डा. श्रेष्ठलाई बन्धक बनाउने योञ्जन जेल चलान
काठमाडौं । नेपाल प्रहरीले बिपी कोइराला मेमोरियल क्यान्सर अस्पतालका कार्यकारी निर्देशक डा. भक्तमान श्रेष्ठलाई बन्धक बनाउने गौतम योञ्जनलाई पक्राउ गरेको छ । प्रहरीको केन्द्रीय अनुसन्धान ब्युरोले विसं २०६७ जेठ ४ गते बेलुका अस्पतालबाट घर फर्कने क्रममा अपहरण गरी १८ दिन बन्धक बनाउने कार्यमा संलग्न योञ्जनलाई बिहीबार पक्राउ गरी शुक्रबार सार्वजनिक गरेको हो । ब्यूरोका प्रवक्ता, प्रहरी उपरीक्षक बेलबहादुर पाण्डेले डा. श्रेष्ठलाई बन्धक बनाउने समूहका एक सदस्य रहेका योञ्जनलाई महाराजगञ्जबाट पक्राउ गरिएको जानकारी दिएका छन् । मानिस अपहरण तथा शरीर बन्धक मुद्दामा पुनरावेदन अदालतको फैसलाअनुसार योञ्जनलाई नौ वर्ष कैद र रु ५० हजार जरिवाना ठहर भएकाले फैसला कार्यान्वयनका लागि पक्राउ गरिएको पाण्डेले बताए । डा. श्रेष्ठलाई बन्धक गरेर धादिङ, काठमाडौँ, नुवाकोटलगायत जिल्लामा राखिएको अनुसन्धानमा खुलेको छ । पक्राउ परेका योञ्जनलाई कैद भुक्तानका लागि केन्द्रीय कारागार सुन्धारा पठाइएको ब्युरोले जनाएको छ ।
नेपाल बैंकले दियाे ‘वि विल राइज’ फाउन्डेसनलाई १५ लाखको चेक
काठमाडौं । नेपाल बैंक लिमिटेडले वि विल राइज फाउन्डेसनलाई रु. १५ लाखको चेक हस्तान्तरण गरेको छ । बैंकका प्रमुख कार्यकारी अधिकृत कृष्ण बहादुर अधिकारीले फाउन्डेसनका फुर्वा तेन्जीङ्ग शेर्पालाई सो रकमको चेक हस्तान्तरण गरेका हुन् । उक्त रकम डेभिड लामा विवक निर्माणमा प्रयोग गरिने भएको छ । विवक पर्वतारोहणको क्रममा बास बस्न प्रयोग गरिने स्टीलले बनेको आधुनिक बासस्थान हो । यो बासस्थान पर्यटक, हिमाल आरोही तथा भरियाहरुले रोल्वालिङ्ग बाट तसी लप्चा पास हुँदै थामे सम्म जान प्रयोग गर्न सक्नेछन् ।
बाइक राइडिङ्ग मन्त्रः जसले तपाईलाई सम्भावित दुर्घटनाबाट जोगाउँछ
काठमाडाैं । बाइक चलाउँदा हामी सानो सानो कुरालाई प्रायः नजरअन्दाज गर्ने गर्दछौं जुन दुर्घटनाको ठूलो कारण पनि बन्न सक्दछ । दुर्घटना जहाँ पनि र जहिले पनि हुन सक्ने कुरा हो । त्यसै कारणले हामीले आफ्नो सुरक्षामा कुनैपनि किसिमको सम्झौता पटक्कै गर्नु हुँदैन । आज हामी केहि त्यस्ता उपायहरुको बारेमा चर्चा गर्न गइरहेका छौं जसलाई बाइक चलाएको समयमा ध्यानमा राख्नाले सम्भावित दुर्घटना बाट आफूलाई जोगाउन सकिन्छ । राम्रो हेल्मेटको प्रयोग हेल्मेट लगाउने भन्दा पनि क्वालिटीको हेल्मेट लगाउने भन्ने कुराले बढि महत्व राख्दछ । दुर्घटनाको बेला हाम्रो जीवन बचाउन हेल्मेटको ठूलो भूमिका रहेको हुन्छ । तसर्थ हेल्मेट किन्ने बेलामा त्यसमा राम्रो मेटेरियलको प्रयोग भएको छ कि छैन, मान्यताप्राप्त ब्राण्डको हो कि होइन र त्यसैगरी सो हेल्मेट लगाउँदा आफूलाई कम्फर्टेवल हुन्छ कि हुँदैन भन्ने कुराहरुलाई ध्यानमा राख्नु पर्दछ । द्रुत गतिमा नचलाउने ओभरस्पिडिङ्गले दुर्घटना निम्त्याउने हुनाले बाइकलाई कहिले पनि द्रुत गतिमा चलाउनु हुँदैन । सडकमा तोकिए अनुसारको स्पिडमा मात्र बाइक चलाउनु पर्दछ । त्यसैगरी चालकले आफूले कन्ट्रोल गर्न सक्ने गतिमा मात्र बाइक चलाउने बानी बसाउनु पर्दछ । दुवै ब्रेकको राम्रो प्रयोग एउटा राम्रो बाइकरले दुवै ब्रेकको सहि प्रयोगबाट मात्र बाइकलाई चाहेको समयमै रोक्ने गर्दछ । अगाडि वा पछाडि मध्येको कुनै एउटा मात्र ब्रेकको प्रयोग गर्दा बाइक चिप्लिने सम्भावना प्रवल हुन्छ । विज्ञहरुका अनुसार अगाडिको ब्रेकमा ७० प्रतिशत दबाव र पछाडि चाहिँ ३० प्रतिशत दबाब रहन गयो भने मात्र त्यसलाई राम्रो ब्रेकिङ्ग मानिन्छ । इण्डिकेटरको प्रयोग शिकारु चालकहरुले बाइकलाई कतै मोड्नु पर्दा प्रायःजसो अचानक नै दिशा बदल्छन् जसले कुनैपनि बेला दुर्घटना निम्त्याउन सक्छ । लेनमा आफ्नो दिशा बदल्नु परेको खण्डमा इण्डिकेटर बालेर अरुलाई आफू कुन दिशातर्फ मोडिँदैछु भन्ने कुराको अग्रिम जानकारी दिनु पर्दछ । अन्य सवारी सित उचित दुरी कायम गर्ने बाइक चलाएको बेला आफ्नो नजिकको स्थितिमा नजर राख्नुपर्दछ । आफ्नो अगाडि, पछाडि अथवा दायाँ बायाँ रहेका सवारीहरु सित उचित दुरी बनाइराख्नु पर्दछ । यसो गर्नाले सम्भावित दुर्घटना बाट बच्न प्रशस्त समय रहन्छ । ब्लाइण्ड टर्नमा सावधानी ब्लाइण्ड टर्न अर्थात् विपरित दिशाबाट कुन सवारी आइरहेको छ भनी देख्न मुश्किल हुने मोडमा धेरै सावधानी अपनाउनु पर्ने हुन्छ । यस्ता मोडहरुमा कहिल्यै पनि द्रुत गतीमा बाइक चलाउने अथवा अर्को सवारीलाई ओभरटेक गर्ने गल्ती गर्नुहुँदैन । एबीएस जडित बाइकको प्रयोग एबीएस यानिकि एन्टी–लक ब्रेकिङ्ग सिस्टमले दुर्घटनालाई धेरै हदसम्म कम गर्दछ । एबीएस जडित बाइकमा अकस्मात ब्रेक लगाएको वेला चक्का लक हुन पाउँदैन र बाइक चिप्लिएर दुर्घटना हुने सम्भावना पनि कम हुन्छ । त्यसैले सम्भावित दुर्घटनाबाट जोगिनका लागि एबीएस जडान भएको बाइक किन्नु नै बुद्धिमानी ठहर्छ ।
गरिमा विकास बैंकद्वारा रेडक्रसले पायाे आइस ब्याग
काठमाडौं । गरिमा विकास बैकले सिएसआर अन्तर्गत नेपाल रेडक्रस सोसाइटीलाई आइजिएलओओ बक्स(आइस ब्याग) हस्तान्तरण गरेको छ । संस्थाका सभापति डोलराज पाण्डेलाई गरिमा विकास बैंक लिमिटेड महेन्द्रपुलका शाखा प्रमुख दिपेन्द्र पोख्रेलले एक कार्यक्रमका बिच हस्तान्तरण गरेका हुन् । उक्त कार्यक्रममा गरिमा विकास बैंकका कर्मचारीहरु विनिता राना, सोभियत अधिकारी, तृष्णा शाक्य, दिर्घ नारायण पौडेल साथै नेपाल रेडक्रस सोसाइटी जिल्ला कार्यसमिति कास्कीका पदाधिकारीहरुको उपस्थिती रहेको थियो ।
विज्ञापन संघको प्रदेश संयोजकमा शोभा
काठमाडौं । नेपाल विज्ञापन संघ (आन) को गण्डकी प्रदेश संयोजकमा शोभा गौतम चयन भएकी छन् । विहीबार पोखरामा एक कार्यक्रमका बीच संघको कार्यसमितिको निर्णय अनुसार गौतमलाई सो पदमा नियुक्त गरिएको हो । संघका अध्यक्ष रविन्द्र कुमार रिजालले विज्ञापन संघ गण्डकी प्रदेश संयोजकको रूपमा घोषणा गरेका हुन् । विज्ञापनका नीति र नियमलाई विस्तृत कार्यान्वयनका निम्ति आनले प्रदेश संरचनालाई अगाडि बढाएको संघका अध्यक्ष रिजालले जानकारी दिए । नव नियुक्त प्रदेश संयोजक गौतम पोखरा स्थिति सफल एड्भटाइजिङ्गकी प्रवन्ध निर्देशक हुन् । उनी विगत ५ वर्षदेखि विज्ञापन, संचार र इभेन्ट म्यानेजमेन्टको क्षेत्रमा कार्यरत छिन् ।
सवारी चालक अनुमतिपत्र नपाउँदा सेवाग्राही समस्यामा
काठमाडौं । सवारी चालक अनुमतिपत्र समयमा नपाउँदा सेवाग्राही समस्यामा परेका छन् । यातायात व्यवस्था कार्यालय भेरीमार्फत चालक अनुमतिपत्रका लागि आवेदन दिएका झण्डै ४५ हजार सेवाग्राहीले चालक अनुमतिपत्र पाएका छैनन् । सरकारलाई बुझाउनुपर्ने राजश्व रकम तिरेको एक वर्ष नाघेका सेवाग्राहीले पनि अझै चालक अनुमतिपत्र पाउन नसकेको निमित्त कार्यालय प्रमुख पूर्णबहादुर खत्रीले बताए । सरकारले चार वर्ष पहिले ‘स्मार्ट’ चालक अनुमति शुरु गरेदेखि नै सेवाग्राहीले समयमा चालक अनुमतिपत्र पाएका छैनन् । यातायात व्यवस्था कार्यालयबाट परीक्षा उत्तीर्ण गरेकाको चालक अनुमतिपत्र छपाइ यातायात व्यवस्था विभागले गर्दै आएको छ । विभागमा रहेको मुद्रणयन्त्र (छपाइ मेशिन)को क्षमताभन्दा धेरै कार्ड छाप्नुपर्ने भएकाले सेवाग्राहीले समयमा चालक अनुमतिपत्र नपाएको हुन सक्ने उनको भनाई छ । सडकमा छड्के जाँच हुँदा चालकले कार्यालयमा राजश्व तिरेको कागज देखाएर हिँड्ने गरेका छन् । रसिदको नम्बर नबुझिने भएर अहिले लेमिनेशन गरेर कागज बोक्नुको विकल्प नभएको चालक ईश्वर रेग्मीको भनाइ छ । सरकारले आधुनिक प्रविधिको प्रयोग गर्दै हस्तलिखित कार्डलाई ‘स्मार्ट’ चालक अनुमतिपत्रले विस्थापित गर्ने लक्ष्य राखे पनि आवश्यकताभन्दा कम छपाई हुँदा सेवाग्राहीले समयमा चालक अनुमतिपत्र नपाएका हुन् । विभागले चाँडो गर्ने भन्दै केही महिना निजी कम्पनीलाई छपाइको जिम्मेवारी दिएको निमित्त कार्यालय प्रमुख खत्रीले बताए। सङ्घीय सरकारले गत मङ्सिरमा यातायात व्यवस्था कार्यालय भौतिक पूर्वाधार विकास मन्त्रालयलाई हस्तान्तरण गरिसकेकाले यातायातको व्यवस्थापनको जिम्मेवारी प्रदेश सरकारको हो । प्रदेश सरकार आफैंले कार्ड छाप्न शुरु नगर्दा चालकले समयमै स्मार्ट कार्ड पाउन सकेका छैनन् । १९ करोड रुपैयाँ बढी राजश्व सङ्कलन बाँकेको नेपालगञ्जस्थित यातायात व्यवस्था कार्यालय भेरीले चालू आर्थिक वर्षको पहिलो पाँच महिनामा १९ करोड ६१ लाख ८६ हजार ८८६ रुपैयाँ राजश्व सङ्कलन गरेको छ । सवारी साधनको नवीकरण, यातायात क्षेत्रको आम्दानी, चालक अनुमतिपत्र दर्ता तथा नवीकरण, ब्लुबुकसम्बन्धी दस्तुर दण्ड जरिवानालगायतका विविध शीर्षकमा उक्त राजश्व असुली गरिएको कार्यालयका लेखा अधिकृत दीपक गोराथोकीले बताए । उनका अनुसार सबैभन्दा धेरै साउन महिनामा चार करोड २० लाख ८३ हजार २७३ रुपैयाँ, भदौमा तीन करोड ९१ लाख ६५ हजार २३७ रुपैयाँ, असोजमा तीन करोड ९० लाख २७ हजार ३५८ रुपैयाँ, कात्तिकमा तीन करोड ३९ लाख आठ हजार २८३ रुपैयाँ र मङ्सिर महिना चार करोड १९ लाख २६ हजार ७३५ रुपैयाँ राजश्व सङ्कलन भएको छ । उक्त राजश्व गत आवको अघिल्लो र पछिल्लो पाँच महिनाको तुलनामा बढी हो । तीन सय बढी ट्रक प्यानमा दर्ता बाँके ट्रक यातायात सेवा प्रालिले आफ्ना ३०० भन्दा बढी ट्रकलाई स्थायी लेखा नम्बर (प्यान) वितरण गरेको छ । अध्यक्ष महेन्द्र मल्ल ठकुरीले तीन महिनादेखि नै आफूहरुले प्यानसम्बन्धी नियम कार्यान्वयन गरेको बताए । सरकारले चालू आर्थिक वर्ष २०७६÷०७७ को बजेटमार्फत एक हजारभन्दा बढीको खर्च देखाउन प्यान बिल अनिवार्य छ । यो व्यवस्था पुस १ गतेदेखि कडाइ गरेसँगै ढुवानी व्यवसायीले दर्ता नभएका गाडीको काम लिन बन्द गरेका हुन् । ढुवानीमा मूल्य अभिवृद्धि कर (भ्याट) र प्यानको विरोध भएपछि सहजीकरणको उपाय पत्ता लगाउन कार्यदल बनाएको थियो । “पुुस १ गतेबाट नियम लागू भए पनि हामीले यो तीन महिना अघिबाटै लागू गरिसकेका छौँ”, अध्यक्ष मल्ले बताए । प्यान नलिएका ट्रक र यातायात व्यवसायीका ढुवानी साधनमा मालसामान लोड अनलोड गर्न पाइँदैन । सरकारले चालू आव २०७६÷०७७ को बजेटमार्फत एक हजार रुपैयाँभन्दा बढीको खर्च देखाउन प्यान बिल अनिवार्य गरेको हो । बाँकेमा पनि राजश्व अनुसन्धान कार्यालय कोहलपुरले जिल्लास्थित सरोकारवाला निकायलाई बोलाएर प्यान बिल अनिवार्य गर्न निर्देशन दिइसकेको छ । रासस
गुगल बिजनेस ग्रुपद्वारा ‘जिबिजि बिजफेस्ट’ र ‘जिबिजि बिजस्टार्ट’ को आयोजना हुँदै
काठमाडौं । गुगल बिजनेस ग्रुपले स्टार्टअप प्रदर्शनी ‘जिबिजि बिजफेस्ट’ र ‘जिबिजि बिजस्टार्ट’ को दोस्रो संस्करण आयोजना गर्ने भएको छ । जावलाखेलस्थित डिएभी स्कुल परिसरमा शनिबार जिबिजि बिजफेस्ट प्रविधि तथा स्टार्टअप व्यवसाय सम्बन्धि प्रदर्शनी हुने भएकाे हाे । नेपालमा क्लाउड कम्प्युटिङ सम्बन्धि काम गर्ने कम्पनी जेनेस सफ्टवेयर सोलुसन सँगको मुख्य सहकार्यमा गर्न लागिएको यस मेलाको उद्देश्य देशभरबाट नव उद्यमीहरु र स्टार्टअप संस्थापकहरूलाई एउटै प्लेटफर्ममा ल्याउने र प्रबर्धन गर्ने रहेको छ । साथै, बिजस्टार्ट नाम दिइएको विशेष वर्कशप कार्यशालामा नेपालका स्टार्टअप संस्थापकहरूले विशेषज्ञहरू मार्फत आफ्नो व्यवसायमा उपयोगी हुने गुगलका विभिन्न व्यापार प्रविधिहरु सिक्ने र उक्त प्रविधि प्रयोग गरेर आफ्नोे व्यवसाय विस्तार गर्ने अवसर पाउने छन् । कार्यक्रमको अवधारणा बारेमा बोल्दै गुगल बिजनेस ग्रुपका प्रवन्धक अमित अग्रवालले कार्यक्रमका सहभागिहरुले गुगलका नयाँ टुल र आइडिया पनि सिक्ने अवसर पाउने र व्यापार प्रवर्धन र विस्तार गर्न सक्ने बताए। मेलामा देशभरका दुई सयभन्दा बढी स्टार्टअपहरूले आफ्नो उत्पादन र सेवाहरुको प्रदर्शन गर्ने अपेक्षा आयोजकको रहेको छ । साथै, कार्यक्रममा गुगलका प्रविधिमा चासो राख्ने र स्टार्टअप गर्न इच्छुक दस हजार भन्दा बढी अवलोकनकर्ताको सहभागिता रहने आयोजकको विश्वास छ । साथै, प्रदर्शनीमा ’गुगल माई बिजनेस’ लक्षित एउटा विशेष स्टल रहने छ । प्रदर्शनीमा सहभागि स्टार्टअपहरूले उक्त स्टल मार्फत आफूलाई गुगलको व्यापार निर्देशिका (गुगल बिजनेस डाइरेक्टरी) मा सूचीबद्ध गर्न सक्नेछन् । उक्त निर्देशिकामा सुचिकृत भए पश्चात ग्राहकहरूले व्यवसाय र त्यसको विवरणहरू पत्ता लगाउन सक्नेछन् । यसका साथै उक्त व्यवसायहरु गुगल सर्च रिजल्ट पेजको पहिलो पृष्ठमा देखा पर्ने सम्भावना बढ्नेछ । मेलामा सहभागी स्टार्टअपहरुका लागि स्टल बुकिङ निःशुल्क गरिएको छ ।
मुलुकभरका होटल व्यवसायी सुर्खेतमाः पर्यटन प्रवद्र्धनमा टेवा
काठमाडौं । होटल व्यवसायी महासङ्घको राष्ट्रिय महाधिवेशन लागि मुलुकभरका होटल व्यवसायी आजदेखि वीरेन्द्रनगरमा भेला भएका छन् । महाधिवेशनका लागि नेपालभरका ८० हजार होटलको प्रतिनिधित्व गर्दै सात वटै प्रदेशका व्यवसायी सुर्खेत आएका हुन् । महासङ्घले दुई दिने महाधिवेशनको सम्पूर्ण तयारी पूरा भएको जनाएको छ । महाधिवेशनको उद्घाटन दिउँसो १ बजे कर्णाली प्रदेशका आर्थिक मामिला तथा योजनामन्त्री प्रकाश ज्वालाले गर्ने कार्यक्रम छ । होटल व्यवसायी महासङ्घका केन्द्रीय अध्यक्ष अमृत भुजेलले महाधिवेशनमा सातै प्रदेशबाट एक हजार ५०० भन्दा बढी होटल व्यवसायीको सहभागिता रहने बताए । महाधिवेशनले नयाँ नेतृत्वसमेत चयन गर्नेछ । अध्यक्ष भुजेलले महाधिवेशन प्रतिनिधिलाई कर्णालीको अर्गानिक खानाको व्यवस्था मिलाइएको बताए । “कर्णाली प्रदेश सरकारले अर्गानिक उत्पादनलाई जोड दिएको छ, यस्तो सकारात्मक अभियानको सार्थकताका लागि हामी निजी क्षेत्रको पनि सहयोग हुनुपर्छ”, उनले भने, “कोशेलीका रुपमा स्थानीय उत्पादनलाई नै प्रयोग गर्दैछौँ ।” महासङ्घ सुर्खेतका पूर्वअध्यक्ष तर्कबहादुर शाहीले कर्णालीको पर्यटन प्रवद्र्धनमा महाधिवेशनले ठूलो टेवा पु¥याउने जानकारी दिए । रासस