बजेट आज सार्वजनिक हुँदै
काठमाडौं । सङ्घीय संसदका दुवै सदनको संयुक्त बैठकमा आज उपप्रधानमन्त्री तथा अर्थमन्त्री विष्णुप्रसाद पौडेलले आर्थिक वर्ष २०८१/८२ को राजस्व र व्ययको वार्षिक अनुमान (बजेट) पेस गर्ने कार्यसूची छ । अपरान्ह ३ बजे हुने बैठकमा नेपालको संविधानको धारा ११९ बमोजिम अर्थमन्त्री आव २०८१/८२ को राजस्व र व्ययको वार्षिक अनुमान पेस गर्ने कार्यसूची रहेको सङ्घीय संसदका महासचिव पदम प्रसाद पाण्डेयले जानकारी दिए । संसद् सचिवालयले दुवै सदनका सदस्यलाई दिउँसो २ः४५ बजे अगाडि नै प्रतिनिधिसभा बैठक कक्षमा उपस्थित हुन आग्रह गरेको छ । त्यसअघि प्रतिनिधिसभाको अपरान्ह १ः३० हुने बैठकमा सभामुख देवराज घिमिरेले प्रधानमन्त्री तथा मन्त्रिपरिषद्को कार्यालयबाट प्राप्त कार्यभार थपसम्बन्धी पत्रको बेहोरा वाचन गर्ने तथा अर्थमन्त्री पौडेलले आर्थिक वर्ष २०८२/८३ आर्थिक सर्वेक्षण पेस गर्ने कार्यसूची छ । त्यसैगरी राष्ट्रिय सभाको अपरान्ह १ः४५ मा हुने बैठकमा अर्थमन्त्री पौडेलले ‘आव २०८२/८३ को आर्थिक सर्वेक्षण’ सभा समक्ष पेस गर्ने सम्भावित कार्यतालिका सार्वजनिक गरेको छ ।
पत्रकारसँग गृहमन्त्रीले मागे न्याय
काठमाडौं । गृहमन्त्री रमेश लेखकले राजीनामा नदिने प्रष्ट पार्दै आफूले पनि न्याय पाउनु पर्ने बताएका छन् । भिजिट भिसा प्रकरणमा मुछिएका गृहमन्त्री लेखकले पत्रकार सम्मेलन गर्दै पदबाट राजीनामा नदिने र आफूले पनि न्याय पाउनुपर्ने माग गरे । संविधानले अधिकार प्रदान गरेको निकायले राष्ट्र सेवक कर्मचारीमाथि अनुसन्धान गर्ने क्रममा अनुसन्धानले पूर्णता नपाई मन्त्रालयको नेतृत्वलाई जोडेर प्रचार प्रसार गरिनु राम्रो नभएको लेखकले बताए । ‘यदि पार्टीको एक कार्यकर्तामाथि अनुसन्धान भयो भने पार्टी अध्यक्ष वा सभापतिले राजीनामा गर्नुपर्ने ? सञ्चारमाध्यम वा सामाजिक सञ्जालमा कुरा उठ्ने बित्तिकै राजीनामा दिनुपर्यो भने स्थिति के हो ? कुनै विषय उठ्न सक्छ त्यसलाई गम्भीरता पूर्वक लिएर निष्कर्षमा पुग्नुपर्छ,’ उनले भने । उनका अनुसार विगतमा पनि विभिन्न विषयमा सञ्चार माध्यममा समाचार आएका र केहीले अख्तियारले अनुसन्धान गरी अभियोजन समेत गरेकाे अवस्था थियो । तर, त्यस्तो अवस्थामा नेतृत्वले पद त्याग गरेका छैनन् । ‘न्याय त मैले पनि पाउनुपर्ने होला नि । कि न्याय नपाउनुपर्ने नागरिक हो यो देशको ? मेरो विरुद्ध कुनै उजुरी छ ? कहीँ छानबिन भइरहेको छ ? तर, मैले न्याय त माग्न पाउनु पर्ला नि । यसरी राजनीतिक आग्रह र पूर्वाग्रह राखेर कर्मचारीसँग भइरहेको अनुसन्धानलाई राजनीतिक नेतृत्वसँग जोड्दै जाने हो भने कसरी यो सम्भव होला । मैले कसैमाथि दोषारोपण गरेको छैन,’ उनले भने । उनका अनुसार पछिल्लो तीन आर्थिक वर्षमा अख्तियारमा ६४ हजार ६१ वटा उजुरी दर्ता भएका छन् । सम्पूर्ण उजुरी कुनै न कुनै मन्त्रालय, विभाग वा कार्यालयका राष्ट्रसेवक कर्मचारी वा सार्वजनिक पद धारण गरेका पदाधिकारीमाथि रहेको उनले जानकारी दिए । गृहमन्त्री लेखकले भिजिट भिसा प्रकरणमा आफ्नो कुनै संलग्नता नरहेको दाबी गरे । आफू विरुद्ध नियोजित र षड्यन्त्र पूर्वक ढंगले आक्रमण गरिएको यो आक्रमण राजनीतिक पुर्वग्राहले प्रेरित भएको र यो क्रम जारी रहेको बताए । ‘सबैभन्दा पहिलो जसरी यो विषय मा मेरो संलग्नता देखाएर सामाजिक सञ्जालमार्फत धारणा भएका छन् । यो असत्य कुरा हो, यो बेठीक कुरा हो । यसमा मेरो कुनै संलग्नता छैन भन्ने कुरा निवेदन गर्न चाहन्छु,’ उनले भने । त्रिभुवन अन्तर्राष्ट्रिय विमानस्थलका प्रमुख सहसचिव तीर्थ राज भट्टराई २०७७ सालदेखि गृह मन्त्रालय मातहत रहेर काम गरिरहेको उनले बताए । आफूले गृहमन्त्रालयमा अन्तबाट सरुवा गरेर नल्याएको र तोकिएको जिम्मेवारीभन्दा अरूले धेरै जिम्मेवारी दिएका व्यक्ति रहेको उनको भनाइ छ । ‘उहाँ निरन्तर २०७७ सालेदेखि गृहमन्त्रालयमा काम गरिरहनुभएको छ । अत्यन्तै महत्वपूर्ण विभाग, राष्ट्रिय परिचयपत्र तथा पञ्जीकरण विभाग, उहाँ कसुरजन्य सम्पत्ति व्यवस्थापन विभागको महानिर्देशक भएर काम गरिरहनुभएको मान्छे कार्यालयको प्रमुख भएर जानुभएको हो,’ गृहमन्त्री लेखकले भने ।
करछली प्रकरणमा सुन्दर प्लाईउड इन्डष्ट्रिजविरुद्ध राजस्व अनुसन्धान विभागद्वारा मुद्दा दायर
काठमाडौं । राजस्व अनुसन्धान विभागले ठूलो परिमाणमा मूल्य कम देखाएर वस्तु आयात गरी कर छली गरेको आरोपमा रुपन्देहीस्थित सुन्दर प्लाईउड इन्डष्ट्रिज विरुद्ध उच्च अदालत, तुलसीपुर, बुटवल इजलासमा मुद्दा दायर गरेको छ । बुटवल भन्सार कार्यालयमार्फत भारतबाट ल्याइएको मालसामानको वास्तविक मूल्य लुकाएर भन्सार मूल्य कम देखाई कर छली गरिएको पाइएको विभागले जनाएको छ । कम्पनीका प्रोप्राइटर अशोक अग्रवालले गोप्य बैंक खाताको प्रयोग र कागजातमा हेरफेर गरी नियोजित रूपमा फर्जी कारोबार मार्फत कर छली गरेको प्रमाणसहित कारवाही प्रक्रिया अगाडि बढाइएको छ । विभागका अनुसार करछली, जरिवाना र अन्य शीर्षकमा कुल ३९ करोड ७ लाख ५६ हजार रुपैयाँभन्दा बढी असुल गर्न माग गरिएको छ । साथै राजस्व चुहावट (अनुसन्धान तथा नियन्त्रण) ऐन, २०५२ को दफा २०(६) अनुसार कारबाहीको माग गर्दै मुद्दा दायर गरिएको हो । विभागले राजस्व चुहावट नियन्त्रण गर्न निरन्तर अनुगमन, अनुसन्धान र कानुनी प्रक्रिया अगाडि बढाइरहेको जनाएको छ ।
जन्म कैदको सजाय पाएका कांग्रेस नेता आलमले उच्च अदालतबाट पाए सफाइ
काठमाडौं । नेपाली कांग्रेसका नेता मोहम्मद अफताव आलमलाई उच्च अदालत जनकपुरको वीरगञ्ज इजलासले सफाइ दिएको छ । उनीसहित चार जनालाई अदालतले सफाइ दिएको हो । न्यायाधीशहरू खुसीप्रसाद थारू र अर्जुन महर्जनको इजलासले उनीहरूलाई बुधबार सफाइ दिएका हुन् । यसअघि जिल्ला अदालत रौतहटले उनीहरुलाई दोषी ठहर गरेको थियो । उनीहरूमाथि इँटाभट्टामा ज्युँदै मानिस पोलेको अभियोग थियो । रौतहट जिल्ला अदालतबाट मोहम्मद अफताव आलम सहितलाई जन्मकैदको सजाय भएको थियो ।
गृहमन्त्रीले आफूलाई चोख्याउन पत्रकार सम्मेलनमा गरेका ७ तर्क
काठमाडौं । गृहमन्त्री रमेश लेखकले बुधबार एक्कासि पत्रकार सम्मेलनको आयोजना गरे । भिजिट भिसा प्रकरणमा मुछिएका उनको राजीनामा माग गर्दै अहिले प्रतिनिधिसभा बैठक अवरुद्ध छ । मंगलबारदेखि अवरुद्ध बैठक बुधबार पनि चल्न सकेन । गृहमन्त्री लेखकले संसदमा आफ्नो धारणा राख्न पाउनुपर्ने माग राखे पनि प्रतिपक्ष दलले उनको निरन्तर राजीनामा माग गरिरहेका छन् । यही बिचमा लेखकले बुधबार एक्कासि पत्रकार सम्मेलन कार्यक्रम राखे । धेरैले अब उनले राजीनामा दिन सक्ने अनुमान गरेका थिए । तर, उनले आफूमाथि अन्याय भएको धारणा राख्दै न्यायको माग राखे । ‘मेराविरुद्ध नियोजित ढंगले आक्रमण गरिएको छ । यो आक्रमण, राजनीतिक पूर्वाग्रह, प्रतिसोध र नियोजित ढंगले प्रेरित छ,’ उनले भने । अख्तियारको अनुसन्धानको विषयलाई लिएर यसमा मन्त्रीको पनि संलग्नता छ भनेर प्रचारप्रसार भएका विषयप्रति दुःख व्यक्त गर्दै उनले आफ््नो कुनै संलग्नता नभएको धारणा राखे । उनले पत्रकार सम्मेलनमा बोल्दै केही महत्वपूर्ण विषय उठान गरेका छन् । उनले उठान गरेको पहिलो विषय हो, ‘एक जना कर्मचारीले गरेको गलत कार्य र अपराधमा विभागीय मन्त्री नै जिम्मेवार हुनुपर्ने तथा राजीनामा दिनुपर्ने हो भने यो देशमा कत्ति मन्त्री चाहिएलान् ।’ उनले फेरि अहिले बाहिरिएको कर्मचारी आफू मातहतको नरहेको सुनाए । यस्तै, उनले तत्कालीन गृहमन्त्री रवि लामिछानेको विषय उठान गर्दै उनीविरुद्द जाहेरी परेकोले संसदीय छानबिन समितिको माग गरेको र राजीनामा माग नगरेको सुनाए । उनले भने, ‘उहाँको विरुद्द प्रहरीमा जाहेरी परेको थियो, उहाँ स्वयम् नै संलग्न हुनुहुन्थ्यो तर अहिले कर्मचारीले गरेको गल्तिमा मलाई मुछ्न मिल्दैन, राजीनमा माग गर्द उचित हुँदैन ।नमा माग गर्द उचित हुँदैन ।’ उनले आयोग एउटा संवैधानिक निकाय भएकोले सो निकायले मेरो आफूले भनेको नटेर्ने र स्वतन्त्र भएर काम गर्ने भएकोले अनुसन्धानमा पनि कुनै असर र प्रभाव नपर्ने जानकारी दिए । उनले विगतको उदाहरण पनि सुनाउँदै भने, ‘यसअघि अख्तियारले अध्यागमन विभागकै महानिर्देशकमाथि अनुसन्धान गरेको थियो । तर, मन्त्रीले राजीनामा दिनु परेन ।’ उनले मन्त्रीले सरुवा गरेकै आधारमा कर्मचारीले गरेको अपराध मन्त्रीले बोक्ने नसक्ने धारणा राखे । ‘लोकसेवा आयोगले सयौं कर्मचारी सरुवा गर्छ, खटाउँछ त्यसको कुनै कर्मचारीले अपराध गर्यो भने आयोगले जिम्मेवारी लिन्छ र, उनले भने, ‘जसले अपराध गर्छ, उसैले जिम्मेवारी बहन गर्छ । उसको अपराध अरुले बोक्दैन ।’ संवैधानिक निकायको अनुसन्धानको निश्कर्षमा हामी सबैले पर्खिनु पर्ने उनको धारणा छ । उनले संसदमा आफ्नो कुरा राख्ने समय नदिएकोले अब सञ्चारकर्मीले न्याय दिने अपेक्षा रहेको सुनाए ।
सिद्धार्थ बैंकका ग्राहकलाई लाइल्याक वेलनेस एण्ड स्पामा १० प्रतिशतसम्म छुट
काठमाडौं । सिद्धार्थ बैंक लिमिटेड र बौद्धस्थित लाइल्याक वेलनेस एण्ड स्पाबीच विशेष छुटसम्बन्धी सम्झौता सम्पन्न भएको छ । सम्झौताअनुसार बैंकका प्लेटिनम डेबिट तथा क्रेडिट कार्ड प्रयोग गर्ने ग्राहकहरूले लाइल्याक वेलनेस एण्ड स्पामा सम्पूर्ण सेवामा १० प्रतिशतसम्म छुट प्राप्त गर्नेछन् । यो सहकार्यले ग्राहकहरूलाई सेवा शुल्कमा राहत दिने मात्र होइन, नगद कारोबारबाट डिजिटल भुक्तानी प्रणालीतर्फ उन्मुख गराउने लक्ष्य राखिएको छ । बैंकले यस्तो किसिमको सहकार्य डिजिटल बैंकिङको प्रवर्द्धन, ग्राहक सुविधा विस्तार र डिजिटल कारोबारको संस्कृति निर्माणमा टेवा पुग्ने विश्वास लिएको छ ।
मीनबहादुर गुरुङले गरे आइप्लेक्स मलको ५१ प्रतिशत सेयर खरिद, भाटभटेनी सञ्चालनको तयारी
काठमाडौं । भाटभटेनी सुपरमार्केटका अध्यक्ष मीनबहादुर गुरुङले काठमाडौंको नयाँ बानेश्वरस्थित आइप्लेक्स मलको ५१ प्रतिशत सेयर खरिद गरेका छन् । २०७६ सालदेखि सञ्चालनमा रहेको मलको बहुमत सेयर आपसी समझदारीमा खरिद भएको भाटभटेनीले जनाएको छ । हाल खरिद मूल्य सार्वजनिक नगरिए पनि छिट्टै मूल्य खुलासा गर्ने तयारीमा भईरहेको भाटभटेनीका एक कर्मचारीले जानकारी दिए । कर्मचारीका अनुसार सेयर खरिदसँगै आवश्यक प्रक्रियाहरू अघि बढाइ सकिएको छ । कर्मचारीले भने, ‘आइप्लेक्स मलको केही भागमा भाटभटेनी सुपरमार्केट सञ्चालन गर्ने प्रोसेसमा भाटभटेनी छ । तर मल हाल पूर्ण रूपमा भाडामा रहेकाले तत्कालै सुपरमार्केट सुरु गर्न समय लाग्ने देखिन्छ । गुरुङको सोच भाटभटेनी राख्ने नै हो, तर टुंगो लागेको छैन ।’ नयाँ बानेश्वर, पुरानो बानेश्वर र शंखमूल क्षेत्र आसपास हालसम्म भाटभटेनी सञ्चालनमा छैन । सोही क्षेत्रका लागि ठाउँ खोजिरहेको अवस्थामा आइप्लेक्स मल बिक्रीमा आएको र त्यसपछि सेयर खरिदको निर्णय भएको बताइएको छ । हालसम्म आइप्लेक्स मलमा ५० भन्दा बढी अन्तर्राष्ट्रिय ब्रान्डका पसलहरू सञ्चालनमा छन् भने अत्याधुनिक सुविधासहितका दुई सिनेमा हल समेत रहेको यो मल करिब ३० करोड रुपैयाँ लागतमा निर्माण गरिएको थियो । कोभिड र पछिल्लो आर्थिक मन्दीका कारण मलको व्यापार कमजोर हुँदै गएको छ। यस्ता परिस्थितिमा भाटभटेनी ग्रुपको प्रवेशले मलको पुनरुत्थान हुने अपेक्षा गरिएको छ। गुरुङले पछिल्लो समय तिनकुनेमा निर्माणाधीन एक अस्पतालको सेयर खरिद गरिसकेका छन् भने दरबारमार्गमा पाँचतारे होटल, चितवनमा कोल्डस्टोर, काठमाडौंको चुच्चेपाटीमा अपार्टमेन्ट निर्माणका साथै विराटनगरमा होटल खरिद गरिसकेका छन् ।
डिशहोम इन्टरनेटको ब्रान्ड एम्बेसेडरमा दिव्या रायमाझी
काठमाडौं । डिशहोम इन्टरनेटले अभिनेत्री दिव्या रायमाझीलाई ब्रान्ड एम्बेसेडर नियुक्त गरेको छ । यो सहकार्यको औपचारिक घोषणा डिशहोमको कर्पोरेट कार्यालयमा आयोजित एक कार्यक्रममार्फत गरिएको हो । सम्झौतामा डिशहोम इन्टरनेटका तर्फबाट मुख्य बजार अधिकृत संजय प्रसाद राजभण्डारी र अभिनेत्री रायमाझीले हस्ताक्षर गरे । 'डिजिटल कनेक्टिभिटीलाई प्रविधिमा मात्र सीमित नराखी नयाँ पुस्ताको प्रेरणासँग जोड्ने प्रयासमा छौं,' डिशहोमले भनेकाे छ, 'दिव्या रायमाझी युवाको आत्मविश्वास र डिजिटल भविष्यको प्रतीक हुन् ।' सो अवसरमा रायमाझीले भनिन्, 'डिशहोम इन्टरनेटजस्तो द्रुत गतिमा अगाडि बढिरहेको ब्रान्डको प्रतिनिधित्व गर्न पाउनु गर्वको विषय हो । यो केवल ब्रान्डको सहकार्य होइन, लाखौं नेपालीसँगको डिजिटल यात्राको सुरुवात हो ।' डिशहोम इन्टरनेटले हाल ३ लाख ५० हजारभन्दा बढी ग्राहकलाई इन्टरनेट सेवा प्रदान गर्दै आएको छ । ‘माई डिशहोम’ मोबाइल एपमार्फत कम्पनीले ग्राहक सेवा स्मार्ट र सहज बनाएको जनाएको छ। रायमाझीसँगको सहकार्यबाट डिशहोम इन्टरनेटले युवा पुस्तासँगको सम्बन्ध अझ प्रगाढ बनाउने र डिजिटल पहुँचलाई जनस्तरसम्म विस्तार गर्ने दीर्घकालीन लक्ष्य लिएको कम्पनीले जनाएको छ।
