प्रभु महालक्ष्मी लाइफ एनसीएचएलमा आबद्ध, सबै भुक्तानी डिजिटलबाटै हुने
काठमाडौं । प्रभु महालक्ष्मी लाइफ इन्स्योरेन्सको भुक्तानी सम्बन्धी कारोबार नेपाल क्लियरिङ्ग हाउस (एनसीएचएल) बाट गर्न सकिने भएको छ । प्रभु महालक्ष्मी लाइफ इन्स्योरेन्सका सबै भुक्तानी एनसीएचएलको भुक्तानी प्रणाली प्रयोग गरी डिजिटल माध्यमबाटै गर्न सकिने भएको हो । प्रभु महालक्ष्मीको भुक्तानी सम्बन्धी कारोबार गर्ने दुई संस्थाबीच सम्झौता भएको छ । सम्झौतापत्रमा प्रभु महालक्ष्मी लाइफका प्रमुख कार्यकारी अधिकृत सन्तोस प्रसाईं र एनसीएचएलका प्रमुख कार्यकारी अधिकृत नीलेश मान सिंह प्रधानले हस्ताक्षर गरेका हुन् । यससँगै प्रभु महालक्ष्मीको आन्तरिक प्रणालीलाई एनसीएचएलको नेशनल पेमेन्ट इन्टरफेससँग जोडी विभिन्न भुक्तानी उपकरणहरु प्रयोग गर्न सक्नेछन । प्रभु महालक्ष्मी लाइफले एनसीएचएल आईपीएस र आरपीएस प्रणालीहरुमार्फत् प्रिमियम भुक्तानी संकलन, एजेन्ट कमिशन, तलब, भेण्डर भुक्तानी, सरकारी राजस्व, सामाजिक सुरक्षा कोष, नागरिक लगानी कोषका भुक्तानी लगायत सेवा उपलब्ध हुने छन् । साथै प्रभु महालक्ष्मी लाइफ इन्स्योरेन्सले एनपीआई प्रयोग गरी आफ्ना बीमाकर्ताहरूलाई ऋण भुक्तानी गर्न थालिसकेको छ । भविष्यमा अन्य भुक्तानीहरु पनि क्रमिक रुपमा लागू हुने कम्पनीले जनाएको छ ।
सबैभन्दा बढी डिजिटल कारोबार गर्ने बैंक बन्यो ज्योति विकास, पायो एक्सलेन्स इन डिजिटल ट्रान्जेक्सन अवार्ड
काठमाडौं । ज्योति विकास बैंक एक्सलेन्स इन डिजिटल ट्रान्जेक्सन अवार्डबाट सम्मानित भएको छ । उत्कृष्ट डिजिटल सेवाका साथै सबैभन्दा बढी डिजिटल कारोबार गरेर विद्युतीय भुक्तानीलाई प्रोत्साहन गरेको भन्दै नेपाल क्लियरिङ हाउस (एनसीएचएल)ले एक्सलेन्स बैंकलाई इन डिजिटल ट्रान्जेक्सन अवार्डबाट सम्मान गरेको हो । एनसीएचएलको १६औँ वार्षिकोत्सवको अवसरमा नेपाल राष्ट्र बैंकका गभर्नर महाप्रसाद अधिकारीले बैंकका प्रमुख कार्यकारी अधिकृत (सीईओ)कपिल ढकाललाई उक्त अवार्ड प्रदान गरेका हुन् । प्रविधिमैत्री र ग्राहक केन्द्रीत सेवालाई प्राथमिकतामा राख्दै डिजिटल ट्रान्सफर्मेशन र नवीनतम प्रविधि मार्फत डिजिटल बैंकिङ्गमा भूमिका निर्वाह गर्दै सबल र सुदृढ डिजिटल बैंकिङ निर्माणलाई निरन्तरता दिंदै आएको बैंकले जनाएको छ । बैंकले ग्राहकहरूलाई सुविधाजनक र सुरक्षित पहुँच प्रदान गर्ने अनलाइन र मोबाइल बैंकिङ्ग प्लेटफर्महरूलाई सुव्यवस्थित गर्दै विभिन्न आधुनिक डिजिटल बैंकिङ्ग सेवा र सुविधाहरू उपलब्ध गराउँदै आएको बैंकको भनाइ छ । बैंकले विकास बैंकहरूमा पहिलोपटक भ्यावइस अडियो बक्स क्यूआर सेवा सुचारु गरी क्यूआर मर्चेन्टहरूको सहजता सुनिश्चित गरेको छ । यस्तै, डिजिटल बैंकिङ्ग र नगद रहित कारोबार प्रवद्र्धन गर्दै क्रस–बोर्डर भुक्तानी सेवा पनि सञ्चालन गरेको छ । मोबाइल बैंकिङ्ग एपमार्फत मुद्दती खाता खोल्न सकिने सुविधा, ज्योति स्मार्ट एप मार्फत एटीएम बाट पैसा झिक्न सकिने कार्डलेस क्यास विथड्रल सेवा, चेक बिना नै काउन्टरमा भएको क्यूआर कोड स्क्यान गरी रकम झिक्न सकिने स्क्यान एण्ड वीथड्र सेवा, अनलाइनबाटै खाता खोल्न र सुचारु गर्न भिडियो केवाईसी सुविधा लगायत थुप्रै आधुनिक बैंकिङ्ग सेवाहरू बैंकले उपलब्ध गराउँदै आएको छ । साथै, देशभरिका व्यवसायीलाई निःशुल्क क्यूआर कोड सेवा प्रदान गर्दै बैंकले डिजिटल कारोबारलाई थप प्रोत्साहित गर्दै डिजिटल बैंकिङ्गको विकासमा महत्वपूर्ण योगदान दिइरहेको छ । अत्याधुनिक डिजिटल अभ्यासहरूलाई उच्च प्राथमिकता दिंदै बैंकसँगको कारोबारलाई थप सबल र प्रभावकारी बनाउन बैंक प्रतिवद्ध छ । डिजिटल बैंकिङ्गको प्रयोग बढेसँगै बैंकले सोहि प्रक्रियामा आवश्यक पर्ने पासवर्ड, पिन, ओटीपी कोड र अन्य गोप्य विवरण सुरक्षित राखी कारोबार गर्न र वित्तीय ठगी विरुद्ध सचेत हुन जोड दिएको छ ।
४ दिनमै बिक्री भयो गरिमा समृद्धि योजनाका इकाई
काठमाडौं । गरिमा म्युचुअल फण्ड ४ दिनमै बिक्री भएको छ । गरिमा क्यापिटलको गरिमा म्युचूअल फण्ड अन्तर्गत सञ्चालित गरिमा समृद्धि योजनाका इकाई ४ दिनमा नै बिक्री भएको जनाएको छ । कोष प्रवर्द्धक गरिमा विकास बैंक र योजना व्यवस्थापक गरिमा क्यापिटल रहेको उक्त फण्ड गरिमा म्युचूअल फण्ड अन्तर्गतको पहिलो बन्दमुखी योजना हो । क्यापिटलको पुस ७ गतेदेखि आज पुस ११ गतेसम्म बिक्री खुला गरेको थियो । क्यापिटलले प्रतिइकाई १० रुपैयाँ अंकित मूल्य दरका १ अर्ब रुपैयाँको १० करोड इकाई बिक्री गरेको हो । जसमध्ये १४ प्रतिशत अर्थात् १ करोड ४० लाख इकाई कोष प्रवद्र्धक गरिमा विकास बैंक, एक प्रतिशत अर्थात् १० लाख इकाई योजना व्यवस्थापक गरिमा क्यापिटल र बाँकी ८ करोड ५० लाख इकाई सर्वसाधरणका लागि छुट्याएको छ । १० वर्ष अवधि रहेको उक्त योजनामा रितपूर्वक मागभन्दा बढी रकमको लागि आवेदन परेकाले निष्काशन बन्द गरिएको क्यापिटलले जनाएको छ ।
देशबन्धु बस्नेतले भित्र्याए होटल ‘मर्क्योर’, सुकेधारामा ३ अर्ब लगानीमा सञ्चालनमा आउँदै
काठमाडौं । पाँचतारे होटल ‘द मेट्रोपोलिटन होटल’ सुकेधारामा सञ्चालनमा आउँदैछ । होटल व्यवसायमा विश्वकै अग्रणी मानिने एक्कोर समूहले होटल निर्माण गरेको हो । विश्वविख्यात चेन होटल ब्राण्ड ‘मक्र्योर’लाई देशबन्धु बस्नेत (अजित)ले नेपाल भित्र्याएका हुन् । होटल २०२५ जनवरी दोस्रो सातादेखि सञ्चालनमा आउन लागेको छ । ५ रोपनी क्षेत्रफलमा फैलिएको होटल ११ तले छ । होटलमा १०४ वटा विलासी कोठा छन् । होटलले सुकेधारा क्षेत्रलाई पर्यटनको केन्द्रमा परिणत गर्दै रोजगारी सिर्जना गर्ने र भौतिक पूर्वाधार सुधार्ने अपेक्षा गरिएको छ । होटलले १८० देखि २२० प्रत्यक्ष र अप्रत्यक्ष रोजगारी सिर्जना गरेको जनाइएको छ । होटल उद्घाटन नहुँदै होटलको आडैमा रहेको खाली जग्गालाई सजाई मनमोहन पार्क निर्माण भइसकेको छ । होटलमा हालसम्म ३ अर्ब बढी लगानी भइसकेको बताइएको छ । होटलको व्यवस्थापन ‘मर्क्योर’ले सम्हालेको छ । मक्र्योर ब्राण्डले एसिया, युरोप, अफ्रिका र मध्यपूर्वका ५ हजार ५ सय बढी होटलको व्यवस्थापन गरिरहेको छ । यसैगरी, १० हजारभन्दा बढी खाना तथा पेयस्थलहरू पनि सञ्चालन गर्दै आएको छ । एकोरमा लक्जरीदेखि आर्थिक वर्गसम्मका ब्राण्डहरूको समावेशी पोर्टफोलियो रहेको छ । एकोर केवल आवासीय सेवामै सीमित छैन, यो जीवनशैली अनुभव प्रदान गर्ने र यात्राको भविष्य निर्माणमा अग्रणी संस्थासमेत हो । देशबन्धु नेपाल उद्योग वाणिज्य महासंघका कार्यकारी सदस्य हुन् । उनी वायु तथा यातायात समितिका अध्यक्ष र नेपालमा जाम्बियाको मानार्थ कन्सुलर पनि हुन् । साथै उनी एबी होल्डिङका अध्यक्षसमेत हुन् । एबी होल्डिङ एक प्रख्यात कन्ग्लोमेरेट हो, जुन परियोजना विकास र इक्विटी लगानीमा संलग्न छ ।
हकप्रद सेयर निष्कासन गर्दै मन्दाकिनी हाइड्रो, बिक्री प्रबन्धकमा ग्लोबल आइएमई क्यापिटल
काठमाडौं । मन्दाकिनी हाइड्रोपावरले हकप्रद सेयर निष्कासन तथा बिक्री खुला गर्ने भएको छ । कम्पनीले १ः१.२५ अनुपातमा हकप्रद सेयर निष्कासन गर्न लागेको हो । हकप्रद सेयर जारी गरी कम्पनीले माथिल्लो सार्दिखोला जलविद्युत आयोजना (२.९ मेगावाट) निर्माण गर्ने तथा अन्य जलविद्युत परियोजनामा लगानी गर्ने योजना बनाएको छ । कम्पनीको हकप्रद सेयर निष्कासन तथा बिक्री प्रबन्धकमा ग्लोबल आइएमई क्यापिटल नियुक्त गरेको छ । काठमाण्डौंमा आयोजित एक कार्यक्रममा मन्दाकिनी हाइड्रोपावरको तर्फबाट सञ्चालक समितिका अध्यक्ष शरदकुमार दाहाल र ग्लोबल आइएमई क्यापिटलको तर्फबाट प्रमुख कार्यकारी अधिकृत (सीईओ) मन्दिप लुईंटेलले सम्झौतापत्रमा हस्ताक्षर गरे । यस कम्पनीद्वारा प्रवर्द्धित सार्दीखोला जलविद्युत आयोजना कास्की जिल्लाको माछापुच्छ्रे गाउँपालिकामा रहेको र आयोजनाबाट ४ मेगावाट बराबरको विद्युतशक्ति २०७४ साल मंसीरदेखि व्यवसायिक रुपमा उत्पादन भई आयोजना पूर्ण रूपमा सञ्चालनमा आएको छ । कम्पनीको अधिकृत पुँजी २ अर्ब रुपैयाँ तथा जारी पूँजी ६४ करोड ६७ लाख रुपैयाँ छ। मंसिर ७ गते सम्पन्न भएको एघारौं वार्षिक साधारण सभाले हकप्रद सेयर निष्कासन गर्ने प्रस्ताव पारित गरिसकेको छ ।
मार्केटिङमा कर्मचारी बढाउँदा निर्जीवन बीमाको व्यापार १७.१७ अर्ब, आक्रामक बन्दै ओरिएन्टल र नेपाल इन्स्योरेन्स
काठमाडाैं । निर्जीवन बीमा कम्पनीहरूले चालु आर्थिक वर्ष २०८१/०८२ को ५ महिनामा १७ अर्ब बढीको व्यापार गरेका छन् । चालु आवको मंसिर मसान्तसम्म १४ निर्जीवन बीमा कम्पनीहरूले १७ अर्ब १७ करोड ७७ लाख रुपैयाँ बढीको व्यापार गरेकाे नियामक निकाय नेपाल बीमा प्राधिकरणले जनाएको छ । प्राधिकरणका अनुसार कम्पनीहरूले गत आवको सोही अवधिको तुलनामा ९.२६ प्रतिशतले व्यापार वृद्धि गरेका छन् । गत आवको मंसिर मसान्तसम्म निर्जीवन बीमाको व्यापार १५ अर्ब ७२ करोड १० लाख रुपैयाँ थियो । यो अवधिमा सबैभन्दा धेरै व्यापार सगरमाथा लुम्बिनी इन्स्योरेन्सले गरेको छ । सगरमाथा लुम्बिनीले २ अर्ब १९ करोड ९८ लाख रुपैयाँ बढीको व्यापार गर्दा सिद्धार्थ प्रिमियर इन्स्योरेन्सले १ अर्ब ७६ करोड ८५ लाख रुपैयाँको व्यापार गरेको छ । यसैगरी, शिखर इन्स्योरेन्सले १ अर्ब ७४ करोड २५ लाख रुपैयाँको व्यपार गर्दा आईजीआई प्रुडेन्सियल इन्स्योरेन्सले १ अर्ब ४५ करोड ५२ लाख, नेको इन्स्योरेन्सले १ अर्ब ४० करोड ३८ लाख, हिमालयन एभरेष्ट इन्स्योरेन्सले १ अर्ब ४० करोड ९ लाख र एनएलजी इन्स्योरेन्सले १ अर्ब १३ करोड ६ लाख रुपैयाँ बढीको व्यापार गरेको छ । ओरिएन्टल र नेपाल इन्स्योरेन्सको व्यापार आक्रामक वृद्धि पछिल्लो ५ महिनामा गत वर्षको सोही अवधिको तुलनामा ओरिएन्टल इन्स्योरेन्स र नेपाल इन्स्योरेन्सको व्यापार आक्रामक वृद्धि देखिएको छ । ओरिएन्टलको व्यापार करिब ५५ प्रतिशतले वृद्धि हुँदा नेपाल इन्स्योरेन्सको व्यापार ५२.५६ प्रतिशतले वृद्धि भएको प्राधिकरणको तथ्यांकले देखाउँछ । ओरिएन्टलले गत आवको मसिंर मसान्तसम्म ७२ करोड ७१ लाख रुपैयाँको व्यापार गर्दा चालु आवको सोही अवधिमा १ अर्ब १२ करोड ६९ लाख रुपैयाँको व्यापार गर्न सफल भएको छ । यसैगरी, नेपालले गत आवको मंसिर मसान्तसम्म ६१ करोड ९१ लाख रुपैयाँको व्यापार गरेको थियो । चालु आवको सोही अवधिमा कम्पनीले ९४ करोड ४६ लाख रुपैयाँको व्यापार गर्न सफल भएको छ । नेपाल इन्स्योरेन्स कम्पनीले मार्केटिङ गतिविधि बढाएका कारण व्यवसाय आक्रामक तरिकाले वृद्धि भएको जनाएको छ । विगतमा कम्पनीको केही शाखाहरूमा मार्केटिङका कर्मचारी थिएनन् । पछिल्लो समय उक्त शाखामा कर्मचारीहरू थप गरेर मार्केट चलायमान गराउँदा व्यवसाय वृद्धि हुन पुगेको कम्पनीले उल्लेख गरेको छ । यस्तै, कम्पनीले गत वर्षहरूकाे तुलनामा मोटर पोर्टफोलियोको व्यापार, कृषि बीमाको व्यापार, विविध पोर्टफोलियोको व्यापार वृद्धि भएको जनाएको छ । यस्तै, कृषि बीमाको लागि कृषि शाखाको पनि विस्तार गरिएको कम्पनीले जनाएको छ । यस्तै, एनएलजी इन्स्योरेन्सले ११.२३ प्रतिशत, शिखर इन्स्योरेन्सले १०.४५ प्रतिशत, सगरमाथा लुम्बिनीले १० प्रतिशत, राष्ट्रिय बीमा कम्पनी र सिद्धार्थ प्रिमियर इन्स्योरेन्सले क्रमशः ७.१९ र ७.०६ प्रतिशतले व्यपार वृद्धि गरेका छन् ।
एनसेलविरुद्ध दायर गरेको रिट खारेज, सर्वोच्चको सात बुँदे निर्देशनात्मक आदेश
काठमाडौं । एनसेलविरुद्ध परेको रिट खारेज भएको छ । एनसेलको ८० प्रतिशत सेयर हिस्सा ओगट्ने कम्पनीको खरिदबिक्री रोक्नुपर्ने माग गर्दै सांसद अमरेशकुमार सिंहले दायर गरेको रिट निवेदन सर्वोच्च अदालतले खारेज गरेको हो । न्यायाधीशहरू सपना प्रधान मल्ल र टेकप्रसाद ढुंगानाको इजलासले रिट निवेदन खारेज गर्दै सात बुँदे निर्देशनात्मक आदेश दिएको छ । मलेसियाको आजिआटा कम्पनीले रेनोल्ड होल्डिङको सबै सेयर बेलायतमा स्थापना भएको स्पेक्ट्रलाईट युके लिमिटेडलाई बेच्ने निर्णय गरेको थियो । सेयर खरिदबिक्रीको निर्णय सर्वाजनिक भएपछि सर्लाही–४ का स्वतन्त्र सांसद अमेरेश कुमार सिंहले रोकिनुपर्ने माग गर्दै रिट निवेदन दर्ता गरेका थिए । पुँजीगत लाभकर छल्ने उद्देश्यले वास्तविकभन्दा कम मूल्यमा सेयर विक्री गर्न खोजिएको भनी उनले रिट निवेदन दर्ता गरेका हुन् । आजिआटाले टेलिकम क्षेत्रका व्यवसायी सतीशलाल आचार्यलाई ५५ मिलियन अमेरिकी डलर (करिब ६ अर्ब ६५ करोड रुपैयाँ)मा सेयर बिक्रीको घोषणा गरेको थियो ।
बीमा प्राधिकरणको अध्यक्ष नियुक्त गर्न सिफारिस समिति गठन
काठमाडाैं । सरकारले नेपाल बीमा प्राधिकरणकाे अध्यक्ष नियुक्त गर्नका सिफारिस समिति गठन भएको छ । बुधबार बसेको मन्त्रिपरिषदको बैठकले प्राधिकरणकाे अध्यक्ष नियुक्त गर्नका लागि राष्ट्रिय योजना आयोगका उपाध्यक्ष डा. शिवराज अधिकारी संयोजकत्वमा समिति गठन गठन गरेको हो । समितिमा अर्थ मन्त्रालयका सचिव र ज्योतिचन्द्र ओझा रहने सरकारका प्रवक्ता एवं सञ्चार तथा सूचना प्रविधि मन्त्री पृथ्वीसुब्बा गुरुङले जानकारी दिए । गत मसिंर २४ गते अख्तियार दुरुपयोग अनुसन्धान आयोगले प्राधिकरणका अध्यक्ष सिलवालविरुद्ध भ्रष्टाचार मुद्दा दायर गरेको थियाे । अख्तियारले सिलवाल विरुद्ध विशेष अदालतमा मुद्धा दायर गरेसँगै उनी निलम्बनमा परेका थिए । साथै प्राधिकरणको अध्यक्ष पद रिक्त रहेको थियो । कार्यवाहक अध्यक्षको रुपमा अर्थ मन्त्रालयका सहसचिव मदन दाहालले प्राधिकरण सम्हाल्दै आएका छन् ।
