सीजीनेटको ’पोस्टपेड’ सेवा, इन्टरनेट प्रयोग गरेपछि मात्र भुक्तानी
काठमाडौं । सिजीनेटले पोस्टपेड इन्टरनेट सेवा सार्वजनिक गरेको छ । कम्पनीले नेपालकै पहिलो पोस्टपेड इन्टरनेट सेवा सार्वजनिक गरेको हाे । उक्त योजना अन्तर्गत कम्पनीले १ हजार ४९ रुपैयाँ मा २५० एमबीपीएस इन्टरनेट र १ हजार १५४ रुपैयाँ प्रति महिनामा २५० एमबीपीएस र आईपीटिभी प्रदान गर्ने जनाएको छ । कम्पनीका अनुसार यस याेजनाबाट कम मूल्यमा उच्च गतिको इन्टरनेट खोज्ने ग्राहकहरूले अब एकमुष्ट रकम नतिरेर मासिक आधारमा रकम भुक्तानी गर्न सक्नेछन् । नियमित प्रिपेड प्लानहरू भन्दा सस्तो यस याेजनाले मासिक रूपमा भुक्तानी गर्दा पनि वार्षिक प्याकेज बराबरको सेवा सुविधा प्रदान गर्ने कम्पनीले जनाएकाे छ । कम्पनीकाे अनुसार ग्राहकले फिर्ता गरिने गरी २५ सयको धरौटी बाहेक ग्राहकले राउटर, ड्रप–वायर र जडान खर्चजस्ता कुनै पनि अतिरिक्त शुल्क तिर्नु पर्ने छैन । ।
आर्टिफिसियल इन्टेलिजेन्स थप प्रभावकारी बनाउने चिनियाँ कम्पनी बाइडुको भनाइ
एजेन्सी । चिनियाँ प्रविधि कम्पनी (बाइडु)ले सन् २०२३ मा आर्टिफिसियल इन्टेलिजेन्स (एआई) प्रविधिलाई वास्तविक दुनियाँमा अझ व्यापक रुपमा एकीकृत गरिने बताएको छ । बाइडुले सुरु गरेको अग्रणी एआई अनुसन्धान संस्थान बाइडु रिसर्चले बिहीबार २०२३ को शीर्ष १० टेक्नोलोजी ट्रेन्डका लागि आफ्नो भविष्यवाणी जारी गरेको हो । यसअन्तर्गत ठूला नमूना भवन, डिजिटल अनुवाद, भर्चुअल पारस्पारिकता, स्वायत्त ड्राइभिङ्ग, रोबोटिक्स, वैज्ञानिक कम्प्यूटिङ्ग र क्वान्टम कम्प्युटिङ आदि समावेश छन् । इन्स्टिच्युटका अनुसार अहिले इन्टेलिजेन्ट कम्प्युटिङ सेन्टर, डिप लर्निङ प्लेटफर्म र एआई मोडेलले नयाँ एआई संरचना बनाइरहेका छन् । आगामी केही वर्षमा, यो नयाँ एआई पूर्वाधारको निर्माण डिजिटल अर्थव्यवस्थाको विकासको महत्वपूर्ण स्तम्भहरूमध्ये एक बन्नेछ । चौथो औद्योगिक क्रान्तिको सबैभन्दा महत्वपूर्ण आधारभूत प्रविधिको रूपमा, एआईले मानव समाजलाई व्यापके रूपमा परिवर्तन गरेको छ र जारी राख्नेछ, एआई उद्योग अनुसन्धान संस्थानका डीन झांग याकिनले भने । बाइडु रिसर्चले भनेको छ, ‘ठोस खुफिया आधार, वेब ३।०, मेटाभर्स, स्वायत्त ड्राइभिङ, एआई–उत्पन्न सामग्री र क्वान्टम टेक्नोलोजीमा निर्भर रहेर २०२३ मा नयाँ औद्योगिक अवसरहरू ल्याउनेछ । वेब ३.० टेक्नोलोजीले नयाँ बहु–केन्द्रित, अधिक खुला, निष्पक्ष र सुरक्षित वेब स्पेस सिर्जना गर्नेछ जहाँ प्रयोगकर्ताहरूले अधिक सुरक्षाको साथ जानकारी र मूल्य आदानप्रदान गर्न सक्छन् ।’ सन् २०२३ मा, चीनका प्रमुख शहरहरूमा स्वायत्त ड्राइभिङको व्यावसायीकरणले सञ्चालनको दायरा र शीघ्रताको आकार दुवैमा एकसाथ वृद्धि देख्नेछ । ‘भविष्यको डिजिटल समाज उन्नत इन्टेलिजेन्ट नेटवर्क, इन्टरनेट अफ थिङ्स, ब्लकचेन र अन्य नयाँ प्रकारका पूर्वाधारमा निर्माण हुनेछ, प्राकृतिक मानव–कम्प्युटर अन्तरक्रिया र एआईले एक प्रमुख अन्तरक्रियाको प्लेटफर्मको रूपमा सेवा गर्दछ ।’ ‘भर्चुअल–रियल सिम्बायोसिस टेक्नोलोजी’ले भौतिक र डिजिटल संसारलाई मर्ज गर्नेछ, दुबै क्षेत्रमा हाम्रो अनुभव र क्षमता बढाउनेछ’, चाइनिज एकेडेमी अफ इन्जिनियरिङका शिक्षाविद् झाओ किनपिङले भने। बाइडु रिसर्चले आफ्नो शीर्ष १० टेक्नोलोजीभित्र पर्ने सफलता पाएको यो लगातार चौथो वर्ष हो ।
प्राविधिक विश्वविद्यालयलाई अन्तर्राष्ट्रियस्तरमा चिनाउने
विराटनगर । प्रदेश नं १ का प्रदेशसभा सदस्य जीवन अचार्यले मनमोहन प्राविधिक विश्वविद्यालयलाई अन्तर्राष्ट्रिय स्तरमा चिनाउन सहयोग गर्ने प्रतिबद्धता व्यक्त गरेका छन् । ‘म हुर्के बढेको ठाउँमा स्थापना भएको विश्वविद्यालयको संरक्षणमा सहयोग गर्ने जिम्मेवारी मेरो पनि हो यसैले सबैको योजनाअनुसार म अगाडि बढ्छु’, सांसद आचार्यले भने । मोरङ निर्वाचन क्षेत्र नं ६ प्रदेशसभा १ बाट निर्वाचित नेकपा माओवादी केन्द्रका सांसद आर्यायले देशकै पहिलो प्राविधिक विश्वविद्यालय आफ्नै क्षेत्रमा स्थापना भएको र त्यसलाई अन्तर्राष्ट्रिय स्तरमा चिनाउने गरी स्तरोत्रति गर्न सहयोग गर्ने प्रतिबद्धता व्यक्ति गरेका हुन् । नवनिर्वाचित सांसदलाई विश्वविद्यालयले आज बधाई ज्ञापन गर्ने कार्यक्रममा विश्वविद्यालयका उपकुलपति डा सुभाषश्री आचार्यले सङ्घ र प्रदेश सरकारसँगै सबै दल र स्थानीयको सहयोग प्राप्त गर्न सके देशकै पहिलो एमटियु केही वर्षमा सार्क स्तरमा परिचत हुनसक्ने बताए । तत्कालै एउटा प्रादेशिक अस्पताल हस्तान्तरण नहुँदा स्वास्थ्यतर्फको पठनपाठन गर्न नसकेको उनको भनाइ थियो । उनले एमटियुले चाँडै हेल्थ पोलिसी एन्ड म्यानेजमेन्ट, रेल्वे र हाइटेक ब्रिजदेखि टनेल, इन्फ्रास्ट्रक्चरल इन्जिनियरिङलगायत विषयहरु पठनपाठन गराउने अन्तिम तयारी भइरहेको जानकारी दिए । बधाई कार्यक्रममा विश्वविद्यालयका संरक्षण समिति सदस्य तथा सभासद् सत्यनारायण चौधरी, राजन केसी, बलभद्र थारू, माओवादी केन्द्र मोरङका संयोजक विजय विश्वासलगायतले विश्वविद्यालयको स्तरोत्रति भएमा देश विकासमा योगदान पुग्ने विश्वास व्यक्त गरे । प्रदेश सरकारले २०७६ मा कानुन बनाएर मोरङको बूढीगङ्गा गाउँपालिका(४ हात्तीमुढामा केन्द्रीय कार्यालय रहेको मनमोहन प्राविधिक विश्वविद्यालयमा गत शैक्षिक सत्रदेखि स्नातक तहमा सिभिल र इलेक्ट्रिक एन्ड इलेक्ट्रिोनिक्स विषयमा पठनपाठन भइरहेको छ । विश्वविद्यालयले आगामी १० वर्षभित्र विभिन्न १० भन्दाबढी प्राविधिक विषयमा पिएचडीसम्मको पठनपाठन सुरु गराउने लक्ष्य लिएको छ ।
