कान्ति भैरब सहकारीमा २७ करोड ठगी प्रकरण : अध्यक्षसहित ९ जना पक्राउ
काठमाडौं । गोकर्णेश्वर नगरपालिका–४ मा रहेको कान्ति भैरव बचत तथा ऋण सहकारी संस्थामा ठूलो मात्रामा ठगी प्रकरण खुलेको छ । सहकारी सञ्चालकले करिब २७ करोड रुपैयाँ ठगी गरेको अभियोगमा अध्यक्षसहित ९ जना पक्राउ परेका छन् । महानगरीय प्रहरी परिसर, काठमाडौंका अनुसार बचतकर्ताको २६ करोड ८२ लाख ३ हजार ३८ रुपैयाँ र ८७ लाख ६ हजार १४४ रुपैयाँ अपचलन गरी ठगी गरिएको पाइएको छ । पक्राउ पर्नेमा संस्थाका अध्यक्ष हरिकृष्ण श्रेष्ठ, पूर्वअध्यक्ष तथा सल्लाहकार प्रेम श्रेष्ठ, कोषाध्यक्ष सेरलाल श्रेष्ठ, सह–प्रबन्धक राजेन्द्र श्रेष्ठ, उपाध्यक्ष रामेश्वर श्रेष्ठ, सचिव तथा प्रबन्धक रामदाश श्रेष्ठ, सदस्य अनिरुद्र श्रेष्ठ, लेखा समिति संयोजक चन्द्रप्रसाद पौडेल लगायत रहेका छन् । उनीहरूमाथि सहकारी ऐन अन्तर्गत ठगीको मुद्दा दायर गरिएको छ । पीडित बचतकर्ताले रकम फिर्ता नपाएको भन्दै लामो समयदेखि आन्दोलन गर्दै आएका छन् । सहकारी पीडित संघर्ष समितिका अनुसार संस्थामा करिब ८ हजार बचतकर्ता छन् । सञ्चालकहरूले आफन्तलाई बिना धितो कर्जा दिने, कर्मचारीमार्फत अपचलन गर्ने जस्ता कार्य गरेको खुलेको छ । हाल जिल्ला अदालत काठमाडौंमा उनीहरू विरुद्ध ७ वर्ष कैद र ७५ हजार रुपैयाँ जरिवाना माग गर्दै मुद्दा दायर गरिएको छ ।
निकिताले दर्ता गरेको मुद्दा सर्वाेच्चका न्यायाधीश ढुंगानाको इजलासमा
काठमाडौं । राष्ट्रिय स्वतन्त्र पार्टी (रास्वपा) का सभापति तथा पूर्वगृहमन्त्री रवि लामिछानेकी पत्नी निकिता पौडेलले दायर गरेको मुद्दा सर्वोच्चका न्यायाधीश टेकप्रसाद ढुंगानाको इजलासमा पेशी परेको छ । लामिछानेलाई थुनामा पठाउने उच्च अदालत बुटवलको आदेशविरुद्ध लामेछानेको तर्फबाट निकिताले शुक्रबार सर्वोच्च अदालतमा रिट दायर गरेकी थिइन् । ढुंगानाको इजलासको पहिलो नम्बरमा पेशी परेको छ । गत चैत २२ गते उच्च अदालत बुटवलको तुलसीपुर इजलासले रुपन्देही जिल्ला अदालतको धरौटीमा छाड्ने आदेश बदर गर्दै रविलाई थुनामा पठाउने आदेश दिएको थियो । उक्त आदेश न्यायाधीश रमेश ढकाल र स्वीकृति पराजुलीको संयुक्त इजलासबाट आएको हो । यसअघि रुपन्देही जिल्ला अदालतले रविलाई १ करोड रुपैयाँ धरौटीमा रिहा गरेको थियो । तर बुटवल इजलासले सो आदेश उल्ट्याउँदै थुनामा पठाउन निर्देशन दिएको थियो । उक्त आदेशसँग असहमति जनाउँदै निकिताले सर्वोच्च अदालतको ढोका ढकढक्याए‍की हुन् ।
वर्ष २०८१ : आठ हजार बढी घटनामा ७४५ जनाको मृत्यु, ३५१ जना पहिरोका कारण
काठमाडौं । गएको एक वर्षमा विपद्जन्य घटनामा ७४५ जनाको ज्यान गएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार एक वर्षमा आठ हजार ८६१ वटा विपद्का घटना घटेको र ती घटनामा परी ७४५ जनाको मृत्यु भएको हो । ती घटनामा परी ६९ जना बेपत्ता भएका र एक हजार ७०२ जना घाइते भएका प्राधिकरणका प्रवक्ता रामबहादुर केसीले जानकारी दिए । उनका अनुसार एक वर्षमा विपदबाट १८ हजार ९९१ घरपरिवार प्रभावित हुन पुगेका छन् । कुल रु तीन अर्ब १३ करोड बराबरको आर्थिक क्षति भएको प्राधिकरणले जनाएको छ । कुन घटनामा कति मानवीय क्षति ? सबैभन्दा बढी पहिरोका कारण ३५१ जनाको ज्यान गएको छ । त्यसपछि बाढीबाट ९७, चट्याङबाट ७८ र आलागीबाट ७७ जनाको मृत्यु भएको प्राधिकरणले जनाएको छ । भारी वर्षाका कारण आठ, जनावरको आक्रमणबाट ४३, लेक लागेर २४, हवाई दुर्घटनामा २३, सर्पदंशबाट १९ जनाको मृत्यु भएको छ । त्यसैगरी, डढेलोबाट १०, हुरीबतासका कारण सात, डुङ्गा पल्टेर एक र अन्य विविध कारणबाट सात जनाको मृत्यु भएको छ । पहिरोबाट ४८, बाढीबाट १८ र हिउँ पहिरोमा परेर तीन जना बेपत्ता भएका छन् । सबैभन्दा बढी आगलागीका घटना विपद्जन्य घटनाका सङ्ख्या अध्ययन गर्दा सबैभन्दा बढी आगलागीका घटना यस वर्ष भएका छन् । विसं २०८१ वैशाख १ देखि चैत २९ गतेसम्मको तथ्याङ्कानुसार आगलागीका मात्र चार हजार १४५ वटा घटना भएका छन् । त्यसपछि डढेलोका एक हजार १९५ वटा र पहिरोका एक हजार पाँच घटना भएको छ । त्यस्तै, बाढी ४१८, भारीका वर्षाका ५६८, चट्याङका ४१८, जनावर आक्रमणका ४७७, लेक लागेका १११ वटा घटना भएका छन् । हवाई दुर्घटनाका दुई, सर्पदंशका ८४, हावाहुरीका ३४९, डुङ्गा पल्टेका एक, हिउँ पहिरोका छ, भूकम्पका ७४, असिनापानी एक र अन्य सातवटा विपद्जन्य घटना भएको प्राधिकरणले सार्वजनिक गरेको विवरणमा उल्लेख छ ।
राष्ट्र बैंकले बैंकहरूको मुद्दती निक्षेपमा ९७ करोड लगानी गर्ने
काठमाडौं । नेपाल राष्ट्र बैंकले आफ्नो उपदान तथा पेन्सन कोषमा रहेको ९७ करोड रुपैयाँ मुद्दती निक्षेपमा लगानी गर्ने निर्णय गरेको छ । केन्द्रीय बैंकले आइतबार सूचना जारी गर्दै उक्त रकम वाणिज्य बैंक, विकास बैंक र वित्त कम्पनीमा लगानी गर्न लागेको जानकारी गराएको हो । राष्ट्र बैंकका अनुसार 'क' वर्गका वाणिज्य बैंकहरूमा ७७ करोड ६० लाख, 'ख' वर्गका राष्ट्रिय स्तरका विकास बैंकहरूमा १४ करोड ५५ लाख र 'ग' वर्गका राष्ट्रिय स्तरका वित्त कम्पनीहरूमा ४ करोड ८५ लाख रुपैयाँ मुद्दती निक्षेपमा लगानी गरिनेछ । उक्त लगानी ७ वैशाख २०८२ देखि ७ वैशाख २०८३ सम्म, अर्थात् ३६६ दिनका लागि हुनेछ । इच्छुक संस्थाहरूले आवेदन आगामी ३ वैशाख साँझ ७ बजेसम्म दिनुपर्नेछ । निक्षेपको लागि योग्यता प्राप्त बैंक तथा वित्तीय संस्थाले राष्ट्र बैंकका विभिन्न मापदण्डहरू पूरा गर्नुपर्नेछ, जसमा कम्तीमा दुई वर्षको सञ्चालन अवधि, निर्धारित पूँजीकोष, न्यूनतम तरलता, सीमित निष्क्रिय कर्जा, तथा विगतमा कारबाहीमा नपरेको अवस्था हुनुपर्नेछ ।
२ सय जनालाई इसेवामा रोजगारीको अवसर, १२ कक्षा पासले आवेदन दिन सक्ने
काठमाडौं । डिजिटल वालेट सेवा प्रदायक कम्पनी इसेवामा रोजगारीको अवसर खुलेको छ । कम्पनीले देशभरका विभिन्न प्रदेशमा कार्य गर्नका लागि २०० जना बजार प्रतिनिधिको माग गरेको हो । इसेवाले कोशी, मधेश, लुम्बिनी, गण्डकी, कर्णाली र सुदूरपश्चिम प्रदेशमा २८/२८ जना र बागमती प्रदेशमा ३२ जना गरी कुल २०० जनाको माग गरेको जनाएको छ । उम्मेदवारले न्यूनतम १२ कक्षा उत्तीर्ण गरेको हुनुपर्छ । इच्छुक व्यक्तिहरूले आफ्नो बायोडाटा कम्पनीको इमेलमार्फत पठाउन सक्नेछन् ।
वीरगञ्जमा निषेधाज्ञाको अवधि थप
वीरगञ्ज । जिल्ला प्रशासन कार्यालय, पर्साले जिल्लामा शान्ति सुव्यवस्था कायम गर्न वीरगञ्ज महानगरपालिका र वरपरका क्षेत्रमा निषेधाज्ञा (कर्फ्यू)को समय बढाएको छ । आइतबार मध्याह्न १२ः०० बजेसम्मका लागि जारी भएको निषेधाज्ञाको समय बढाएर मध्यरात १२ः०० बजेसम्म निषेधाज्ञा जारी गरिएको हो । पर्साका प्रमुख जिल्ला अधिकारी गणेश अर्यालले शनिबार साँझ ७ः३० बजेदेखि आइतबार १२ः०० बजेसम्मका लागि जारी भएको कर्फ्युको समय आज राति १२ः०० बजेसम्मका लागि बढाएको जानकारी दिए । दुई समुदायबीच उत्पन्न विवाद उग्र हुँदै गएपछि जिल्ला प्रशासन कार्यालयले हिजो साँझ साढे ६ बजेदेखि आइतबार मध्याह्न १२ बजेसम्मको लागि कर्फ्यु लगाएको थियो।
प्रभु क्यापिटलको २०८२ को डिजिटल क्यालेन्डर सार्वजनिक, लगानी र साक्षरतामा जोड
काठमाडौं । प्रभु क्यापिटल लिमिटेडले नेपाली नयाँ वर्ष २०८२ को अवसरमा सांस्कृतिक र वित्तीय सन्देश समेटिएको डिजिटल क्यालेन्डर सार्वजनिक गरेको छ । यस क्यालेन्डरमा नेपाल पञ्चाङ्ग निर्णायक विकास समितिबाट अनुमोदित तिथि, सार्वजनिक बिदा, चाडपर्व, नेपाली–अंग्रेजी मिति, साथै प्रभु क्यापिटलका सेवा र सुविधाहरू समावेश गरिएको छ । डिजिटल माध्यममार्फत डाउनलोड र क्युआर कोड स्क्यान गरेर सजिलै पहुँच पाउने गरी क्यालेन्डर उपलब्ध गराइएको छ । प्रभु क्यापिटलले ग्राहकहरूलाई वित्तीय साक्षरताको सन्देश दिनका साथै आफ्नो सेवाबारे जानकारी दिने उद्देश्यले क्यालेन्डरलाई आकर्षक ढंगमा प्रस्तुत गरेको जनाएको छ । कम्पनीको साँचो पहिचान कर्मचारी हुन् भन्ने सोच अनुरूप, क्यालेन्डरमा कर्मचारीहरूकै माध्यमबाट सेवा र योजनाहरू प्रस्तुत गरिएको छ । नेपाली चाडपर्वमा उपहार दिने परम्परालाई आधुनिक सोचसहित विस्तार गर्दै, क्यापिटलले भविष्य केन्द्रित वित्तीय साधनहरू उपहार दिन प्रोत्साहन गरेको छ । जसले लगानी बढाउने, वित्तीय सुरक्षा दिने र समृद्ध भविष्यतर्फ उन्मुख गराउने सन्देश दिन्छ । कम्पनीका अनुसार क्यालेन्डरमा सांस्कृतिक झल्को दिने चित्रहरू र वित्तीय जानकारीलाई सँगै प्रस्तुत गरिएको छ । जसले परम्परा र प्रविधिको सशक्त संयोजन दर्शाउँछ । प्रभु क्यापिटलको यो डिजिटल क्यालेन्डर केवल समयको सूचक मात्र नभई वित्तीय चेतना, संस्कृतिको सम्मान र प्रविधिको प्रयोगको सफल उदाहरण बनेको छ । यसले ग्राहक तथा सर्वसाधारणलाई लगानीप्रति सचेत बनाउँदै, डिजिटल पहुँचमार्फत सुलभ र सन्देशमूलक अनुभव प्रदान गर्ने लक्ष्य लिएको छ ।
तस्बिरमा हेर्नूहोस चिसाेपानीमा १० वर्षदेखि भग्नावस्थामा रहेका घर तथा होटलहरू
काठमाडौं । विसं २०७२ वैशाख १२ गते नेपालमा विनाशकारी भूकम्प गयो । उक्त भूकम्प र त्यसपछिको पराकम्पमा परी ८ हजार ६ सय ५४ जनाले ज्यान गुमाए । २२ हजार ३०९ जना घाइते हुनुका साथै ५ लाख ११ हजार ३९० घर ध्वस्त भए र २ लाख ८६ हजार ७६७ घर आंशिक रूपमा क्षतिग्रस्त भए । भत्किएका धेरै घरको पुनःनिर्माण सम्पन्न भए पनि चिसाेपानीमा भने हालत उस्तै छ । त्यहाँका घर तथा होटलहरू अझै पनि भग्नावस्थामा रहेका छन् । भूकम्प गएको १० वर्ष पुग्दैछ तर ती संरचनाको पुनःनिर्माण हुन सकेको छैन । नुवाकोटका शिवपुरी गाउँपालिका–१ र सिन्धुपाल्चोकको मेलम्ची नगरपालिका– ३ को सिमानामा चिसाेपानी पर्दछ । त्यस क्षेत्रका कुल २५ घर भूकम्पले क्षति गरेको थियो । तस्बिरहरू : नरेश बोहोरा/विकासन्युज
