कसरी बनाउने चाकु ? के कस्ता छन् यसका फाइदा ?
काठमाडौं । हिन्दुहरुको प्रमुख चाडमध्ये माघे संक्रान्ति पनि महत्वपूर्ण पर्व हो । परम्परादेखि मानी आएको धार्मिक तथा सांस्कृतिक महत्व बोकेको यो संक्रान्तिलाई मकर संक्रान्तिको रुपमा पनि चिनिन्छ । माघे संक्रान्तिमा विशेष गरेर घ्यू चाकु, तिलको लड्डू, फापरको फुरौला, तरुल, सखरखण्ड जस्ता खाद्यपदार्थ खाने प्रचलन छ । माघे संक्रान्तिको आसपासमा यस्ता खाद्यपरिकार विक्री वितरणको लागि पर्याप्त मात्रामा राखिएका पनि हुन्छन् । खाद्य प्रविधि तथा गुण नियन्त्रण विभागका प्रवक्ता मोहनकृष्ण महर्जनका अनुसार व्यवसायिक चाकु उत्पादन गर्ने संस्था विभागमा दर्ता भएका छैनन् । यसैकारण यस्ता खाद्य पदार्थको गुणस्तरमा यकिन हुन सकिने अवस्था भने छैन । तर, परम्परादेखि उत्पादन गरिदै आएको खाद्य पदार्थ भएकोले गुणस्तरहीन हुन्छन् भनेर आरोप लगाइहाल्न मिल्ने अवस्था पनि छैन । गुलियो तथा अमिलो खाद्य पदार्थ आफैमा सुरक्षित खाद्यपदार्थ भएकाले यसको विग्रिने सम्भावना अति हुन्छ । सखर तथा चिनीलाई पकाएर बनाउने चाकुको गुणस्तरमा विभागले हालसम्म बजारमा अनुगम गरेको छैन । काठमाडौं उपत्यकामा धेरै चाकु उत्पादन हुने स्थान टोखा हो । टोखामा माघे संक्रान्तिताका धेरै परिमाणमा चाकु उत्पादन हुने गर्छ । घरमा नै बनाउने आफ्नै प्रक्रिया भएकोले पनि यसको विश्वनियता बढ्दै गएको छ र पछिल्लो समय चाकुलाई नेपाली चक्लेटको रुपमा ब्राण्डिङ गर्ने प्रयास पनि भएको छ । बजारमा माघे संक्रान्ति तथा नेवारहरुको यमुरी पूर्णिमाको दिन चाकुको प्रयोग धेरै हुने भएपनि हालसम्म कुनै गुनासो नआएको विभागको भनाइ छ । चाकु बनाउने तरिका पानीमा सखर राखेर आगोमा लामो समयसम्म पकाउने, उक्त पानी र सखर पाकेसँगै ठूलो खुल्ला भाँडोमा राख्ने । तातो सेलाएसँगै त्यसलाई रंग परिवर्तन नहुँदासम्म फिट्ने । त्यसपछि आफूलाई चाहिने मात्रामा किसकिस, काजु, नरिवल मिसाएर केही समय खुल्ला छोड्ने । यस्तै, घरेलु तरिकाले आफूले चाहेअनुसारको आकारमा चाकु तयार गर्न सकिन्छ । यस्ता छन् चाकुको फाइदा गुलियो खाद्यवस्तुले शरिरलाई शक्ति प्रदान गर्ने गर्दछ । जाडो मौसममा थकित शरिरलाई सन्तुलन गर्ने काम गुलियो खाद्यान्नभित्र पाइन्छ । चिसोबाट थाकेको शरिरलाई न्यायो हुन्छ भन्ने मान्यताका साथ चाकु, घ्यू, तरुल, तिल, सक्खरखण्ड जस्ता खाद्यपदार्थलाई प्रसादको स्वरुप लिने गरिँदै आएको छ । सखर र पानीबाट बन्ने चाकुमा कार्बाेहाइड्रेड प्रशस्त मात्रामा हुन्छ । त्यस्तै, चाकुमा हुने कालो पदार्थमा अधिक मात्रामा आइरन पाइने हुँदा कमजोर शरिर तथा रक्तअल्पता भएका विरामीको लागि यसले धेरै फाइदा गर्छ । शरिरलाई ताप प्रदान गर्नका लागि घ्यू सन्तुलित मात्रामा प्रयोग गर्दा उपयुक्त हुन्छ । जाडोयाममा शरिरलाई अधिक मात्रामा उर्जा आवश्यक पर्ने हुँदा घ्यू र चाकु प्रयोग गरिएको हो ।
बजाजको नयाँ शोरुम स्याङ्जामा, ग्राहकलाई आकर्षक उपहारको व्यवस्था
काठमाडौं । नेपालका लागि बजाज मोटरसाइकलको अधिकृत वितरक हंसराज हुलासचन्द एण्ड कम्पनी प्रा.लि.ले स्याङ्जामा नयाँ शोरुम विस्तार गरेको छ । कम्पनीले उक्त विस्तारित शोरुम “अर्पण इन्टरप्राइजेज” को अझै आधुनिक एवं सुविधा सम्पन्न गरी मंगलबार उद्घाटन गरेको हो । स्याङ्जामा बजाजको नयाँ शोरुमले आफ्ना ग्राहकहरुलाई उच्चस्तरीय सेवा पुर्याउदै सधै अगाडि बढ्ने र बजाजको सेल्स, सर्भिस र स्पेयर्स देशभर उपलब्ध गराउन उद्देश्यलाई सार्थक बनाउन सहयोग गर्नेछ । यो उद्देश्यलाई सार्थक पार्ने अर्पण इन्टरप्राइजेजका प्रोप्राइटर अरुण श्रेष्ठलाई स्याङ्जामा डिलरसीप प्रदान गरिएको छ । बजाज, नेपालकै सर्वाधिक बिक्री हुने विश्वाशीलो अटोमोबाइल ब्राण्डले ग्राहकहरुलाई खरिद गरेको सामाग्रीमा अधिकतम मूल्य प्रदान गर्न सधै प्रतिबद्ध रहेको छ । नयाँ शोरुमले ग्राहकहरुलाई बाइकको स्पेयर्स पार्टस् तथा एसेसरिज खरिदका लागि सहज बनाउने छ । यसैको माध्यमबाट देशभरका ग्राहकहरुलाई उच्चस्तरीय, विश्वस्त सेवा र अझै आधुनिक सुविधा सुनिश्चित गर्दै बजाजलाई आफ्नो बिक्रीलाई थप सशक्त बनाउन सहयोग पुग्नेछ । नयाँ शोरुम शुभारम्भ गर्दै हंसराज हुलासचन्द एण्ड कम्पनी प्रा.लि.का जनरल म्यानेजर योगेन गुरुङले भने, “हामी स्याङ्जामा नयाँ शोरुम उद्घाटन गर्न पाउँदा निकै प्रसन्न छौं । हाम्रा ग्राहकहरु निरन्तर वृद्धि भइरहनु भएको छ र उहाँहरुलाई पूर्ण सन्तुष्टि र सुविधा प्रदान गर्नु हाम्रो जिम्मेवारी हो । स्याङ्जामा यो नयाँ शोरुम विस्तारसँगै, हामीले आशा गरेका छौँ कि यसले ग्राहकहरुको जीवन सहज बनाउनुका साथै उनीहरुले बजाज मोटरसाइकलको नयाँ अनुभव बटुल्ने अवसर प्राप्त गर्नेछन् ।” शोरुम उद्घाटनको अवसरमा ग्राहकहरुलाई आकर्षक उपहारको व्यवस्था पनि गरिएको कम्पनीले जनाएको छ ।
बजाजको इलेक्ट्रिक स्कुटर ‘चेतक’ भारतमा सार्वजनिक, नेपाल आइपुग्दा कति पर्ला मूल्य ?
काठमाडाैं । भारतीय टू व्हिलर्स कम्पनी बजाजले आफ्नो पहिलो इलेक्ट्रिक वाहन ‘चेतक’ लाई सुरुवाती मूल्य १ लाख रुपैयाँ तोक्दै भारतमा आज लञ्च गरेको छ । चेतक स्कुटर ‘अरबेन’ र ‘प्रिमियम’ गरी दुई अलग भेरियन्टहरुमा उपलब्ध रहेको छ जसमध्ये टप भेरियन्ट प्रिमियमको मूल्य भारतीय बजारका लागि १ लाख १५ हजार रुपैयाँ तोकिएको छ । प्रिमियम भेरियन्ट थप मेटालिक कलर अप्शन र फ्रन्ट डिस्क ब्रेकमा उपलब्ध रहेको छ भने अरबेन भेरियन्टमा चाहिँ मेटालिक कलर अप्शन उपलब्ध छैन र त्यसैगरी अगाडिको चक्कामा ड्रम ब्रेकको प्रयोग भएको छ । ब्याट्री र मोटर चाहिँ दुवैमा उहि समावेश छन् । यस्ता छन् विशेषता चेतकमा ३ किलोवाटआवरको लिथियम–आयन ब्याट्री समावेश छ जसलाई फुल चार्ज हुन ५ घण्टाको समय लाग्छ भने ८० प्रतिशत चार्ज हुन साढे तीन घण्टा र २५ प्रतिशत चार्ज हुन १ घण्टाको समय लाग्दछ । बजाजको दावी अनुसार यो ब्याट्रीको आयु ७० हजार किलोमिटर रहेको छ अर्थात् स्कुटरले ७० हजार किलोमिटरसम्मको यात्रा गर्दा सम्म यो ब्याट्री सकुशल नै रहिरहन्छ । यस स्कुटरले ४.०८ किलोवाट (५.४७ एचपी) को उच्चतम पावर र १६ एनएमको उच्चतम टर्क उत्पादन गर्दछ । चेतकमा ‘इको’ र ‘स्पोर्ट’ गरी दुई राइडिङ्ग मोडहरु दिइएका छन् । यस स्कुटरले इको मोडमा ९५ किलोमिटरको माइलेज प्रदान गर्दछ भने स्पोर्ट मोडमा चाहिँ ८५ किलोमिटरको माइलेज प्रदान गर्छ । चालकले एक्कासी एक्सलेरेटर दबाएर गती लिने वेलामा स्कुटरमा ‘किक डाउन मोड’ चालु हुन्छ जसले गर्दा स्कुटर एकछिनको लागि इको मोडबाट स्पोर्ट मोडमा प्रवेश गर्दछ र स्वतः फेरी इको मोडमै सिफ्ट हुन्छ । बजाजका अनुसार ओभरटेक गर्दा स्कुटरलाई बढी गतीको आवश्यकता भएको हुनाले यो फंक्शन समावेश गरिएको हो । चालकको सहजतालाई मध्यनजर गरेर बजाजले यस स्कुटरमा रिभर्स गियरको फिचर पनि समावेश गरेको छ जसले चालकलाई साँघुरो पार्किङ्गस्थलहरुमा मद्दत पुर्याउँछ । त्यसैगरी, यस स्कुटरमा स्मार्टफोन कनेक्टिभिटीको सिस्टम पनि समावेश छ जसमार्फत् स्कुटरको लोकेशन, चार्जको मात्रा, बाँकि रहेको रेञ्ज लगायतको जानकारी पाउन सकिन्छ । यसका साथै कसैले स्कुटरमा छेडछाड लगायत कुनैपनि किसिमको शंकास्पद गतिविधि गरेमा पनि चालकले आफ्नो स्मार्टफोन मार्फत् जानकारी पाउन सक्नेछन् । नेपाल आइपुग्दा कति पर्ला मूल्य ? बजाजको नेपालका लागि आधिकारीक बिक्रेता हंसराज हुलासचन्द एण्ड कम्पनी प्रा.लि.ले चेतकको नेपाल लञ्च र सम्भावित मूल्यका वारे केहिपनि उल्लेख गरेको भने छैन । भारतमा १ लाख रुपैयाँ पर्ने मोटरसाइकल अथवा स्कुटर नेपाल आइपुग्दा त्यसको मूल्य सवा तीन लाखको हाराहारी पर्न जान्छ । यो तथ्यका साथै इलेक्ट्रिक वाहनमा नेपाल सरकारले दिएको उल्लेखनीय भन्सार छुटलाई समेत आधार मान्ने हो भने चेतकको नेपाली बजार मूल्य साढे २ लाख देखि ३ लाख रुपैयाँको बीचमा कायम हुन सक्छ ।
नेपाल एग्रो लघुवित्तद्धारा दुई दिने कर्मचारीको तालिम सम्पन्न
काठमाडौं । नेपाल एग्रो लघुवित्त वित्तीय संस्थाले २ दिने कर्मचारी तालिम सम्पन्न गरेको छ । संस्थाले फिल्ड कर्मचारीहरुको क्षमता अभिवृद्धिका लागि पुस २७ र २८ गते पोखरामा उक्त कार्यक्रम सञ्चालन गरी सम्पन्न गरेको हो । तालिममा संस्थाका अध्यक्ष रमेश कुमार कर्माचार्यले कर्जा प्रवाह गर्दा समूह सदस्यहरुलाई दोहोरोपना नहुने गरी, उनीहरुको व्यवसाय र क्षमता अनुसार मात्रै कर्जा प्रवाह गर्नुपर्ने, कर्जाको सदुपयोग राम्ररी जाच गरी उनीहरुलाई सफल र उदाहरणीय कृषक बन्न प्रेरित गर्नुपर्ने, कृषकहरुलाई तालिम दिइने बताएका छन् । कार्यक्रममा प्रमुख कार्यकारी अधिकृत तेजेन्द्र शर्मा लम्सालबाट शाखाहरुले कार्यान्वयन गर्नुपर्ने नेपाल राष्ट्र बैंकबाट जारी निर्देशनको वारेमा र वचत कर्ता तथा ऋणीहरुको हितलाई ध्यनमा राखेर कार्य गर्नुपर्ने बताए । पछिल्लो समयमा अधिककर्जाको भारबाट सदस्यहरुलाई बचाउनुपर्ने अवस्था आएकोले नेपाल राष्ट्र बैंकको एकल कर्जा सिमा भन्दा बढि कर्जा प्रवाहन गर्न र नेपाल एग्रोले आक्रमक होइन रक्षात्मक रणनीति लिनुपर्ने पनि प्रमुख कार्यकारी अधिकृत लम्सालले बताए ।
राम्रो कम्पनी खोजेर लगानी गर्नुस्, सेयरबाटै दालभात खान पुग्छः अर्थमन्त्री
काठमाडौं । अर्थमन्त्री डा. युवराज खतिवडाले राम्रो कम्पनी खोजेर लगानी गर्न लगानीकर्तालाई सुझाव दिएका छन् । सेयर लगानीमा राम्रो कम्पनीमा लगानी गर्दा नोक्सान व्यहोर्नु नपर्ने भन्दै उनले कम्पनी छनोट नै सबैभन्दा महत्वपूर्ण कदम हुने वताएका हुन् । नेपाल स्टक एक्सचेन्ज (नेप्से) को २७औं वार्षिकोत्सव कार्यक्रमलाई सम्वोधन गर्दै मन्त्री खतिवडाले यस्तो वताएका हुन् । डा. खतिवडालाई सेयर बजारप्रति नकारात्मक व्यक्तिका रुपमा पनि व्याख्या गर्ने गरिन्छ । राम्रो कम्पनीमा लगानी गरे सो कम्पनीबाट प्राप्त हुने लाभांशले दालभात खान पुग्ने मन्त्री खतिवडाले बताए । यस्तै, मन्त्री खतिवडाले पछिल्लो समय सेयर बजारको संरचनात्मक परिवर्तन आएको पनि बताए । सेयर बजारमा भएका सुधारको व्याख्या गर्दै उनले अहिले तत्काल सेयर बाँडफाँड भएर प्रतिफल प्राप्त गर्न सकिने अवस्था आएको बताए । लगानीकर्ताले दोहोरो कर तिर्नु परिरहेको भनेर गुनासो गरिरहेको विषयमा भने उनले आगामी आर्थिक वर्षको बजेटबाट सो विषय सम्बोधन हुने दाबी गरे । यस्तै, धितोपत्र वोर्डका निवर्तमान अध्यक्ष डा. रेवतबहादुर कार्कीले अर्काे स्टक एक्सचेन्ज ल्याउने सार्वजनिक अभिव्यक्ति नै दिएका भएपनि अर्काे स्टक एक्सचेन्ज नआउने अर्थमन्त्री खतिवडाको भनाइ छ । यस्तै, सेयर बजारमा सरकारले हस्तक्षेप नगर्ने प्रतिवद्धता मन्त्री खतिवडाले दोहोर्याए । नेप्सेका प्रमुख कार्यकारी अधिकृत चन्द्रसिंह साउदले ऋणपत्र कारोबार सुरु भएको जानकारी दिँदै सरकारी ऋणपत्रको कारोबार सूचीकृत गर्न पनि आग्रह गरे । सेयर ब्रोकर संघका अध्यक्ष भरत रानाभाटले नीतिगत सुधार आवश्य रहेको भन्दै अनलाइन मार्फत सेयर बजारको कर तिर्ने व्यवस्था मिलाउन आग्रह गरे । उनले आफुहरु अन्तराष्ट्रियस्तरको ब्रोकर बन्न तयार रहेको बताए ।
सहकार्यसँग मर्ज हुन लागेकाे उन्नतिको ३८ प्रतिशत बोनस पारित, चुक्ता पुँजी १५ करोड पुग्ने
काठमाडौं । उन्नति लघुवित्त वित्तीय संस्था लिमिटेडको ३८.६० प्रतिशत बोनस शेयर पारित भएको छ । संस्थाको पाँचौं बार्षिक साधारण सभाले सञ्चालक समितिको उक्त प्रस्तावलाई पारित गरेको हो । यससँगै, ८ करोड ८२ लाख रुपैयाँ रहेको संस्थाको चुक्ता पुँजी १२ करोड २३ लाख रुपैयाँ पुगेको छ । साथै, सभामा सहकार्य लघुवित्त वित्तीय संस्थासँग मर्जर सम्बन्धि छलफल भएको छ । यी दुई संस्था मर्ज पश्चात शेयर आदानप्रदान अनुपात सहकार्य लघुवित्त वित्तीय संस्थाको १०० कित्ता सेयरलाई ७५ कित्ता प्रदान गर्ने सभाले जनाएको छ । त्यसपश्चात संस्थाको चुक्ता पुँजी १४ करोड ९५ लाख रुपैयाँ कायम हुने संस्थाले जनाएको छ । साथै, दुबै वित्तीय संस्था गाभिएपछि कायम चुक्ता पुँजीको १ः१ अनुपात हकप्रद सेयर जारी गर्ने प्रस्तावलाई सभाले पारित गरेको छ । उक्त हकप्रद शेयर पश्चात संस्थाको चुक्ता पुँजी २९ करोड ९० लाख रुपैयाँ पुग्ने छ । त्यसैगरी, मर्ज पश्चात संस्थाको सेयर स्वामित्व अनुपात ७५.४५ प्रतिशत (संस्थापक) र २४.५५ प्रतिशत (सर्वसाधारण) रहने सभाले जानकारी दिएको छ । हाल ३९ वटा शाखा कार्यालयहरुबाट सेवा प्रवाह गरेको संस्थाको मर्ज पश्चात बन्ने उन्नति सहकार्य लघुवित्त वित्तीय संस्था लिमिटेडको चुक्ता पुँजी १४ करोड ९५ लाख रुपैयाँ पुग्ने छ । साथै, कर्जा लगानी दुई अर्ब रुपैयाँ भन्दा बढी र निक्षेप संकलन ७५ करोड रुपैयाँ पुग्ने संस्थाले जानकारी दिएको छ ।
टेलिकम साधारणसभामा सेयरधनीः कसैलाई कर धेरै तिरेकोमा गर्व, कसैलाई पैसा घटेको म्यासेज नआएकोमा चिन्ता
काठमाडौं । नेपाल दूरसंचार कम्पनी (नेपाल टेलिकम) ले सेयरधनीलाई प्रतिकित्ता ४५ रुपैयाँको दरले नगद लाभांश दिने भएको छ । कम्पनीको आर्थिक वर्ष २०७५/७६ को वार्षिक साधारणसभाले नगद लाभांश दिने प्रस्ताव पारित गरेको हो । साधारणसभामा बोल्दै सेयरधनीहरुले विभिन्न सुझाव दिएका छन् । यस्ता सुझावमध्ये केही सेयरधनीले कम्पनीको लाभांश घट्दै गएकोमा चिन्ता व्यक्त गरे । टेलिकमले गत वर्ष प्रतिकित्ता ५५ रुपैयाँ नगद लाभांश दिएको थियो । यस्तै, केही सेयरधनीले देशकै सबैभन्दा ठूलो करदाताको रुपमा आफ्नो पहिचान बनाएकोमा कम्पनीलाई धन्यवाद दिए । केही सेयरधनीले भने कम्पनीको मोबाइल सेवामा कुरा गरिसकेपछि पैसा घटेको जानकारी आउने प्रणाली थप गर्नुपर्ने सुझाव दिएका थिए । सेयरधनी सुभाष साहले टेलिकममा विचार र अभ्यासको तालमेल हुँदै आएको वताए । कम्पनीले अहिले प्रदान गरेको लाभांश कम भएकोले नाफा बृद्धिमा कम्पनीको ध्यान केन्द्रीत हुनुपर्ने उनको भनाई छ । सेयरधनी राजेन्द्र प्रसाद भट्टले टेलिकमले आफ्नो सेवाको गुणस्तर बृद्धिका लागि प्रणालीको विकासमा जोड दिनुपर्ने वताए । प्रतिस्पर्धी अन्य कम्पनीको सेवाको गुणस्तर निकै बढिसकेको भन्दै उनले प्रतिस्पर्धामा उत्रन पनि टेलिकमले आफ्नो सेवाको गुणस्तर बढाउनु पर्ने धारणा राखे । सेयरधनी बैजनाथ रौनियारले टेलिकमको मोबाइल सेवा प्रयोग गरेर फोन गरिसकेपछि कुराकानी भएको अवधि र त्यसमा भएको खर्चको जानकारी पाइने प्रणाली थप गर्नुपर्ने सुझाव दिए । रौनियार पेशाले इञ्जिनियर पनि हुन् । सेयरधनी खड्गबहादुर बस्नेतले टेलिकमले सरकारको राजस्वमा पुर्याएको योगदान गर्व गर्न लायक भएको धारणा राखे । यस्तै, डा. दामोद प्रसाद रेग्मीले टेलिकमले आफ्नो नतिजालाई ध्यानमा राखेर सेयरधनीको समस्या बुझ्दै आएको बताए । अर्का सेयरधनी भक्तिप्रसाद उप्रेतीले कर मार्फत राज्यलाई योगदान पुर्याउने टेलिकमले आफ्नो व्यवस्थापनलाई थप समृद्ध बनाउँदै लगेमा सबैको भलो हुने विचार व्यक्त गरे । कुनै समय जनकपूर चुरोट कारखानाले सबैभन्दा धेरै कर तिर्ने गरेको भएपनि अहिले सो कम्पनीको अस्तित्व नै नरहेको उदाहरण दिदै उप्रेतीले टेलिकमको अवस्था यस्तो नआओस् भन्ने सुझाव दिए । टेलिकमका प्रबन्ध निर्देशक डिल्लीराम अधिकारीले लगानीकर्ताहरुको सुझाव अनुसार नै नीति निर्माण गरी अघि बढ्ने प्रतिवद्धता व्यक्त गरे । टेलिकमका सरकारको ९१.४९ प्रतिशत, सर्वसाधारणको ८.४८ र नागरिक लगानी कोषको ०.०३ प्रतिशत सेयर लगानी छ । साधारणसभामा करिब ९२ प्रतिशत सेयरधनीहरुको उपस्थिति रहेको टेलिकमले जानकारी दिएको छ । सभाले आर्थिक वर्ष २०७५÷७६ को लागि सञ्चालक समितिको प्रतिवेदन र लेखापरीक्षकको प्रतिवेदनसहितको २०७६ आषाढ मसान्तको वासलात तथा सोही मितिमा समाप्त हुने आर्थिक वर्ष २०७५÷७६ को नाफा नोक्सान हिसाब तथा सोही अवधिको नगद प्रवाह विवरणलाई छलफल गरी सर्वसम्मतले पारित गरेको छ । सभाले महालेखा परीक्षकको कार्यालयको परामर्श तथा लेखापरीक्षण समितिको सिफारिस बमोजिम आव २०७६÷७७ को लागि कम्पनीको लेखा परीक्षण गर्न चार्टर्ड एकाउण्टेण्ट प्रकाशजंग थापा र अच्युतराज जोशीलाई लेखापरीक्षक नियुक्त गर्नुका साथै उनीहरुको पारिश्रमिक समेत पारित गरेको छ । कम्पनीको सञ्चालक समितिका अध्यक्ष एवम् सञ्चार तथा सूचना प्रविधि मन्त्रालयका सचिव दीपक सुवेदीले सेयरधनीहरूको लगानीको प्रतिफल सुनिश्चित हुनेगरी कम्पनीको दीर्घकालीन विकास तथा समृद्धिको लागि सञ्चालक समिति क्रियाशील रही आएको तथा कम्पनीलाई सबल, अग्रणी संस्थाको रुपमा विकास गर्ने प्रतिबद्धता व्यक्त गरे । देशको विकट तथा ग्रामीण क्षेत्रहरूमा समेत सञ्चार तथा सूचना प्रविधि उपलब्ध गराई देशमा व्याप्त डिजिटल डिभाइड न्यूनीकरण गर्ने र डिजिटल इन्क्लुजनको अवधारणालाई साकार पार्ने सिलसिलामा कम्पनीको योगदान महत्वपूर्ण रहेको बताउदै अध्यक्ष सुवेदीले देशव्यापी रुपमा आवश्यक पूर्वाधार विकासमा कम्पनीले विशेष ध्यान दिएको बताए । कम्पनीले जिम्मेवार राष्ट्रिय निकायको रुपमा सामाजिक उत्तरदायित्वका कार्यहरु र संस्थागत सुशासन तथा जोखिम व्यवस्थापनका लागि गरेका कार्यको समेत जानकारी दिए । कम्पनीले आर्थिक वर्ष २०७५÷७६ मा कर तथा गैरकरवापत सरकारी राजस्वमा ३३ अर्ब ३१ करोड रुपैयाँ दाखिला गरेको सुवेदीको भनाइ छ । अध्यक्ष सुवेदीले कम्पनीको भ्वाइस र डाटा सेवाको बजार हिस्सा क्रमशः ३.९३ र ४.७५ प्रतिशतले वृद्धि भई ५४.८३ र ४८.४१ प्रतिशत पुगेको जानकारी दिए । गुणस्तरीय सेवा तथा सेवाको सहज उपलब्धतामार्फत आफ्नो बजार हिस्सालाई मजबुत गर्न तथा व्यावसायिक उद्देश्य हासिल गर्न कम्पनी निरन्तर सेवाको संख्यात्मक विस्तार र गुणात्मक सुधार गर्न प्रतिबद्ध रहेको उनको भनाइ छ । प्रविधिको तीब्र विकास भएसँगै विश्वव्यापी रुपमा भ्वाइस सेवाको व्यापारमा शिथिलता आई भ्वाइसको व्यापार क्रमिकरुपमा डाटा तथा अन्य भ्यालु एडेड सेवामा स्थानान्तरण हुने क्रम जारी रहेको उनको भनाइ छ । तीब्र प्रतिस्पर्धाको कारणले भ्वाइस तथा डाटा सेवाको महशुलमा व्यापक कटौतीका बाबजुद कम्पनीले कुल राजस्व र नाफा क्रमशः ४३ अर्ब ८४ करोड रुपैयाँ र ९ अर्ब ७६ करोड रुपैयाँ कायम गर्न सफल भएको अध्यक्ष सुवेदीले जानकारी दिए । विभिन्न कारणले कम्पनीको नाफा घट्न गएको दृष्टान्त पेश गर्दै उनले वायरलेस प्रविधिको फोरजीलाई फोरजी एलटीई मोबाइल सेवाको विस्तार, एउटै लाइनबाट गुणस्तरीय टेलिफोन, तीब्र गतिको इन्टरनेट र टेलिभिजनसमेत चलाउन सकिने एफटीटीएच प्रविधिको विस्तार, डाटाको मागलाई बढाउने भ्यालु एडेड सेवाहरूको विस्तारका साथै अन्तर्राष्ट्रिय रोमिङ सेवाको विस्तार र सेवाहरूको गुणस्तर सुधारलगायतका कार्यहरूमा कम्पनीले थप तीब्रता दिएकोले चालू आर्थिक वर्षदेखि कम्पनीको राजस्व वृद्धि अध्यक्ष सुवेदीको भनाइ छ । सभाले पारित गरेबमोजिमको लाभांश रकम १ माघदेखि एनएमबी बैंकमार्फत सेयरधनीहरुलाई वितरण गर्ने ब्यवस्था गरिएको कम्पनीले जानकारी दिएको छ ।
चेम्बरका पदाधिकारीले भेटे राष्ट्रपतिलाई, एकिकृत कर प्रणाली लागू गर्न माग
काठमाडौं । नेपाल चेम्बर अफ कमर्सको ६९ औ वार्षिक साधारण सभा, चेम्बर दिवस २०७६ तथा ७० वर्ष प्रवेशको अवसरमा आयोजित कार्यक्रममा चेम्बरका पदाधिकारीहरुले राष्ट्रपति बिद्यादेवी भण्डारीसँग भेटघाट गरेका छन् । भेटघाटमा चेम्बरका पदाधिकारीहरुले व्यवसाय संचालन खर्च बढी रहेको बारे व्यक्त गर्दै संघीय प्रणाली पश्चात करको दरमा एक रुपता नभएकोले एकिकृत कर प्रणाली लागू गरिनु पर्नेमा जोड दिएका छन् । सहभागी हुन विभिन्न जिल्ला तथा नगरबाट आएका जिल्ला तथा नगर चेम्बरका सभापति तथा पदाधिकारीहरु तथा नेपाल चेम्बर अफ कमर्सका पदाधिकारी तथा कार्यसमिति सदस्यहरुबाट मंगलबार राष्ट्रपति भण्डारीसँग भेटघाट गरेका हुन्। भेटघाटमा नेपालको व्यवसायीक क्षेत्रका विविध पक्षहरु वारे नेपाल चेम्वर अफ कमर्सका अध्यक्ष राजेशकाजी श्रेष्ठले प्रस्तुत गरे । चेम्बरले ७० वर्षको अवधिमा निजी क्षेत्रको सशक्तिकरणको लागि चेम्वरले निर्वाह गरेको भूमिका बारे चर्चा गर्दै चेम्बरको संरचना तथा अन्तर्राष्ट्रिय व्यावसायीक सम्वन्ध र त्यसबाट मुलुकले प्राप्त गरेको लगानी तथा व्यापारको लागि भएको योगदान बारे पनि प्रष्ट पारेका थिए । श्रेष्ठले नेपाल भ्रमण वर्ष २०२० लाई सफल पार्न जिल्ला स्तर तथा नगर स्तरबाट समेत चेम्बरको तर्फबाट सक्दो भूमिका निर्वाह गर्ने प्रतिवद्धता व्यक्त गर्दै पर्यटन क्षेत्रका केही चुनौतिबारे पनि प्रकाश पारेका थिए । अध्यक्ष श्रेष्ठले व्यवसाय संचालन खर्च बढि रहेको बारे व्यक्त गर्दै संघीय प्रणाली पश्चात करको दरमा एक रुपता नभएकोले एकिकृत कर प्रणाली लागू गरिनु पर्नेमा जोड दिए । उक्त अवसरमा राष्ट्रपतिले उपस्थित पदाधिकारी तथा सदस्यहरुलाई स्वागत गर्दै चेम्बरका अध्यक्ष श्रेष्ठले प्रस्तुत गरेको अभिव्यक्तिले नेपालको अर्थतन्त्र तर्फ गइरहेको छ भन्ने बारे यसका अन्तर्निहीत समस्याबारे बुझ्ने अवसर प्राप्त भएकोले यसलाइ सकारात्मक रुपमा लिएको बताए । उनले समृद्ध नेपाल तथा सुखी नेपालीको सपना साकार पार्न वर्तमान सरकारको प्रयासलाई सघाउन आग्रह गरिन् । साथै, आधारित अर्थतन्त्रको विकाश गर्न र स्वाधीन अर्थतन्त्र निर्माणको दिशा तर्फ उन्मुख हुन सरकारको प्रयासलाई सहयोग गर्न उनले आब्हान गरेकी छिन् । विभिन्न जिल्ला तथा नगरबाट आएका जिल्ला तथा नगर चेम्वरका सभापति तथा पदाधिकारीहरु तथा नेपाल चेम्बर अफ कमर्सका पदाधिकारीहरुको उपस्थित रहेको थिए ।