सेयर बेचेर ५ कम्पनीका संस्थापक सेयरधनी बाहिरिँदै, मूल्य १ सय रुपैयाँ
काठमाडौं । विभिन्न पाँच कम्पनीको संस्थापक सेयर बिक्रीमा राखिएको छ । प्रोग्रेशिभ फाइनान्स, आईजीआई प्रुडेन्सियल इन्स्योरेन्स, कुमारी बैंक, सिटिजन्स बैंक र प्रभु महालक्ष्मी लाइफका संस्थापक सेयरधनीहरूले आफ्नो स्वामित्वको सेयर बिक्रीमा राखेका हुन् । प्रोग्रेशिभ फाइनान्सका केही संस्थापक सेयरधनीहरूले १ लाख ८१ हजार ८३८ कित्ता सेयर बिक्रीमा राखेका छन् । फाइनान्सको सेयरमा विद्यमान संस्थापक सेयरधनीहरूले मात्रै आवेदन दिन पाउने छन् । खरिद गर्न इच्छुक लगानीकर्ताहरूले ३५ दिनभित्र आवेदन दिनुपर्नेछ । यदि उक्त अवधिभित्र खरिदका लागि बोलापत्र पेस नगरेमा सर्वसाधारण लगानीकर्ताहरूलाई बिक्री खुला गरिने कम्पनीले जनाएको छ । यस्तै, आईजीआई प्रुडेन्सियल इन्स्योरेन्सको संस्थापक समूहको ८० हजार कित्ता सेयर बिक्रीमा राखिएको छ । कम्पनीको उक्त सेयरको मूल्य प्रतिकित्ता २०५ रुपैयाँ तोकिएको छ । सो मूल्यका आधारमा कम्पनीको १ करोड ६४ लाख रुपैयाँ बराबरको सेयर बिक्रीमा राखिएको हो । कम्पनीको सेयर खरिद गर्न इच्छुक लगानीकर्ताले चैत १२ गतेसम्म आजेदन दिन सक्नेछन् । कम्पनीको सेयर बिक्री प्रबन्धकमा प्रभु क्यापिटल रहेको छ । यस्तै, कुमारी बैंकका विभिन्न संस्थापक सेयरधनीहरूले ४ लाख ८७ हजार १२ कित्ता सेयर बिक्रीमा राखेका छन् । बैंकको सेयरमा विद्यमान संस्थापक सेयरधनीहरूले मात्रै आवेदन दिन पाउने छन् । खरिद गर्न इच्छुक लगानीकर्ताहरूले ३५ दिनभित्र आवेदन दिनुपर्नेछ । यदि उक्त अवधिभित्र खरिदका लागि बोलापत्र पेस नगरेमा सर्वसाधारण लगानीकर्ताहरूलाई बिक्री खुला गरिनेछ । यस्तै, सिटिजन्स बैंकका संस्थापक सेयरधनीले आफ्नो स्वामित्वको ४० हजार कित्ता सेयर बिक्रीमा राखेका छन् । बैंकको उक्त सेयरको मूल्य प्रतिकित्ता १ सय रुपैयाँ तोकिएको छ । खरिद गर्न इच्छुक लगानीकर्ताले ७ दिनभित्र बोलपत्र आवेदन पेस गर्नुपर्नेछ । यस्तै, प्रभु महालक्ष्मी लाइफका विभिन्न ५ जना संस्थापक सेयरधनीहरूले २ लाख ७४ हजार २०१ कित्ता सेयर बिक्रीमा राखेका हुन् । कम्पनीका संस्थापक सेयरधनी शैलेश श्रेष्ठले १२ हजार ७८ कित्ता, सनराइज होल्डिङ्स प्रालिले १८ हजार ३४८ कित्ता, अनिल प्रसाद श्रेष्ठले २ हजार १९६ कित्ता, सैला श्रेष्ठले १ लाख २० हजार ७८० कित्ता र सुयोग श्रेष्ठले १ लाख २० हजार ७९९ कित्ता सेयर बिक्रीमा राखेका हुन् । । खरिद गर्न इच्छुक लगानीकर्ताले ७ दिनभित्र बोलपत्र आवेदन पेस गर्नुपर्नेछ ।
क्रेष्ट माइक्रो लाइफ इन्स्योरेन्स लिमिटेडको आइपिओ बाँडफाँड
काठमाडौं । क्रेष्ट माइक्रो लाइफ इन्स्योरेन्सको आईपीओको बाँडफाँड मंगबार सम्पन्न भएको छ । कम्पनीको निष्काशन तथा बिक्री प्रबन्धक एनआइएमबि एस क्यापिटल लिमिटेडको कार्यालयमा आईपीओ बाँडफाँड भएको हो । १ लाख ८४ हजार ५०० आवेदकले १० कित्ताका दरले सेयर पाएका छन् । कम्पनीले गत फागुन २२ गते सर्वसाधारणका लागि १८ लाख ४५ हजार कित्त्ता सेयर निष्कासन गरेको थियो । कुल १९ लाख ६५ हजार ८११ जनाले निवेदन दिएकोमा १० हजार १२६ जनाको आवेदन रद्द र ११ लाख ५५ हजार ६८५ आवेदन स्वीकृत भएको थियो । मागभन्दा धेरैको आवेदन परेकाले गोलाप्रथामार्फत आईपीओ बाँडफाँड भएको थियो । गोलाप्रथाबाट १ लाख ८४ हजार ५०० आवेदकले १० कित्ताका दरले सेयर पाएका हुन् । क्रेष्ट माइक्रो लाइफ इन्स्योरेन्स लिमिटेडको कूल २२ लाख ५० हजार ००० कित्ता साधारण सेयरको १० प्रतिशत अर्थात २ लाख २५ हजार कित्ता साधारण सेयर नेपाल सरकारको सम्बन्धित निकायबाट श्रम स्वीकृति प्राप्त गरी वैदेशिक रोजगारीमा रहेका नेपाली नागरिकलाई ३ प्रतिशत अर्थात ६७ हजार ५०० कित्ता साधारण सेयर कम्पनीका कर्मचारीलाई र ५ प्रतिशत अर्थात १ लाख १२ हजार ५०० कित्ता साधारण सेयर सामूहिक लगानी कोषहरूलाई बाँडफाँड गरेपश्चात् बाँकी रहेको १ लाख ८४ हजार ५०० कित्ता साधारण सेयरहरु सर्वसाधारणका लागि निष्कासन गरिएको थियो ।
सेयर बजार घट्दो क्रममा, कारोबार रकम ४ अर्बमा झर्यो
काठमाडौं । मंगलबार सेयर बजार सामान्य अंकले घटेको छ । नेपाल स्टक एक्सचेन्ज (नेप्से परिसूचक) ७.६६ अंकले घटेर २६९७.०४ बिन्दुमा झरेको छ । आज ८६ कम्पनीको मूल्य बढ्दा १५२ कम्पनीको मूल्य घटेको छ । ५ कम्पनीको मूल्यमा भने कुनै परिवर्तन आएको छैन । मंगलबार ३१३ कम्पनीको ८२ लाख कित्ता सेयर किनबेच हुँदा ४ अर्ब ३४ रुपैयाँ बढीको कारोबार भएको छ । जसमध्ये सबैभन्दा धेरै कारोबार हिमालयन रिइन्स्योरेन्सको भएको छ । हिमालयनको ३२ करोड रपैयाँको कारोबार भएको छ । साथै घलेम्दी हाइड्रोको २२ करोड, नेपाल रिइन्स्योरेन्सको १८ करोड, लाइफ इन्स्योरेन्स कर्पोरेशनको १६ करोड र नारायणी डेभलपमेन्ट बैंकको १३ करोड रुपैयाँ बढीको कारोबार भएको छ । मंगलबार अन्यबाहेक सबै सेक्टरका सूचक घटेका छन् । सो सेक्टर ०.११ प्रतिशत बढेकाे छ । घटेका सेक्टरहरुको गिरावट दर १ प्रतिशतमुनि रहेकाे छ । बैंकिङ ०.१४, विकास बैंक ०.४२, फाइनान्स ०.१७, होटल तथा पर्यटन ०.३६, हाइड्रोपावर ०.१७, लगानी ०.४२, जीवन बीमा ०.७०, उत्पादन ०.२३, माइक्रोफाइनान्स ०.३१, व्यापार ०.६६ तथा निर्जीवन बीमा ०.५४ प्रतिशतले घटेकाे छ ।
