विकासन्युज

कर्जा लगानीमा आक्रामक बन्दै इन्भेष्टमेन्ट बैंक, ९.९९ प्रतिशत व्याजमा एसएमई कर्जा

काठमाडौं । नेपाल इन्भेष्टमेन्ट बैंक कर्जा लगानीमा आक्रामक बन्दै गएको छ । रिकरिङ फिक्स्ड डिपोजिट र ग्रीन डबल फिक्स्ड डिपोजिट योजना सञ्चालनमा ल्याइसकेको बैंकले साना तथा मझौला उद्यमी (एसएमई) कर्जा योजना ल्याएको छ । बैंकले देशका उद्यमीहरूलाई उत्थान गर्ने उद्देश्यले एक वर्षका लागि निश्चित ९.९९ प्रतिशत ब्याजदरको एसएमई कर्जा ल्याएको हो । स्थानीय स्तरमा रोजगारी सिर्जनाका साथै मुलुकमा उद्यमशीलता बढाएर देशको आर्थिक मापदण्डमा सकारात्मक परिवर्तन ल्याउन प्रत्यक्ष योगदान पुर्याउने एसएमई कर्जाको उद्देश्य रहेको बैंकले जनाएको छ । यसका साथै बैंकले एक वर्षका लागि निश्चित वार्षिक १०.५० प्रतिशतको ब्याजदरमा उत्पादनशील कृषि क्षेत्रमा प्रदान गर्ने गरी कर्जा योजना पनि बैंकले अघि सारेको छ । बैंकले देशको विद्यमान कृषि क्षेत्रको आधारलाई सहयोग गर्ने तथा वर्तमान आर्थिक परिप्रेक्षमा यसलाई प्रबद्र्धन र आधुनिकीकरण गर्नमा केन्द्रीत हुँदै उक्त योजना बजारमा ल्याएको हो । यसअघि बैंकले ९.२५ प्रतिशत ब्याजदर सहितको क्रमिक मुद्दती निक्षेप (रिकरिङ फिक्स्ड डिपोजिट) सञ्चालनमा ल्याएको थियो । जसमा ग्राहकहरूले न्युनमत ३३ महिने अवधिका लागि न्युनतम ३३३ रुपैयाँ क्रमिक निक्षेप जम्मा गरेर उच्च ब्याजदर पाइरहेका छन् । यस बाहेक अंग्रेजी नयाँ वर्षका अवसरमा बैंकले हरित पहल अभियान अन्तर्गत ग्रीन डबल फिक्स्ड डिपोजिट (जीडीएफडी) ल्याएको थियो । यस योजनाबाट संकलन गरिएका निक्षेपहरू दिगो, वातावरणमैत्री हरित परियोजनाहरूमा लगानी गरिने बैंकले बताएको । सो योजनाअन्तर्गत दिगो भविष्य सुनिश्चित हुनुका साथसाथै व्यक्तिको निक्षेप पनि ७.५ वर्षमा दोब्बर हुन्छ । यो योजना अन्तर्गत संकलन गरिएको निक्षेप इको-लोन मार्फत हरित परियोजनाहरूमा लगानी गरिन्छ, जसमा एक वर्षका लागि निश्चित वार्षिक १०.५० ब्याजदर कायम गरिएको बैंकले बताएको छ ।

चौथो प्राङ्गारिक कृषि मेला समापन, व्यवसायी भन्छन्- ‘सोचे जस्तो व्यापार भएन्’

काठमाडौं । माघ १७ गतेदेखि ललितपुरको पाटन संग्रहालयमा भएको चौथो प्राङ्गारिक कृषि मेला समापन भएको छ । अर्गानिक एशोसियसनको नेपाल र कञ्चनजङ्घा टी इस्टेट एण्ड रिसर्च सेन्टरको संयुक्त रुपमा आयोजना भएको उक्त मेलामा लक्ष्य अनुसारको व्यापार नभएको आयोजकले जानकारी दिए । अर्गानिक एसोसियसनका अध्यक्ष दीपकप्रकाश बास्कोटाले यस वर्षको मेला पाटन संग्रहालय भित्र कला, सांस्कृतिलाई ध्यानमा राखेर मेला आयोजना गरेको बताएका छन् । विदेशी पर्यटकको आर्कषक केन्द्रविन्दुको रुपमा रहेको पाटन दरबार क्षेत्रलाई ध्यानमा राखेर संग्रहालयभित्र यस वर्षको मेला राख्दा अन्तर्राष्ट्रिय बजारमा नेपाली उत्पादन पुराउन सक्ने सकारात्मक प्रभाव देखिएको अध्यक्ष बास्कोटाको भनाई छ । मेलामा खासै व्यापार नभएको गुनासो नआएको भने होइन । इलामका यमबहादुर राई भन्छन् ‘नेपालीहरुले अर्गानिक सामान नै नचिनेकोले हो कि, ४ दिनमा जम्मा १२ हजारको चिया विक्री भयो ।’ तीन पुस्तादेखि चिया खेती गर्दै आएका राईले भने नेपाली समाजमा अझै पनि अर्गानिक वस्तुको महत्व नबुझेको जानकारी दिँदै विदेशमा भने निर्यातको अवस्था राम्रो रहेको बताए । यस वर्ष स्टल भाडा समेत नउठेको स्तुती खाद्य प्रोडक्टको संचालक सुजिता पौडेलले बताईन् । मेलामा अर्गानिक तथा प्राकृतिक उत्पादनका चिया, कफी, अचार, जुस, तरकारी, प्राङ्गारिक मल, च्याउ, डेरी, फलफुल, मसला, चामल, गहु, मकै, दाल, फापर, बीउ, तेल, राडीपाखी लगाएत करिब ५० बढी स्टलहरु  रहेका थिए । मेला समापन गर्दै मेला व्यवस्थापन समिति संयोजक शान्ता बाँस्कोटाले मेला समापन गर्दै कति काराेबार भयाे भन्ने तथ्यांक संकलन हुन बाँकी रहेकाे बताइन् ।

१० कित्ते नीति मलाई मन परिरहेको छैन, अध्ययन गरेर निर्णय गर्छाैंः बोर्डका अध्यक्ष ढुंगाना

काठमाडौं । धितोपत्र बोर्डका अध्यक्ष भीष्मराज ढुंगानाले सेयर भर्ने सबैलाई सेयर दिने नीतिमा पुनर्विचार गर्ने बताएका छन् । सबैलाई सेयर दिने नीति कार्यान्वयन गर्दा लगानीकर्ताको लागत नै नउठ्ने अवस्था रहेकोले पुनर्विचार आवश्यक रहेको बताएका हुन् । बोर्डले केही वर्ष अगाडिदेखि सेयर भर्ने जति सबैले कम्तिमा १० कित्ता सेयर पाउने नीतिगत व्यवस्था कार्यान्वयन गरिरहेको छ । बोर्ड अध्यक्ष भएको एक महिना पनि नवित्दै अध्यक्ष ढुंगानाले सो नीतिको प्रभावकारिता माथि अध्ययन गर्न लागेका हुन्। ‘सबै नीति र कार्यक्रमहरु समय सापेक्ष हुन्छन्, पर्याप्त मात्रामा साधन नभएका, केही सिकाउनु पर्ने र बानी पार्नको लागि त्यस्ता व्यक्तिका लागि १० कित्ता सेयर दिने नीति ठिकै हो तर कोही मान्छे लगानीकर्ताको रुपमा बजारमा आउँछ भने उसलाई १० कित्ता दिनु ठीक होइन,’ अध्यक्ष ढुंगानाले विकासन्युजसँग भने । १० कित्ता सेयर किनेपछि पनि डिम्याट गराउनु पर्ने भएकोले त्यसमा पर्ने लागत, डिम्याट खाता त्यसै हेर्न नमिल्ने भएकोले इन्टरनेट चलाउनु पर्ने, डिभिडेन्ट खातामा जम्मा गर्दाको शुल्क तथा सो सेयर बिक्री गर्दा लाग्ने खर्च जस्ता कारणले यो नीति त्यति ठीक नदेखिएको उनको भनाइ छ । ‘स्थानीय जनतालाई १० कित्ता दिनै पर्ने नीति ठिक हो, लगानीकर्ताको लागि ठीक होइन, यसलाई हामीले समय सापेक्ष रुपमा परिवर्तन गर्नुपर्छ, यसको लागि एक पटक अध्ययन गरेर हेरौं के कस्तो असर परेको पाइदो रहेछ, मलाई व्यक्तिगत रुपमा भने ठीक लागिरहेको छैन,’ अध्यक्ष ढुंगानाले थपे ।

मुक्तिनाथ विकास बैंकले धादिङ्गबाट शुरु गर्यो वित्तीय जागरण अभियान, अरू जिल्लामा पनि गर्ने

काठमाडौं । मुक्तिनाथ विकास बैंकले माघ १५ गतेबाट वित्तीय जागरण अभियान धादिङ्ग जिल्लाबाट शुरुवात गरेको छ । सो अन्तर्गत गल्छी गाँउपालिका, वडा नं ९, बैरेनी स्थित गाउँपालिका भवनमा सोही गाँउपालिका वडा नं ७, का अध्यक्ष हरि खतिवडाको आतिथ्यमा सम्पन्न भएको छ । त्यसैगरी, माघ १७ गते डिल्ली सावित्री माध्यमिक विद्यालय, धुनीवेशी ९ धार्केमा यस बैंकको धार्के शाखा अन्तर्गतका ग्राहक हरिप्रसाद लोहनीको सभापतित्वमा सम्पन्न भएको कार्यक्रममा डिल्ली सावित्री माध्यमिक विद्यालयका प्रधानाध्यापक घनश्याम अधिकारी प्रमुख अतिथि र अतिथिमा सोही विद्यालयका शिक्षक नरेन्द्रप्रसाद रिजाल रहेका थिए । उपरोक्त दुवै कार्यक्रममा वित्तीय कारोबार बारे चेतना जगाउने, लघुवित्त कार्यक्रममा केन्द्रको व्यवस्थापन, अधिक र अनुत्पादक कर्जा लिँदाका बेफाइदाहरु, उपयुक्त व्यवसाय छनौट, व्यवसायीक योजना, सफल उद्यमीका विशेषताहरु, बचत, कर्जा, बैंक तथा वित्तीय संस्थाहरुको प्रकार लगायतको विषयमा वित्तीय चेतनाको अभिबृद्धि गराउने यस कार्यक्रमको मुख्य उद्देश्य रहेको थियो । कार्यक्रममा १७० जना ग्राहकहरुको सहभागीता रहेको थियो । उक्त कार्यक्रममा बैंकसँग कारोवार गर्ने उत्कृष्ट ग्राहकहरु तथा उत्कृष्ट केन्द्रहरुलाई पुरस्कार तथा प्रमाण पत्र वितरण गरिएको थियो । मुक्तिनाथ विकास बैंकले “आजकोे आवश्यकता, सबैमा वित्तीय साक्षरता” भन्ने आसय सहित समुदाय र विद्यालय स्तरीय वित्तीय साक्षरता कार्यक्रम सँगसँगै वित्तीय जागरण कार्यक्रमलाई समेत अभियानकै रुपमा अन्य जिल्लाहरुमा पनि सञ्चालन गर्ने योजना बनाएको छ । बैंकले हाल ४२ जिल्लामा १३४ वटा शाखाहरु मार्फत ग्राहकका आवश्यकता बमोजिमका सबै प्रकारका बचत निक्षेप तथा कर्जा सेवाहरु प्रदान गर्दै आई रहेको छ । साथै, प्रविधिमा आधारित रही मोबार्ईल बैंकिङ्ग, क्यूआर पेमेन्ट, एटीएम, अनलाईन बैंकिङ्ग लगायतका सेवाहरु पनि प्रदान गर्दै आईरहेको बैंकले जनाएको छ ।

बार्सिलोनाको अफिसियल पेजमा प्रियंका कार्की, लेखियाे-‘वि लभ नेपाल’

काठमाडौं । बार्सिलोनाको अधिकारिक फेसबुक पेजले कलाकार नायिका प्रियंका कार्कीको तस्विर  पोष्ट गरेकाे छ । बार्सिलोनाको अधिकारिक फेसबुक पेजले सोमबार ‘वि लभ नेपाल’ भन्दै कलाकार प्रियंका कार्कीको तस्विर पोष्ट गरेकाे हाे । कार्की आईतबार ब्वाईफ्रेण्ड आयुसमान देशराज जोशी र अन्तर्राष्ट्रिय युटुबर गबी गर्सियासँग गेम हेर्न बार्सिलोनाको होम स्टेडियम क्याम्प नोउ पुगेकी थिईन् । बार्सिलोना वा बार्साको नामले चिनिने यो क्लब स्पेनको एक व्यावसायिक फुटबल क्लब हो, जुन स्पेनको बार्सिलोनामा अवस्थित छ । यसको पुरा नाम एफसी बार्सिलोना अर्थात फुटबल क्लब बार्सिलोना हो ।

बैदेशिक रोजगारीमा महिलाः जागिर घरेलु कामदार, देश खाडीदेखि युरोपसम्म

काठमाडौं । वैदेशिक रोजगारीमा जाने महिलाको संख्या बढ्दै गएको छ । हालसम्म १ लाख ९ हजार १ सय ९९ जना महिलाहरु संस्थागत प्रणाली हुनै वैदेशिक रोजगारीमा गएका हुन् । बेरोजगारीले सिर्जना गरेको समस्या तथा घरको आर्थिक अवस्थालाई मध्यनजर गर्दै महिलाहरुले पनि देश छोड्ने क्रममा बढदै गएको छ । नेपालमा रोजगारीको अवसर नपाएसँगै वैदेशिक रोजगारमा जाने महिलाको उल्लेख्य स्वरुप बढेको छ । वैदेशिक रोजगारीमा जानेको संख्या हेर्दा अधिकांश तराईका जिल्ला तथा प्रदेश २ का महिलाको बाहुल्यता छ । त्यस्तै बागमती प्रदेशको पहाडी जिल्लाका महिलाको बाहुल्यता भएसँगै मिश्रित समुदायको बसाई भएका तराईका जिल्ला बाहेक पनि बढ्दो छ । मुख्यतः काठमाडौं, नुवाकोट, सिन्धुपाल्चोक, चितवन लगायतका जिल्लाबाट महिला बाहिरिने क्रम बढेको छ । पछिल्लो समय व्यक्तिगत प्रयासले नै वैदेशिक रोजगार महिलाको गन्तव्यको संख्या बढ्दै गएको छ । कुवेतमा सबैभन्दा धेरै महिला जाने गर्छन् भने त्यसपछि महिलाको गन्तव्य मुलुकको रुपमा जर्मनी स्थापित भएको छ । वैदेशिक रोजगारमा जाने अधिकांश महिलाहरु झापा र सिन्धुपाल्चोक, काठमाडौं, मकवानपुर, मोरङ्ग, नुवाकोटका छन् । कुवेतमा २९ हजार ४ सय ६२ नेपाली महिला काम गरिरहेका छन् । ५ हजार १ सय ५१ संस्थागत र व्यक्तिगततर्फ २४ हजार ३ सय ११ जना रहेका छन् । हाल माल्दिभ्स जाने नेपाली महिलाको संख्या ५ हजार ४ सय ९५ जना रहेका छन् । त्यस्तै जर्मनी २ हजार १ सय ६३ जना गएका छन्, भने नेपाली श्रमिकको अर्काे गन्तव्य माल्टामा १ हजार ७ सय ८० जना नेपाली महिला काम गरिरहेका छन् । त्यस्तै, डेनमार्कमा १ सय ६५, टर्की २ सय ३०, इजरायलमा ८६, इजिप्टमा १ सय ५२, लेबनानमा ६८, स्वीडेनमा ४२ नेपाली महिला श्रमिक रहेको वैदेशिक रोजगार विभागले जानकारी दिएको छ । अधिकांश महिलाहरु घरेलु कामका लागि रोजगारीमा जाने गरेका छन् । वैदेशिक रोजगारीमा पछिल्लो समय व्यक्तिगत माध्यमद्धारा जानेको संख्या पनि बढ्दै गएको विभागले जनाएको छ ।

डिप्रोक्स लघुवित्तको सीईओमा शेषरमण आचार्य

काठमाडौं । डिप्रोक्स लघुवित्त वित्तीय संस्थाको प्रमखु कार्यकारी अधिकृत(सीईओ)मा शेषरमण आचार्य नियुक्त भएका छन् । माघ १९ गते बसेको सञ्चालक समितिको बैठकले आचार्यलाई संस्थाको सीईओ पदमा नियुक्त गरेको हो । बैठकले आचार्यलाई माघ २० गतेदेखि लागू हुने गरी उनलाई सीईओमा नियुक्त गरेको हो । नवनियुक्त सीईओ आचार्यले आगामी चार वर्षसम्म उक्त पदको कार्यभार सम्हाल्ने छन् ।

सेयर बजार बढ्ने क्रम जारी, नेको इन्स्योरेन्स र ग्लोबल आईएमई बैंकको बढी कारोबार

काठमाडौं । सेयर बजार बढ्ने क्रमले निरन्तरता पाएको छ । सोमबारको बजारमा नेप्से परिसूचक २.४९ अंकले बढेर १३४९.१३ अंकमा पुगेको छ । जुन अघिल्लो दिनको तुलनामा ०.१८ प्रतिशतले बढी हो । त्यस्तै, ‘क’ वर्गको कारोबार मापन गर्ने सेन्सेटिभ इन्डेक्स पनि १.१६ अंकले बढेर २८७.९१ अंकमा पुगेको छ । दिनभरको बजारमा १७७ कम्पनीको एक अर्ब ६१ करोडको सेयर कारोबार भएको छ । नेको इन्स्योरेन्स र ग्लोबल आईएमई बैंकको ५ करोड रुपैयाँभन्दा बढीको सेयर कारोबार भएको छ । जसमध्ये नेको इन्स्योरेन्सको सबैभन्दा बढी कारोबार भएको छ । कम्पनीको ६ करोड ५६ लाख रुपैयाँ बराबरको सेयर कारोबार भएको छ । त्यस्तै, ग्लोबल आईएमई बैंकको ५ करोड रुपैयाँ एक लाख रुपैयाँ बराबरकोे सेयर किनबेच भएको छ । सोमबार तीन कम्पनीका लगानीकर्ताले ९ प्रतिशत बढी कमाएका छन् । सबैभन्दा बढी गरिमा विकास बैंकको सेयर मूल्य ९.३६ प्रतिशतले बढेको छ । त्यस्तै, नेशनल हाइड्रो पावर कम्पनी र छ्याङ्दी हाइड्रोपावर कम्पनीको सेयर मूल्य क्रमशः ९.२६ र ९.०९ प्रतिशतले बढेको छ । सोमबार निर्जीवन बीमा समूह ५९, हाइड्रोपावर ४८ र विकास बैंक ३० अंकले उकालो लागेका छन् । सबैभन्दा बढी जीवन बीमा समूह ४२ अंक र होटल समूह १७ अंकले ओरालो लागेका छन् । मल्टीपर्पोज फाइनान्सका लगानीकर्ताले सबैभन्दा ३.९२ प्रतिशत गुमाएका छन् ।