ रुसबाट तेल आयात रुसले फेब्रुअरी २०२२ मा युक्रेनमा आक्रमण गरेपछि भारत रुसी कच्चा तेलको दोस्रो ठूलो खरिदकर्ता बनेको छ । युद्धअघि कुल आयातित तेलमा रुसको हिस्सा एक प्रतिशतभन्दा कम थियो, जुन अहिले बढेर ४० प्रतिशत पुगेको छ । यो वृद्धिको मुख्य कारण रुस र युरोपेली देशहरूले त्यहाँबाट खरिद नगर्न लगाएको मूल्य सीमा हो । जसका कारण रुसी कच्चा तेल अन्य अन्तर्राष्ट्रिय बजारबाट आपूर्तिको तुलनामा सस्तोमा उपलब्ध छ । विश्वको तेस्रो ठूलो तेल उपभोक्ता र आयातकर्ता भारतले अक्टोबरमा रुसबाट दुई अर्ब युरोको कच्चा तेल किनेको थियो । यो अघिल्लो महिनाको २.४ बिलियन युरो भन्दा कम हो । चीनले अक्टोबरमा रुसको कच्चा तेल निर्यातको ४७ प्रतिशत किनेको थियो । त्यसपछि भारत (३७ प्रतिशत), युरोपियन युनियन (६ प्रतिशत) र टर्किए (६ प्रतिशत) रहेको छ । रिलायन्सको गुजरातको जामनगरमा दुईवटा रिफाइनरीहरू छन् जसले कच्चा तेललाई प्रशोधन गरेर पेट्रोल र डिजेलमा परिणत गर्छन् । रिलायन्सले युरोप र अन्य देशहरूमा इन्धन बिक्री गर्दछ । कम्पनीले यसअघि रोजनेफ्टबाट प्रति महिना कम्तीमा ३० लाख ब्यारेल तेल किन्न एक वर्षको सम्झौता गरेको थियो । जामनगरमा रहेको रिलायन्सको दुई रिफाइनरीमध्ये एउटा मात्र निर्यातका लागि हो । यो ५ लाख ८० हजार ब्यारेल प्रतिदिन क्षमताको युनिटले उत्पादन हुने सबै इन्धन निर्यात गर्छ । अन्य ६ लाख ६० हजार ब्यारेल दैनिक एकाइले स्वदेशी आवश्यकता पूरा गर्ने हो ।
मोटोपना अस्ट्रेलियाको स्वास्थ्य जोखिमको पहिलो कारण
काठमाडौं । अस्ट्रेलियामा पहिलो पटक अस्ट्रेलियामा बढी तौल हुनु रोगको प्रमुख जोखिम कारक बनेको छ । सरकारी तथ्यांककाअनुसार अस्ट्रेलियन इन्स्टिच्युट अफ हेल्थ एण्ड वेलफेयरले बिहीबार आफ्नो वार्षिक अस्ट्रेलियन बर्डन अफ डिजिज स्टडी २०२४ प्रकाशित गरेको छ । मोटोपनासहित अधिक तौल हुनुलाई प्रमुख परिमार्जनयोग्य जोखिम कारकको रूपमा पहिचान गरेको थियो । धुम्रपान प्रयोग पहिले प्रमुख जोखिम कारक थियो । तर यसबाट हुने जोखिम २००३ यता ४१ प्रतिशतले घटेको छ । अध्ययनले २०२४ मा अस्ट्रेलियाको कुल रोग बोझको ८.३ प्रतिशत अधिक तौलको जोखिम कारकलाई श्रेय दिएको छ । ७.६ प्रतिशतको लागि धुम्रपानको प्रयोग र ४.८ प्रतिशतका लागि सबै आहार जोखिमहरू जिम्मेवार छन् । २०२२ मा अस्ट्रेलियाका ६६ प्रतिशत वयस्क र २६ प्रतिशत बालबालिका र किशोरकिशोरीहरू अधिक तौल वा मोटो भएको पत्ता लगाएको थियो ।
स्वास्थ्य मन्त्रालयको निर्देशन- निजी अस्पतालका नर्स र स्वास्थ्यकर्मीलाई पनि सरकारीसरह सेवासुविधा दिनू
काठमाडौं । स्वास्थ्य तथा जनसंख्या मन्त्रालयले स्वास्थ्य संस्थाहरूमा कार्यरत नर्सिङ एवं स्वास्थ्यकर्मीहरूलाई न्यूनतम पारिश्रमिक सरकारीसरह दिन निर्देशन दिएको छ । स्वास्थ्य मन्त्रालयले देशभरका प्रतिष्ठान सरकारी अस्पताल, मेडिकल कलेज र सामुदायिक निजी अस्पताललाई पत्र लेख्दै न्यूनतम पारिश्रमिक सरकारीसरह दिन निर्देशन दिएको हो । यो मन्त्रालयको सचिवस्तरीय निर्णय हो । त्यस्तै, तोकिएको समयभन्दा बढी काम गर्नेहरूका लागि अतिरिक्त भत्ताको व्यवस्था गर्नुपर्ने पनि उल्लेख गरिएको छ । स्वास्थ्यकर्मीलाई अनुभवको पत्र प्रदान गर्नुपर्ने पनि जनाइएको छ । नर्सिङलगायतका अन्य स्वास्थ्यकर्मीहरूको पारिश्रमिक बैकिङ प्रणालीबाट मात्र उपलब्ध गराउन पनि पत्रमा भनिएको छ ।
मुस्ताङको ९ हजार फिट उचाइमा भिजी मोटर्सको फास्ट चार्जिङ स्टेसन
काठमाडौं । भिजी मोटर्सले ८,९९९ फिट उचाइमा कमर्सियल विद्युतीय सवारीसाधनको फास्ट चार्जिङ स्टेसन सुरु गरेको छ । मुस्ताङ जिल्लाको घरपझोङ गाउँपालिका- ४ जोमसोममा रहेको उक्त चार्जिङ स्टेसनको उद्घाटन मुस्ताङ गाउँपालिकाका अध्यक्ष मोहनसिंह लालचनले गरे । उक्त चार्जिङ स्टेसनमा ३२ किलोवाट क्षमताको एउटा डीसी फास्ट चार्जर राखिएको छ । यसले ४५ मिनेटमै विद्युतीय सवारीसाधनको ब्याट्री फुल चार्ज गर्न सक्छ । यसबाट विद्युतीय सवारीसाधन लिएर मुस्ताङ पुग्ने यात्रु तथा मुस्ताङका विद्युतीय सवारी प्रयोगकर्तालाई सुविधा हुने अपेक्षा गरिएको छ । भिजी मोटर्स प्रालि नेपालका लागि एसआरएम र जोलङ ब्रान्डका विद्युतीय सवारीसाधनको आधिकारिक वितरक हो । भिजी मोटर्सले एसआरएम र जोलङ ब्रान्डका विद्युतीय सवारीसाधन आयात गरी बिक्री वितरण गरिरहेको छ । एसआरएम एकपटकको फुल चार्जमा ३०० किलोमिटर कुद्ने भ्यान हो र यो ११ सिटर, २ सिटर र ५ सिटरमा उपलब्ध छ । एसआरएमका भ्यानहरू स्कुल, कलेज, कर्पोरेट हाउस, होटल, ट्राभल कम्पनी, अस्पताल, सरकारी निकाय, कमर्सियल ट्रान्सपोर्टर, नगरपालिका लगायतका लागि निकै उपयोगी छन् । एसआरएम भ्यानमा शक्तिशाली लिथियम ब्याट्री प्रयोग गरिएको छ । कम्पनीले जोलङको ईए फोर, ईए फाइभ र ईए सिक्स नेपाली बजारमा भित्र्याएको छ । जोलङ ईए फाइभ १७ सिटको मिनी भ्यान हो । ६०.१ किलोवाट आवरको ब्याट्री रहेको यो भ्यानले एकपटकको चार्जमा ३०० किलोमिटर माइलेज दिन्छ । ईए सिक्स २० सिटको भ्यान हो । यसमा ८६.१ किलोवाट आवरको ब्याट्री छ, जुन एकपटकको चार्जमा ४०० किलोमिटर कुद्छ ।
निर्वाचनको क्रममा जनाएको प्रतिबद्धता नै पहिलो प्राथमिकतामा छ : नवनिर्वाचित अध्यक्ष ढकाल
काठमाडौं । स्टक ब्रोकर्स एसोसिएसन अफ नेपाल (एसबान)को नवनिर्वाचित अध्यक्ष सागर ढकालले निर्वाचनको क्रममा जनाएका प्रतिबद्धतालाई नै पहिलो प्राथामिकतमा रहेर काम गर्ने बताएका छन् । बिहीबार काठमाडौंमा आयोजित स्टक ब्रोकर्स एसोसिएसन अफ नेपालको सपथ तथा पदभर ग्रहण कार्यक्रममा उनले उक्त कुरा बताएका हुन् । ‘निर्वाचनको बेला गर्छु भनेर प्रतिबद्धता गरेका विषयलाई कार्यान्वयन गर्दै लैजाने छौं,’ उनले भने, ‘दुई वर्षको अवधिमा हामीले धेरै काम गर्नुपर्ने जिम्मेवारी थपिएको छ । त्यसमा नियामक निकाय धितोपत्र बोर्डलगायत तपाईंहरूको सबैको साथ र सहयोगको अपेक्षा लिएको छु ।’ निर्वाचनको क्रममा आफूले गर्न सक्ने कामलाई मात्रै गर्छु भनेर प्रतिबद्धता जनाएको र त्यसलाई नै सकारात्मक रूपमा लिएर अघि बढ्ने उनको भनाइ थियो । त्यस्तै, नवनिर्वाचित एसबानका अध्यक्ष ढकालले २३ वर्षपछि ऐन संशोधन भएकाले त्यसमा पुँजीबजारका धेरै विषय समेट्नुपर्ने हुँदा त्यसमा नियामक निकायले सहयोग गर्न अनुरोध गरे । एसोसिएसनको ३०औं साधारणसभाले आगामी दुई वर्षका लागि ९ सदस्यीय नयाँ कार्यसमिति चयन गरेको थियो । जसको अध्यक्षमा सागर ढकालले बाजी मारेका थिए । प्रतिद्वन्दी राजकुमार तिमिल्सिनालाई पराजित गर्दै ढकाल अध्यक्षमा निर्वाचित भएका हुन् । निर्वाचनमा ढकालले ८८ मतमध्ये ४५ मत ल्याएर जीत हात पारेका हुन् । उनका प्रतिद्वन्द्वी तिमिल्सिनाले ४३ मत प्राप्त गरेका थिए । बिहीबार सर्वसम्मत रूपमा एसोसिएसनको अध्यक्ष चुन्ने प्रयास भए पनि पनि तिमिल्सिना र ढकालबीच सहमति नजुटेपछि शुक्रबार निर्वाचन भएको थियो । कार्यसमिति उपाध्यक्षमा नितेश अग्रवाल, महासचिव भक्तिराम घिमिरे, कोषाध्यक्ष मदन पौडेल र सचिवमा विनय पौडेल निर्वाचित भएका छन् । सदस्यमा विशालकुमार अग्रवाल, प्रियन्सु अग्रवाल, जयन्त श्रीवास्तव र जेलिना कँडेल छन् । यसअघि ब्रोकर कम्पनीका दुई एसोसिएसन स्टक ब्रोकर एसोसिएसन अफ नेपाल र धितोपत्र ब्रोकर एसोसिएसन नेपाल रहँदै आएकोमा २८ कात्तिकदेखि मर्ज भएर एउटै बनेको थियो ।
एक रात बस्न लाखसम्म तिर्नुपर्ने होटल, यस्तो छ १० होटलको रुमरेट
काठमाडौं । एक दशकअघि नेपालमा ठूला होटल (तारे होटल) हरूको संख्या न्यून थियो । अहिले होटलको संख्या पनि बढेको छ । नेपालमा १० वर्षअघिदेखि सञ्चालनमा रहेका पाँचतारे होटलहरूमा द एभरेष्ट होटल, द सोल्टी होटल, याक एण्ड यति, हायातलगायत हुन् । होटलको संख्या वृद्धि भएसँगै आजको दिनसम्म आइपुग्दा तारे होटलको एक रातको रेट दोब्बरले वृद्धि भएको छ । नेपाल होटल संघका महासचिव साजन शाक्य नेपालमा चेन होटलहरू सञ्चालनमा आउनु र नयाँ होटलको संख्या बढ्न थालेसँगै होटलको रेट ह्वातै बढेको बताउँछन् । शाक्यका अनुसार एक दशकअघि पाँचतारे होटलहरुको रुम रेट सामान्यतया १२० डलरदेखि १५० डलरसम्म उपलब्ध हुन्थ्यो । हाल पाँचतारे होटलहरूले कोठाको मूल्य एक रातकै दुई सय डलरदेखि पाँच सय डलरसम्म तोकिसकेका छन् । जुन नेपाली रुपैयाँ २७ हजारदेखि ६७ हजार रुपैयाँ हो । औसतमा हाल पाँचतारे होटलहरूको रुम रेट नै १५० डलर हो । अझ अहिले धेरैजसो तारे होटलहरूमा लक्जरियस रुम आइसकेका हुनाले त्यसको रेट एक लाखभन्दा माथिसम्म पर्ने संघका महासचिव शाक्यले सुनाए । विश्वभरी महामारीको रूपमा फैलिएको कोभिड- १९ को समयमा भने पाँच तारे होटलहरूको रुम रेट ह्वातै घटेको संघका महासचिव शाक्यले बताए । उनका अनुसार उक्त समयमा पाँच तारे होटलको कोठाको मूल्य दैनिक ५० डलरको हाराहारीमा झरेको थियो । कोभिडका कारण पर्यटक आगमन ठप्प हुनु र धेरैजसो होटलहरू बन्द भएका कारण कोठाको मूल्य पनि घट्न पुगेको उनले सुनाए । महासचिव शाक्यका अनुसार होटलहरूले अहिले वार्षिक ३० लाख पर्यटकलाई ८ देखि १० दिनसम्मको लागि राख्न सक्ने क्षमता भइसकेकेको छ । द सोल्टी काठमाडौंमा रहेको सुविधा सम्पन्न होटल द सोल्टीमा एक रातको एउटा कोठाको मूल्य न्यूनतम १८ हजार ३२६ रुपैयाँदेखि ७१ हजार रुपैयाँसम्म रहेको छ । यसले स्वीट्स रुमको ६३ हजार १२२ रुपैयाँ चार्ज लिँदै आएको छ । चन्द्रगिरी हिल्स अन्तर्राष्ट्रियस्तरको सुविधाले सम्पन्न चन्द्रगिरी हिल्समा एक रातको एउटा रुमको रेट २५ हजार ३९१ रुपैयाँदेखि माथि रहेको छ । उक्त होटलमा डिलक्स रुमको रेट २३ हजार रुपैयाँदेखि २५ हजार रुपैयाँसम्म रहेको छ । माउन्टेन भ्यू हेर्न मिल्ने डबल बेड भएको रुमको २५ हजारदेखि २६ हजार रुपैयाँसम्म र किङ बेड रुमको २९ हजार रुपैयाँसम्म तोकेको छ । द एभरेष्ट होटल काठमाडौंको नयाँ बानेश्वरमा अवस्थित द एभरेष्ट होटलमा एक रातको एउटा रुमको रेट १७ हजार ३७५ रुपैयाँदेखि माथि रहेको छ । उक्त होटलमा डिलक्स डबल रुमको २३ हजार रुपैयाँदेखि २५ हजार रुपैयाँसम्म तोकेको छ । त्यस्तै, होटलले माउन्टेन भ्यूसहितको डबल बेडको २५ देखि २६ हजारसम्म र किङ रुमको २६ देखि २९ हजारसम्म मूल्य तोकेको छ । हिल्टन काठमाडौं काठमाडौंमा रहेको चेन होटल हिल्टनमा एक रातको कोठाको मूल्य न्यूनतम २३ हजार रुपैयाँदेखि माथि छ । होटलले प्रिमियम टुइन रुमको मूल्य २५ हजारदेखि ४२ हजारसम्म तोकेको छ । त्यस्तै, एक्सक्युटिभ किङ रुमको न्यूनतम ३१ हजार रुपैयाँदेखि ४८ हजारसम्म, एक्सक्युटिभ टुइन रुम ३१ हजार रुपैयाँदेखि ४४ हजार, प्रिमियम किङ रुमको मूल्य ३६ हजार रुपैयाँदेखि ५३ हजार र किङ स्वीटको मूल्य ५० हजारदेखि ६७ हजारसम्म तोकेको छ । हायात प्लेस काठमाडौं धेरैलाई हायात होटलमा बस्न सकिँदैन, त्यहाँको रुम रेट महँगो लाग्न सक्छ । तर हायात प्लेस होटलमा एउटा कोठाको मूल्य न्यूनतम १६ हजार रहेको छ । त्यस्तै, एउटा रुममा दुईटा बेड भएको कोठाको मूल्य पनि १६ हजार रुपैयाँदेखि १८ हजार रुपैयाँसम्म रहेको छ । हायातले दुईवटा बेडसहित बौद्धनाथ स्तुप हेर्न मिल्ने कोठाको मूल्य १८ हजारदेखि २० हजार रुपैयाँसम्म निर्धारण गरेको छ । हायातमा क्लबसहितको रुम पनि रहेको छ । जसको एक रातको मूल्य २२ हजार रुपैयाँदेखि २५ हजारसम्म तोकेको छ । हायातमा २ लाख रुपैयाँसम्मको कोठाको रेट रहेको छ । द मल्ल होटल द मल्ल होटलमा एउटा कोठाको मूल्य न्यूनतम १४ हजार ९८५ रुपैयाँ रहेको छ । त्यहाँ डिलक्स रुमको १७ हजार ७१० रुपैयाँ (सिंगल बेड) र डबल बेडका लागि १९ हजार रुपैयाँ रेट तोकिएको छ । त्यस्तै, जुनियर स्वीट रुमको २० हजार १३५ रुपैयाँदेखि २१ हजार ७९७ रुपैयाँसम्म छ । मल्ल होटलमा डिलक्स रुमको ४० हजार ८७० रुपैयाँदेखि ४३ हजार रुपैयाँ तोकिएको छ । अलप्ट, काठमाडौं ठमेलमा रहेको अलप्ट होटलमा एउटा रुम न्यूनतम १४ हजार ८४९ रुपैयाँमा उपलब्ध हुन्छ । त्यहाँ क्लब, लञ्जसहितको सिंगल बेडको रेट २० हजारदेखि २१ हजारसम्म तोकिएको छ । अन्य कोठाहरूको मूल्य पनि अलप्टले त्यहीअनुसारको रेट तोकेको छ। अकामा होटल, काठमाडौं धुम्बाराहीमा रहेको अकामा होटलमा एउटा कोठाको रेट २४ हजार हजारदेखि माथि छ । अकामामा सुपर किङ र टुइन रुमको २७ हजार रुपैयाँ, डिलक्स रुम २९ हजार ९७१ रुपैयाँ रहेको छ । यसैगरी, स्वीट रुमको ४० हजार ८७० रुपैयाँदेखि ५४ हजार ४९३ रुपैयाँ तोकिएको छ । अकामामा एक रातको ६८ हजार रुपैयाँको कोठासमेत रहेको छ । याक एण्ड यति नेपालमा पाँच तारे होटलमध्ये एक याक एण्ड यतिमा एक रातको एउटा कोठाको मूल्य न्यूनतम २० हजार रुपैयाँ रहेको छ । यहाँ १ लाख ५१ हजार रुपैयाँसम्मको कोठा पाइन्छ । उक्त होटलमा डिलक्स रुम २० हजारदेखि २५ हजारसम्मको रहेको होटलले जनाएको छ । क्लबसहितको कोठाको रेट ३० हजार रुपैयाँदेखि ३४ हजार, स्वीट रुमको ६८ हजारदेखि डेढ लाखसम्मको रेट तोकिएको छ । होटलहरूको पछिल्लो अवस्था र सम्भावना नेपाल पर्यटन विभागका अनुसार पछिल्लो समय होटलहरूको संख्या ११२ पुगिसकेको छ । जसमध्ये २६ वटा पाँचतारे होटल सञ्चालनमा आइसकेका छन् । यसमा पनि तीनवटा पाँचतारे (डिलक्स) रहेका छन् । त्यस्तै, ३९ चारतारे, ४० तीनतारे, ५२ दुईतारे र ४७ वटा एकतारे होटलको संख्या पुगेको छ । नेपालको अर्थतन्त्रमा महत्त्वपूर्ण योगदान पुर्याउने क्षेत्रमध्ये होटल क्षेत्र पनि एक हो । नेपालमा धेरै मात्रामा पर्यटक भित्र्याउन सकियो भने र सरकारले त्यहीअनुसार होटल क्षेत्रमा साथ दिएको अवस्थामा होटल व्यवसायमा राम्रो सम्भावना भएको होटल संघका महासचिव शाक्यको भनाइ छ । होटल व्यवसायको चुनौती शाक्यका अनुसार पछिल्लो समय होटल व्यवसायले खासै राम्रो गर्न नसकेपनि लगानी गरिसकेको हुनाले त्यसलाई जसरी पनि उठाउनुपर्ने ठूलो चुनौती छ । ‘अहिलेको अवस्थामा होटलहरूले त्यति राम्रो गरेका पनि छैनन्, खासै घाटामा पनि छैनन् । व्यवसाय ४० प्रतिशतमात्रै छ । जबकि होटलहरूको खर्च नै ४० प्रतिशत छ,’ महासचिव शाक्यले भने । होटल निर्माणमा ठूलो लगानी लागेको हुँदा व्यवसायीहरूलाई ठूलो चुनौती छ । नेपालमा पर्यटनको वृद्धि बढाउन सकेसँगै होटल व्यवसायी पनि फस्टाउँदै जाने सम्भावना देखिन्छ । होटलहरूले पनि विगतका तुलनामा पछिल्लो समय अन्तर्राष्ट्रिय स्तरको सेवासुविधाहरू बढाउँदै लगेका छन् । होटलमा त्यहीअनुसारको नयाँनयाँ इक्युपमेन्टको प्रयोग हुन थालेको छ । पर्यटन बोर्डका प्रवक्ता कालीप्रसाद भुजेल पछिल्लो तथ्यांकमा विदेशी पर्यटकको संख्या उल्लेखनीय रूपमा वृद्धि भएका हुनाले यसले होटल व्यवसायीलाई ठूलो राहत पुग्ने बताउँछन् । साथै पछिल्लो समय आन्तारिक पर्यटकको संख्या पनि बढ्दो भएकाले व्यवसायीहरूले निराशा नै हुनुपर्ने अवस्था नभएको पनि उनले बताए । उनका अनुसार यो वर्ष पनि तीनवटा नयाँ पाँचतारे होटल थपिनु र बाँकी चारवटा पाइपलाइनमा हुनु भनेको होटल व्यवसायमा सम्भावना नै रहेको भन्ने बुझिन्छ ।
