विकासन्युज

दमकमा चिनियाँ लगानीमा मैत्री पार्क बन्ने, समझदारी पत्रमा हस्ताक्षर

काठमाडौँ । प्रदेश नम्बर १ को दमकमा निर्माण हुन लागेको चीन नेपाल मैत्री औद्योगिक पार्क परियोजनाको लागि नेपाल सरकार र विकासकर्ता कम्पनीबीच विहीबार समझदारी पत्रमा हस्ताक्षर भएको छ । उद्योग, वाणिज्य तथा आपूर्ति मन्त्री मातृकाप्रसाद यादवको उपस्थितिमा लगानी बोर्डका प्रमुख कार्यकारी अधिकृत महाप्रसाद अधिकारी र विकासकर्ता कम्पनीको तर्फबाट दमक क्लिन इन्डष्ट्रियल पार्क प्रालिका अध्यक्ष गोबिन्दबहादुर थापाले हस्ताक्षर गरेका छन् । साउन १७ गते सम्पन्न लगानी बोर्डबो बैठकले उक्त परियोजनाको करीब ६४ अर्ब रुपैयाँ बराबरको विदेशी लगानी स्वीकृत गरी डीपीआर तयार गर्न दमक क्लिन इन्डष्ट्रियल पार्क प्रालिलाई अनुमति दिने निर्णय गरेको थियो । उक्त परियोजना लासा इकोनोमिक एण्ड टेक्नोलोजिकल डेभलपमेन्ट जोन जीङ पीङ जोइन्ट क्रियशन कन्स्ट्रक्शन प्रोजेक्ड डेभलपमेन्ट कम्पनी लिमिटेड(जेपीजेसीसीपीडी) को लगानी रहने छ । उक्त परियोजनाले नेपाल र चीनबीच लगानी बिस्तार, पूर्वाधार विकास लगायतका क्षेत्रमा सहयोगको नयाँ आयाम थप्ने लगानी बोर्डका सीईओ अधिकारीले बताए । उक्त परियोजनाले औद्योगिक पूर्वाधार निर्माण र सञ्चालन मार्फत स्वदेशी माग पूरा गरी निर्यात प्रबद्र्धनमा लागि सहयोग पुग्ने जनाइएको छ । सार्वजनिक निजी साझेदारीमा निर्माण गरिने उक्त परियोजना अन्तरगत अत्याधुनिक औद्योगिक पार्क निर्माण, सञ्चालन र व्यवस्थापनको लागि डीपीआर तयार भएपछि परियोजना विकास सम्झौता(पीडीए) भई निर्माण कार्य अघि बढ्ने लगानी बोर्डले जनाएको छ ।

गुरु नानकको ५५० औं जन्मदिनको अवसरमा सिक्का सार्वजनिक

काठमाडौँ । गुरु नानकको ५५० औं जन्मदिनको अवसर पारेर नेपाल राष्ट्र बैंकले रु. १००, १००० र २५०० को सिक्का सार्वजनिक गरेको छ । राष्ट्र बैंकका गभर्नर चीरञ्जीवी नेपाल र नेपालका लागि भारतीय राजदुत मञ्जीवसिंह पुरीले एलफ्ट काठमाडौं ठमेलमा सिक्का सार्वजनिक गरेका हुन् । सिख समुदायका प्रख्यात सदस्यहरूको साथमा “सिख हेरिटेज अफ नेपाल”नामक पुस्तक पनि विमोचन गरिएको थियो । ५०० वर्ष अगाडि गुरुनानकले काठमाडौंको बाहिरी इलाका बालाजु क्षेत्रमा भ्रमण गरेका थिए भन्ने विश्वास गरिन्छ ।

सुर्ती उद्यमीको प्रभाव र हस्तक्षेपका कारण स्वास्थ्यमा गम्भीर असर

काठमाडौँ । नेपालमा सुर्ती उद्योगीको हस्तक्षेपका कारण सुर्तीजन्य पदार्थको नियमन र नियन्त्रण हुन नसकेको एक अध्ययनले देखाएको छ । प्राथमिक स्वास्थ्य सेवा स्रोत केन्द्र (रेस्फेक) ले गरेको अध्ययनका अनुसार सुर्ती उद्यमीले विभिन्न नाममा ब्राण्डको प्रचार गर्ने, चुरोट सेवन गर्न उत्प्रेरणा दिने, कानुन कार्यान्वयनमा भाँजो हाल्ने गरेका छन् । यो अध्ययन नेपालसहित ३३ ओटा मुलुकमा गरिएको थियो । ३३ ओटा मुलुकमा नै अध्ययन प्रतिवेदन सार्वजनिक गर्ने क्रममा पहिलो पटक नेपालमा विहिवार प्रतिवेदन सार्वजनिक गरिएको हो । सो प्रतिवेदनलाई विहिवार नै रेस्फेकका कार्यकारी निर्देशक शान्तलाल मुल्मीले विश्व स्वास्थ्य संगठनका कन्ट्रि रिप्रिजेन्टिटिभको उपस्थितिमा स्वास्थ्य शिक्षा तथा सूचना केन्द्रका निर्देशक कुन्जप्रसाद जोशीलाई हस्तान्तरण गरेका थिए । विभिन्न संघसंस्थाले ३३ ओटा मुलुकमा गरेको अध्ययनमध्ये उद्योगीको हस्तक्षेप कम भएको मुलुकको ८औं स्थानमा नेपाल रहेको छ । अध्ययन अनुसार दक्षिण एसियामा भारत, श्रीलंका र बंगलादेशमा सवैभन्दा वढी उद्यमीको हस्तक्षेप रहेको छ । अध्ययनअनुसार नेपालमा उद्यमीले नीति निर्माण चरणमा नै नीति निर्मातालाई आर्थिक लाभ दिने गरेका छन् । सुर्ती उद्योगको नाममा सामाजिक उत्तरदायित्वको काम गरी प्रचार गरिरहेका छन् । निर्माता निर्देशकलाई प्रभाव पारी विभिन्न चलचित्रहरुमा कलाकारलाई धुम्रपान गर्न लगाएका छन् । सुर्तीजन्य पदार्थ नियमन तथा नियन्त्रण ऐन र नियमावली अनुसार सुर्तीबाट हुने हानी देखिने रंगीन चित्र सुर्तीको प्याकेटमा ९० प्रतिशत हालिएको छैन । प्रतिवेदन सार्वजनिक गर्दै प्राथमिक स्वास्थ्य सेवा स्रोत केन्द्रका कार्यकारी निर्देशक शान्तलाल मुल्मीले सुर्ती उद्योगलाई उच्च करदाताको सम्मान दिएर राज्यले जनताको स्वास्थ्यमा खेलवाड गर्न प्रोत्साहन गरिरहेको बताए । अर्थमन्त्रालय, वाणिज्य मन्त्रालय, गृह मन्त्रालयले सुर्ती उद्यमीसँग गरेका छलफल र निर्णय पारदर्शी नहुनु हस्तक्षेपको नमुना भएको प्रतिवेदनमा उल्लेख छ । सुर्ती उद्योगले गर्ने प्रचार तथा प्रवद्र्धनात्मक खर्च र आम्दानी पारदर्शी गर्नुपर्ने प्रतिवेदनमा उल्लेख छ । सुर्ती उद्योगको हस्तक्षेपलाई न्यूनीकरण गर्न स्थानीय तह र सहायक जिल्ला अधिकारीलाई वढी जिम्मेवारी र शक्तिसम्पन्न गर्नुपर्ने कुरा प्रतिवेदनमा लेखिएको छ । प्रतिवेदन सार्वजनिकीकरण कार्यक्रममा विश्व स्वास्थ्य संगठनका कन्ट्रि रिप्रिजेन्टिटेटिभ डा.जोस भेन्डेलरले सुर्ती प्याकेटमा पूरै ढाकिने गरी रंगीन चित्र राख्नुपर्ने र ब्रान्डको नाम सवभन्दा सानो अक्षर बनाउनतिर विश्वको ध्यान जानुपर्ने बताए । नेपालमा अन्तराष्ट्रिय कानुन र राष्ट्रिय कानुन विपरित खुल्ला रुपमा सुर्तीको बेचविखन हुने गरेको बताए । उनका अनुसार नेपालमा सुर्ती सेवनकै कारण वर्षेनी २७ हजार १ सय ३७ जनाको ज्यान गइरहेको छ । राष्ट्रिय स्वास्थ्य शिक्षा, सूचना तथा सञ्चार केन्द्रका निर्देशक कुन्जप्रसाद जोशीले सुर्ती सेवनमा मात्रै नेपालीले वार्षिक ४७ अर्ब रुपैयाँ खर्च गरिरहेको जानकारी दिए । उनले भने,‘ सुर्तीका कारण १० वर्षअगाडिसम्म १६ हजारको मात्र मृत्यु हुन्थ्यो अहिले एकाएक २७ हजार पुगिसकेको छ ।’ नेपालमा कानुनभन्दा सामाजिक मुल्य मान्यताले काम गर्ने भएकाले सुर्ती नियन्त्रणका लागि सामाजिक अभियान चलाइ सुर्ती खानु हुँदैन भने संस्कार बसाउनुपर्ने तर्फ उनको जोड रहेको छ । स्वास्थ्य तथा जनसंख्या मन्त्रालयका उपसचिव पुष्करराज नेपालले लगभग ३१ प्रतिशत नेपालीले सुर्ती सेवन गर्ने गरेको र मृत्युको १७ प्रतिशत प्रमुख कारण सुर्ती रहेको छ । ९० लाख सुर्ती सेवनकर्ता नेपालीमध्ये १० लाखलाई जोखिमपूर्ण दीर्घ रोग रहेको पनि उनले जानकारी दिए । सञ्चारकर्मी भगवती तिमिल्सिनाले सुर्तीजन्य पदार्थका असरका सम्वन्धमा पर्याप्त सूचना हुँदाहुँदै पनि प्रवक्तामार्फत लिनुपर्ने वाध्यताका कारण जनताले समयमै सही सूचना प्राप्त गर्न नसकिरहेको बताए । उपभोक्ता संरक्षण मञ्चका अध्यक्ष ज्योति बानियाँले पुरस्कारको लोभमा आवश्यक गृहकार्य नगरी सुर्तीको प्याकेटमा ९० प्रतिशत हानिकारक चित्र ल्याउने व्यवस्था ल्याउँदा सुर्ती उद्यमीले चलखेल गर्ने मौका पाएको र मुद्दाको किनारा लाग्न समय लागेको बताए । प्राथमिक स्वास्थ्य सेवा स्रोत केन्द्रका अध्यक्ष प्राडा शरदराज वन्तले सुर्ती उद्यमीको बदमासीका विरुद्ध सशक्त आवाज उठाउन हामी फ्रेमभन्दा बाहिर पनि जान सक्नुपर्ने बताए ।

कुमारी बैंकका ७ शाखाको एकैदिन उद्घाटन

काठमाडौँ । कुमारी बैंक लिमिटेडले काठमाडौँ उपत्यकाभित्र तथा बाहिर गरेर आफ्ना सात नयाँ शाखाहरूको उद्घाटन समारोह सम्पन्न गरेको छ । काठमाडौँ स्थित नयाँ वानेश्वर शाखाको उद्घाटन बैंकका संचालक समितिका अध्यक्ष अमिर प्रताप जबरा र नागरिक लगानी कोषका प्रमुख प्रशासक रमण नेपालले संयुक्त रूपमा गरेका हुन् । यसैगरी, कीर्तिपुर शाखाको उद्घाटन बैंकका संचालक समितिका सदस्य महेश प्रसाद पोखरेलज्यू र कीर्तिपुर नगरपालिका ९ का वडाअध्यक्ष गंगाराम महर्जनद्वारा सम्पन्न भएको हो । साथै, काभ्रेस्थित बनेपा शाखाको उद्घाटन बैंकका संचालक समितिका सदस्य कृष्णप्रसाद ज्ञवाली तथा बनेपा नगरपालिकाका मेयर लक्ष्मी नरसिंह बादे श्रेष्ठले संयुक्त रूपमा गरे । बैंकले उपत्यकाबाहिर भने नवलपरासीस्थित गैंडाकोट, बारास्थित जितपुर, चितवनस्थित पुरानो पर्सा, पर्सास्थित सिर्सियामा गरी कूल ४ शाखाहरूको औपचारिक उद्घाटन गरेको छ ।

दशैंमा घुम्न जाने सोचमा हुनुहुन्छ ? यी हुन सक्छन् उचित गन्तब्य

काठमाडौं। दशैंमा घुम्न जानेहरूको चहलपहल बढ्दै गएको छ । यतिखेर दशैंतिहार नमनाएर घुम्न मन पराउनेहरू विभिन्न पर्यटकीय गन्तव्यहरूको बारेमा जान्न र बुझ्न खोज्दै हुुनुहुन्छ। विदाको समय पारेर परिवार र साथीहरुसँग मुलुकका प्रचलित पर्यटकीय स्थलहरूमा घुम्न जाने गर्दछन् । विशेषतः घुम्नका लागि बसन्त र सरद ऋतु उत्तम मानिन्छ । यो मौसममा धेरैजसो मानिसहरु घुम्न निस्कने गर्छन । छुट्टीको समयमा घुम्न मन पराउनेहरूको चाहनालाई मध्येनजर गर्दै हामीले केही पर्यटकीय स्थलहरूको बारेमा चर्चा गरेका छौं । खप्तड सुदूरपश्चिम प्रदेशको प्रसिद्ध र सुन्दर पर्यटकीय स्थलका रुपमा खप्तडलाई लिइने गरिन्छ । प्रदेशका चार पहाडी जिल्ला बाजुरा, बझाङ, अछाम र डोटीकोबीचमा पर्ने खप्तडलाई स्वर्गको उपमा पनि दिइएको छ । फराकिला फाँट हेर्नैका लागि आन्तरिक र बाह्य पर्यटकहरु खप्तड राष्ट्रिय निकुञ्जमा पुग्ने गर्दछन् । समुन्द्री सतहबाट तीन हजार पाँच सय मीटरसम्म उचाइमा रहेको यस निकुञ्जमा ५ सय ६७ थरीका वनस्पति र नेपालमा पाइने ८ सय ५० किसिमका चराचुरुंगीं मध्ये साढे दुई सय भन्दा बढी चराचुरुंगी पाइन्छन् । खप्तडमा ५२ वटा ताल रहेका छन् । पोखरा पोखरा नेपालको प्रमुख पर्यटकीय स्थल मध्येको एक हो । पोखरामा दशैंको समयमा मात्र होइन हरेक समयमा घुम्न जानेहरूको घुँइचो लाग्ने गर्दछ । पोखराको डेविड फल, गुप्तेश्वर, छाँगा छहरा हेर्न, बिन्दावासिनी, तालबराहीलगायतका प्रसिद्ध धार्मिक स्थलहरूको अवलोकन गर्न पनि पाइन्छ । फेवातालमा पर्ने माछापुच्छे्रको छाँया हेर्दै डुङ्गा चढ्न र रमणीय हिमालहरू अवलोकन गर्न आन्तरिक तथा बाह्य पर्यटकहरू पोखरा पुग्ने गर्छन् । रारा नेपालको पर्यटकीय स्थल भन्ने वित्तिकै धेरैले राराको नाम लिने गर्छन् । समुन्द्री सतहबाट २९ सय ९० मिटरको उचाईमा रहेको राराताल सुन्दर मात्र होइन उतिकै मनमोहक र प्रख्यात पनि छ । रारा ताल १० दशमलब ८ किलोमिटर क्षेत्रफलमा फैलिएको छ । यो तालमा विश्वका अन्यत्र नपाइने स्नो ट्राउट प्रजातीका माछा पाइन्छन् । घामको किरणसँगै राराले आफ्नो रंग बदल्ने गर्छ । रारा पुग्नका लागि हवाई तथा स्थलमार्ग प्रयोग गर्न सकिन्छ । मुस्ताङ हिमाल पारीको जिल्लाका रुपले परिचित मुस्ताङ आन्तरिक तथा बाह्य पर्यटकहरूको आकषर्णको थलो हो । मुस्ताङको मनोरम दृश्यको अवलोकन गर्न मात्र नभइ मानिसहरू मुक्तिनाथ मन्दिरको दर्शन गर्न मुस्ताङ पुग्ने गर्छन् । यो जिल्लामा धौलागिरी र निलगीरी दुई प्रख्यात हिमालहरू छन् । मुस्ताङको मार्फा गाउँ पनि पर्यटकका लागि आकर्षको बनेको छ । वरिपरी पहाडले घेरिएको उक्त गाउँ निकै सुन्दर र मनोरम छ । यस्तै मुस्ताङको अर्को रमणीय स्थल हो कागबेनी । यहाँ विभिन्न चलचित्रहरूका साथै म्यूजिक भिडियो समेत छायांकन हुने गर्छ । सौराहा नेपालका धेरै गन्तव्य स्थलमध्ये सौराह पनि एक उम्दा पर्यटकीय क्षेत्र हो । चितवनको सौराहा, मेघौली, सिराइचुली, लामो झरना लगायत चितवनका आकर्षक पर्यटकीय गन्तब्य हुन् । काठमाडौबाट मुग्लिन हुँदै १ सय ६५ किमी सडकको दुरीमा चितवन पुग्न सकिन्छ । नेपालको आकर्षक पर्यटकीय गन्तब्यका रुपमा रहेको सौराहा चितवन राष्ट्रिय निकुञ्ज अन्तर्गत पर्दछ । एक सिंगे गैडा पाइने सौराह निकुञ्जमा हात्ती चढेर जंगल घुम्न, राप्ती नदिमा डुङ्गा सयर गर्न र सुर्यास्त हेर्न सौराहाको आकर्षण हो पाथिभरा पाथिभरा ताप्लेजुङमा पर्ने प्रख्यात धार्मिक स्थल हो । समुन्द्री सतहबाट ३ हजार ७ सय ९४ मिटर उचाईमा रहेको ताप्लेजुङ जिल्लामा अवस्थित पाथिभरादेवी विश्वमै प्रख्यात रहेकी छिन् । पाथिभराबाट विश्वका विभिन्न हिमश्रृंखलाहरू अवलोकन गर्न पाइन्छ । काठमाडौंबाट दुई दिनको बस यात्रामा पाथिभरा पुग्न सकिन्छ । लुम्बिनी पर्यटकहरुका लागि शान्तिका प्रतिक भगवान गौतम बुद्धको जन्मस्थल लुम्बिनी उत्कृष्ट गन्तब्य हो । काठमाडौंबाट तीन सय किलोमिटर दुरीमा रहेको लुम्बिनी ऐतिहासिक दृष्टिकोणले अत्यन्तै प्रसिद्ध मानिन्छ ।लुम्बिनी भगवान गौतम बुद्धको पवित्र जन्मस्थल हो । २५६२ वर्ष पहिला सुन्दर र पवित्र बगैंचामा माता मायादेवीको कोखबाट शान्तिका अग्रदुत भगवान गौतम बुद्धको जन्म भएको थियो । त्यसैले संसारभरका बौद्ध धर्मालम्बीहरूको लागि लुम्बिनी आकर्षक गन्तब्यका रुपमा लिने गरिन्छ । संसारभरिका बौद्धमार्गी लगायत शान्तिप्रेमी सबै मानिसहरु बीच विश्व शान्तिको मुहानका रुपमा प्रसिद्ध छ । सन् १९९७ देखि यो स्थल विश्व सम्पदा सूचीमा समेत सूचिकृत गरिएको छ। हरेक वर्ष संसारभरबाट लाखौंको संख्यामा तिर्थालु पर्यटकहरू तथा अध्ययनकर्ताहरूले लुम्बिनीको भ्रमण गर्छन् । इलाम इलाम घुम्न जाने सबैको चाहना हुन्छ । पर्यटकहरूले सबैभन्दा रुचाउने पर्यटकीय स्थलमध्ये इलाम पनि एक हो । इलामको कन्याम चियाबारी घुम्न जानेको जहिले पनि भिड लाग्छ । इलाममा घुम्न लायक कन्याम, अन्तुडाँडा, छिन्टापु, पाथिभरा, इलाम बजारलगायतका थुप्रै स्थानहरू रहेका छन् ।इलाममा पिकनिक स्पोर्टस्, होमस्टे तथा अवलोकन स्थानहरू प्रशस्त छन् । इलामको चिया बगानमा घोडा चढेर चियाका बोटले भरिएका डाँडाहरु अवलोकन गर्न सकिन्छ । इलामको अग्लो डाँडो सन्दकपुर ३ हजार ६ सय ३६ मिटर उचाइमा छ । त्यस डाँडाबाट कुम्भकर्ण, कञ्चनजंघा लगायतका हिमालहरू देख्न सकिन्छ । स्वर्गद्वारी स्वर्गद्वारी प्युठान जिल्लाको सदरमुकाम खलंगाबाट करिब २६ किलोमिटर पश्चिममा अवस्थित धार्मिक पर्यटकीय स्थल हो । नेपालका प्राचीन मन्दिरहरूमध्ये यो एक धार्मिक तिर्थस्थल हो । स्वर्गद्वारीबाट धौलागीरी, नीलगिरि, माछापुच्छ्रे, अन्नपूर्ण, लमजुङ, हिमचुली, मनास्लु, चुरेन, पुथालगायतका हिमश्रृंखलाहरू देखिन्छन् । समुन्द्री सतहबाट २ हजार ४८ मिटरको उचाइमा रहेको छ स्वर्र्गद्घारी ।पौराणिक कालमा पाण्डवहरू स्वर्ग जाँदा यहाँको द्वार भएर स्वर्ग गएको धार्मिक ग्रन्थहरूमा उल्लेख गरिएको छ । त्यसैले यो ठाउँलाई स्वर्गद्वारी भनिएको हो । यहाँ परापूर्व कालमा ऋषिहरू बसेर तपस्या गर्ने गरेको पाइन्छ । भगवान ब्रह्मा स्वयंले यहाँ तपस्या गरेको भन्ने जनश्रुति चलिआएको छ । स्वर्गद्वारीमा ऐतिहासिक अग्निखण्ड, गुफा, महादेव स्वर्ग गएको बाटो, यहाँ पालिएका गाई, महाप्रभुको दर्शन गर्नाले पुण्य पाइने र मनोकांक्षा पूरा हुने विश्वास छ । यहि विशवासका साथ पर्यटनहरू त्यहाँ पुग्ने गर्छन । वैशाख पूर्णिमा, बुद्धजयन्ती र उभौली पर्वको अवसरमा स्वर्गद्वारीमा हरेक वर्ष मेला लाग्छ ।

वार्षिक २० अर्बको फलफूल आयात, दशैंलाई लक्षित गरी १० गुणा आयात बढ्ने

काठमाडौं । नेपालमा वार्षिक रुपमा २० अर्ब रुपैयाँ बराबरको फलफूल विभिन्न देशबाट नेपाल भित्रिने गरेको छ । सामान्य समयमा भन्दा चाडपर्वका बेला १० गुणा बढी आयात हुने गरेको छ । नेपाल फलफूल थोक व्यवसायी संघका अध्यक्ष अमर बानियाँले पछिल्लो समय सरकारले क्वारेन्टाइनमा कडाई गरेका कारण व्यवसायी तथा उपभोक्ता मारमा परेको बताए । ‘आफ्नै देशको उत्पादनको क्षमतालाई मूल्याङ्कन गरी प्रत्येक भन्सारमा क्वारेन्टाइन राख्नु पर्ने हो, तर माग र आपूर्तिबारे सही तथ्य थाहा नपाई सरकारले गरेको निर्णयले अप्रत्यक्ष रुपमा उपभोक्ता मारमा परिरहेका छन्’– अध्यक्ष बानियाँले भने । भारत र चीनबाट भित्रछ धेरै फलफूल नेपालमा अधिकांश फलफूल भारत र चीनबाट आयात हुँदै आएको छ भने, पछिल्लो समय अन्य मुलुकबाट पनि आयात हुँदै आएको संघका अध्यक्ष बानियाँले बताए । युगान्डा, न्युजिल्याण्ड र माल्टा र साउथ अफ्रिकाबाट समेत फलफलू आयात हुने गरेको छ । नेपालमा उत्पादन हुने फलफूल मध्ये केराको उत्पादन बढी नेपालको भौगोलिक अवस्था अनुसार जुनसुकै किसिमको फलफूल उत्पादन हुने कृषिविद्को भनाई रहेको छ । पछिल्लो समय नेपालमा उत्पादन हुने फलफलू मध्ये केराको हिस्सा ५० प्रतिशत रहेको छ । आँपको र सुन्तलाको सिजनमा पनि नेपाली उत्पादनले बजारको मागको पूरा गर्न सक्ने अवस्था रहेको अध्यक्ष बानियाँले बताए ।भारतबाट यस वर्ष स्याउ आयात कम भएको छ । बजारको माग अनुसार ५ प्रतिशत मात्र नेपालमा उत्पादन हुन्छ । ९० प्रतिशत भन्दा बढी स्याउ चीनबाट आयात हुँदै आएको छ । बाँकी सबै प्रकारका फलफूल भारत तथा अन्य देशबाट हुने आयात हुने नेपाल फलफूल थोक व्यवसायी संघका अध्यक्ष बानियाँले बताए । केरा खेती सबैभन्दा बढी चितवन, नवलपरासी, सुनसरी, बारा र कैलालीमा हुने गरेको छ ।

निर्धन उत्थान लघुवित्तले गर्यो ब्यवसायिक गाई/भैंसीपालन तालिम

काठमाडौँ । निर्धन उत्थान लघुवित्त वित्तीय संस्था लिमिटेडले संस्थाको रुपन्देही जिल्ला स्थित सितलनगर शाखा मार्फत ३० जना र पर्सा जिल्ला स्थित पोखरिया शाखा मार्फत ३२ जना ग्राहक सदस्यहरुको सहभागितामा असोज १२ गतेदेखि १५ गतेसम्म ‘ब्यवसायिक गाई/भैंसीपालन तालिम’ सम्पन्न गरेको छ । तालिममा वाह्य विशेषज्ञ सहित संस्थाका शाखा प्रमुख र कार्यक्रम अधिकृतहरु प्रशिक्षक रहेका थिए । सितलनगर स्थित कार्यक्रमको संचालन शाखा प्रमुख कृष्णबहादुर दर्जी र कार्यक्रम अधिकृत पूर्णबहादुर खड्काको उपस्थितिमा भएको थियो । साथै, पोखरिया स्थित कार्यक्रमको संचालन शाखा प्रमुख रामरक्षा यादव र कार्यक्रम अधिकृत राधेश्याम साहनीको उपस्थितिमा भएको थियो । गाईपालनको परिचय, गाईपालनको महत्व, नेपालमा पालिने विभिन्न स्थानीय तथा उन्नत नश्लकागाईकोे जातिय परिचय, कमीकमजोरी, संरक्षण तथा विकास, दुग्ध उत्पादनमा गाई/भैंसीको योगदान, दुधालु गाई छनौट गर्ने प्रक्रिया र यसको महत्वगाईको भाले खोज्ने उमेर, भाले खोजेको समय पत्तालगाउने, भाले लगाउने उत्तम समय र पहिचान गर्ने तरीका लगायतका विषयमा तालिममा छलफल भएको थियो ।

मुक्तिनाथ विकास बैंकद्वारा मृतकको ऋण मिनाहा र फिर्ता

काठमाडौँ । मुक्तिनाथ विकास बैंक लि.ले सामाजिक सुरक्षा कार्यक्रम अन्तर्गत बंैकको साना तथा लघु बैंकिङ्ग कार्यालय, बुढिबजारमा सदस्य रहेका विष्णुमाया वरालको मृत्यु भएकोले निजले उपभोग गरेको ऋणको साँवा र ब्याज बराबरको रकम मिनाहा र फिर्ता गरेको छ । उक्त रकम स्व. विष्णुमाया वरालको छोरा तथा निजले इच्छाएको व्यक्ति सूर्यप्रसाद वराललाई क्षेत्रीय कार्यालय पोखराका प्रमुख वावुराम ढकाल, बुढिबजार शाखाका प्रमुख रामचन्द्र रानाभाट तथा साना लघु वैंकिङ्क प्रमुख धु्रवराज घिमिरे र पोखरा–२७, का वडाध्यक्ष धनवहादुर नेपालीले संयुक्त रुपमा हस्तान्तरण गरेका हुन् । निजको आकस्मिक मृत्यु पश्चात् भुक्तान गरी सकेको साँवा र ब्याज बापतको रकम रु. २७३,९८३/–(दुई लाख त्रिहत्तर हजार नौ सय त्रियासी रुपैयाँमात्र) र काजकिरिया खर्च रु ५,०००/– (पाँचहजार मात्र ) समेत गरी रु.२७८,९८३/– (अक्षरुपी दुई लाख अठहत्तर हजार नौ सय त्रियासी रुपैयाँमात्र) बराबरको चेक हस्तान्तरण गरेको बैंकले जनाएको छ ।