आरम्भ माईक्रोफाईनान्सको दोस्रो वार्षिक साधारण सभा सम्पन्न
काठमाडौं, २८ पुस । आरम्भ माईक्रोफाईनान्स वित्तीय संस्था लिमिटेडले आफ्नो दोस्रो वार्षिक साधारण सभा काभ्रेपलाञ्चोकको बनेपामा सम्पन्न गरेको छ । सभाले आर्थिक वर्ष २०७२/०७३ को वार्षिक प्रतिवेदन तथा वित्तीय विवरणहरु पारित गरेको छ । साथै, आर्थिक वर्ष ०७३/०७४ का लागि लेखापरीक्षकको नियुक्ती र पारिश्रमिक निर्धारण गरेको छ । उक्त सभाले संस्थाको प्रबन्धपत्र तथा नियमावलीमा आवश्यक संशोधन गर्ने लगायतका प्रस्तावहरु समेत पारित गरेको छ । माइक्रोफाइनान्सले विभिन्न ११ वटा जिल्लाहरुमा १६ वटा शाखा कार्यालयहरु संचालनमा ल्याई करिब ६ हजार भन्दा बढि घर परिवारलाई लघुवित्तीय सेवाहरु प्रदान गरेको छ । संस्थाले हालसम्म १ करोड ५१ लाख भन्दा बढि रकम बचत संकलन गरी हालसम्म २७ करोड ४३ लाख रुपैयाँ लगानी गरेको छ ।
लाप्राक बासीको घर सपनाः यसरी हुँदैछ साकार
काठमाडौं, २८ पुस । २०७२ बैशाख १२ को भूकम्पले घरबार बिहिन बनेका गोरखाको लाप्राकका भूकम्प पीडितहरुको घर सपना साकार हुने बाटोमा अघि बढेको छ । गैर आवासिय नेपाली संघ(एनआरएन)ले लाप्राक बासीको घर सपना साकार पार्ने अभियानलाई तिब्रता दिएको हो । संघले आगामी २ बर्षभित्रै नमुना बस्ती निर्माण सम्पन्न गर्ने योजनासहित निर्माण कार्यलाई अघि बढाएको छ । राष्ट्रिय पुर्ननिर्माण प्राधिकरण, शहरी विकास मन्त्रालय र एनआरएनले गत बैशाख १२ गते लाप्राकलाई नमुना बस्ती बनाउने सम्बन्धी सम्झौतामा हस्ताक्षर गरेका थिए । र यहि मंसिरमा नेपाल सरकारले गुप्सी पाखामा घर बनाउने अनुमति दिएपछि एनआरएनले काम अघि बढाइरहेको छ । एनआरएनले लाप्राककै गुप्सी पाखामा ५७३ वटा भूकम्प प्रतिरोधी घर बनाउँदैछ । सो नमुना बस्तीमा ढल, खानेपानी, विद्यालय, स्वास्थ्य चौकी, खेल मैदान, खुल्ला चौर, मनोरञ्जनस्थल लगायतका पुर्वाधार पनि निर्माण हुनेछन् । हाल भूकम्प पीडितको घर सपना पुरा गराउने अभियानका लागि गुप्सी पाखामा परियोजना कार्यालय निर्माण भैसकेको छ । एनआरएनले संसारभरका एनआरएनहरुलाई स्वंयम सेवाका लागि आव्हान पनि गरिसकेको छ । स्वंय सेवक बस्नका लागि आवश्यक संरचनाको निर्माण भैसकेको एनआरएनकी प्रवक्ता रञ्जु थापाले बताइन् । सन २०१७ फेबुअरी देखी अक्टोवरसम्म संसारभर छरिएर रहेका गैर आवासिय नेपालीलाई स्वंय सेवकका रुपमा परिचालन गराउने योजना बनेको अध्यक्ष शेष घले बताउँछन् । एनआरएनले सो अवधीमा नेपाल भ्रमणमा निस्कन पनि आव्हान गरेको छ । परियोजना कार्यालय स्थापनाका लागि अध्यक्ष घले स्वयं दुई पटक लाप्राक पुगिसकेका छन् । उनले २३ डिसेम्बर देखी ३१ डिसेम्बर र ६ जनवरी २०१७ देखी ९ सम्म लाप्राकमै बिताएका थिए । हाल गुप्सी पाखामा निर्माण कार्यलाई चाहिने आवासगृह, पानी ट्यांकी, चीनबाट ल्याईएको ईटा छाप्ने मेशिन, डोजर, सोलार र अन्य परियोजनालाई चाहिने आवश्यक सामग्रीहरु काठमाडौंबाट ढुवानी भई पुगिसकेको छ । यसैगरी स्वंयम सेवकहरुको खाना तथा बस्ने व्यवस्थाको लागि आवासगृह र किचेनको लागि चाहिने सामग्रीहरुको प्रबन्ध मिलाउने कार्य जारी छ । भूकम्प पीडितका लागि भवन बनाउने ठाउँको माटोे सम्याउने काम धमाधम भईरहेको छ । सरकारले सो स्थानका लागि विद्युत उपलब्ध गराइसकेको छ । संघका अध्यक्ष शेष घलेसँगै एनआरएनहरु सोनाम लामा, जमुना गुरुङ, एसि शेर्पा, सल्लाहकार टिबी कार्की, श्याम तामाङ लगायत लाप्राक पुगेका थिए । उनीहरुले आगामी २ बर्षभित्रै लाप्राक बासीलाई भूकम्प प्रतिरोधी भवनको सहितको नुमना बस्ती उपलब्ध गराउने प्रतिवद्धता व्यक्त गरेका थिए ।
सिन्धु विकास बैंकका सिइओ सञ्जीव प्रधानको कार्यकाल थपियो
काठमाडौं, २८ पुस । सिन्धु विकास बैंकका सिइओ सञ्जीव प्रधानको कार्यकाल चार वर्ष थपिएको छ । पुस २७ गते बसेको बैंकको सञ्चालक समितिको बैठकले प्रमुख कार्यकारी अधिकृतमा प्रधानको समय थप्ने निर्णय गरेको हो । प्रधानले प्रमुख कार्यकारी अधिकृत भएर बैंकमा एक कार्यकाल पुरा गरिसकेका छन् । बिहीबार नेप्सेमा प्रकाशित सूचना अनुसार उनले अझै चार वर्ष सो बैंकको सिइओ भएर काम गर्नेछन् ।
तीन वर्षदेखि रोकिएको सवारी साधनको ‘लाइसेन्स’ खुल्यो, मोटरसाइकल र स्कुटरको लाइसेन्सका लागि आवेदन माग
बागलुङ, २८ पुस । धवलागिरि अञ्चलमा तीन वर्षदेखि रोकिएको सवारी साधन अनुमति पत्र (लाइसेन्स) वितरण प्रक्रिया पुनः शुरु भएको छ । यातायात व्यवस्था कार्यालयले पहिलो चरणमा मोटरसाइकल र स्कुटरको लाइसेन्सका लागि आवेदन माग गरेको छ । यसअघि, सवारी साधन अनुमति पत्र परीक्षा समितिको बैठकले आवेदन खुलाउने निर्णय गरेको थियो । मङ्गलबारदेखि बिहीबारसम्म मोटरसाइकल र शुक्रबार स्कुटर चालकका लागि आवेदन दिने व्यवस्था गरिएको छ । पूर्वाधार अभावले रोकिएको अनुमति पत्र परीक्षा खुलेपछि सर्वसाधारण उत्साहित बनेका छन् । कार्यालयमा आवेदन दिनेको भीड लागेको अनुमति पत्र वितरण शाखाका नायब सुब्बा रामप्रसाद उपाध्यायले बताए । मोटरसाइकल र स्कुटरपछि अन्य सवारी साधनका लागि अनुमति पत्र खुलाउने तयारी कार्यालयको छ । यातायात व्यवस्था विभागले नयाँ नीति अख्तियार गरेसँगै पूर्वाधारको कमीका कारण धवलागिरि अञ्चलबाट सबैखाले सवारी साधनको अनुमति पत्र वितरण कार्य रोकिएको थियो । परीक्षा रोकिएपछि कार्यालयबाट सेवा लिने बागलुङ, पर्वत, म्याग्दी र मुस्ताङका सेवाग्राही समस्यामा पर्दै आएका थिए । धवलागिरिवासी अनुमति पत्रका लागि पोखरा, काठमाडौंलगायत ठाउँ जानुपर्ने बाध्यता छ । कार्यालयले बागलुङ नगरपालिका-१ खनियाबासमा अभ्यास परीक्षाका लागि आवश्यक पूर्वाधारसमेत निर्माण गरेको छ । यसअघि कार्यालयले मासिक ८०० सवारी साधन अनुमति पत्र वितरण गर्दै आएको थियो । कार्यालयले साना, मझौला र ठूला गरी सबै सवारी साधनको क्रमशः अनुमति पत्रको परीक्षा सञ्चालन गर्ने जनाएको छ । रासस
माघ १९ देखि ४० मेगावाट विद्युत् काठमाडौं भित्रदै, प्रसारण लाईन निर्माण कार्य अन्तिम चरणमा
काठमाडौं, २८ पुस । आगामी माघ १९ गतेदेखि भारतबाट आयात गरिएको ४० मेगावाट विद्युत काठमाडौं आउने भएको छ । मुजफ्फरपुर-ढल्केवर-खिम्ती प्रसारण लाइन निर्माण कार्य अन्तिम चरणमा पुगेकाले आयातित विद्युत् काठमाडौं ल्याउन सम्भव हुन लागेको हो । उक्त लाइन माघ १ गतेदेखि काठमाडौंसँग जोडिने भएको छ । पछिल्लो समयमा द्रुत गतिमा निर्माण कार्य अघि बढेसँगै तोकिएको समयभित्रै प्रसारण लाइन बन्ने भएको ऊर्जा मन्त्रालयले बताएको छ । आयातित विद्युत काठमाडौं ल्याउन समय निर्धारण गरेरै प्रसारण लाइन निर्माण कार्य थालनी गरिएको थियो । अब प्रसारण लाइन निर्माण कार्य बेलैमा परीक्षण गरेर सिष्टमलाई तयारी अवस्थामा राख्न सकिने अवस्थामा पुगेको उनले बताए । उक्त मुजफ्फरपुर-ढल्केवर-खिम्ती प्रसारण लाइन भारतको बिजुली काठमाडौंमा ल्याउन हाल उपलब्ध दुई प्रसारण लाइनमध्ये छोटो हो । यसबाहेक भारतको विद्युत् काठमाडौं ल्याउन सकिनेमा ढल्केवर-हेटौंडा-कुलेखानी-मातातीर्थ-स्युचाटार अर्को प्रसारण लाइन छ । ‘उक्त प्रसारण लाइनबाट बिजुली काठमाडौं ल्याउँदा लामो बाटोका कारण भोल्टेजको समस्या पर्ने प्राविधिकले औल्याएपछि खिम्ती-ढल्केवरकै प्रसारण लाइन प्रयोग गर्न लागिएको हो । तर, प्राधिकरणले भने आयातित विद्युत हेटौंडा आउने वित्तिकै त्यसक्षेत्रका साथै हेटौडादेखि पूर्व र दक्षिण क्षेत्रमै वितरण गर्ने योजना बनाएको छ ।’ ढल्केवर-हेटौंडा प्रसारण लाइनको विद्युत् ढल्केवर, पथलैया, परवानीपुर, सिमरा, वीरगञ्ज, चन्द्रनिगाहपुर, कमाने (हेटौंडा) र चौकीटोल (हेटौंडा) सबस्टेशनमा जोडिने क्रममा सोही क्षेत्रहरूमा वितरण हुने प्राधिकरणको भनाइ छ । ऊर्जामन्त्री जनार्दन शर्माले यी स्थानहरुको स्थलगत भ्रमण गर्दै छिटो काम सम्पन्न गर्न निर्देशन दिएका थिए । ढल्केवर-मुजफ्फरपुर प्रसारण लाइनबाट हाल १ सय २० मेगावाट विद्युत् आयात भइरहेको छ । हालको १ सय २० र थप ४० मेगावाट विद्युत् प्रसारका लागि साविकको प्रसारण क्षमताले नधान्ने भएपछि भारतको मुजफ्फरपुर सबस्टेशनमा थप ट्रान्सफर्मर जडान गरिएको छ । यो प्रसारण लाइनलाई ४ सय केभी पूर्ण क्षमतामा स्तरोन्नति गर्न लागिएको छ । ढल्केवरसम्म आइपुग्ने भारतीय बिजुली ढल्केवर-खिम्ती २२० केभीको प्रसारण लाइन भएर आउनेछ । यसका लागि बिजुलीले मुजफ्फरपुर-ढल्केवर-खिम्ती-लामोसाँघु-भक्तपुर-काठमाडौंको बाटो तय गर्नेछ । यो बाटो भएर यस वर्षमा अधिकतम ९० मेगावाट विद्युत् काठमाडौं ल्याउने प्राधिकरणको योजना रहेको छ । शर्मा मन्त्री भएपछि काठमाडौं उपत्यकका लोडसेडिङ प्राय अन्त्यनै भएको अवस्था छ । अब भारतबाट आयातित विद्युत पनि प्रसारण लाइनमा जोडिएपछि लोडसेडिङ नहुने प्राधिकरणको भनाइ छ । यसै द्रुर्त गतिमा निर्माणाधिन आयोजनाहरुको काम अघि बढ्दै गएमा १० वर्षमा उत्पादन गर्ने भनिएको १० हजार मेगावाट विद्युत् सहजै उत्पादन गर्न सकिने बताइएको छ ।
कसमस डेभलपमेन्ट बैंकको २३ प्रतिशत बोनस र ६ लाख रुपैयाँ नगद लाभांश पारित
काठमाडौं, २८ पुस । कसमस डेभलपमेन्ट बैंकले गत आर्थिक वर्षको नाफाबाट सेयरधनीलाई २३ दशमलब ६० प्रतिशत बोनस सेयर दिने निर्णयलाई पारित गरेको छ । साथै, बैंकले सेयरधनीलाई ६ लाख २४ हजार ९३४ रुपैयाँ नगद लाभांश वितरण गर्ने प्रस्ताव पनि पारित गरेको छ । उक्त प्रस्तावलाई बुधबार बसेको बैंकको छैठौं बार्षिक साधारण सभाले पारित गरेको हो । आर्थिक वर्ष २०७२/०७३ मा बैकले १ करोड ५१ लाख रुपैयाँ कमाउन सफल भएको छ । संस्थापक शेयरधनीहरुको समुहमा ५१ प्रतिशत शेयर कायम राखि सो समुहको वाँकी ९ प्रतिशत शेयर सर्वसाधारण समुहमा परिणत गर्ने बैंकले जनाएको छ । बैंकले सांग्रिला डेभलपमेन्ट बैंक लिमिटेडसँग मर्जर सम्वन्धी सम्झौता पत्रमा हस्ताक्षर गरिसकेको बैंकका अध्यक्ष प्रा. डा. टेकनाथ ढकालले जनाएका छन् । हाल बैंकले गोरखा जिल्लाको सदरमुकाम गोर खा बजार हरमटारीमा प्रधान कार्यालय, आरुघाट, घ्याम्पेसाल र पालुङटारमा गरी ३ वटा शाखा कार्यालय र एउटा एक्सटेन्सन काउन्टर स्थापना गरिसकेको जानकारी दिएको छ ।
सेयर बजारमा सामान्य सुधार, खानीखोलाको सेयर मूल्य १० प्रतिशतले वृद्धि
काठमाडौं, २८ पुस । साताको अन्तिम दिन कारोबार हुने सेयर बजारमा सामान्य अंकको सुधार आएको छ । बजारमा ३ दशमलब ३५ अंकले परिसूचक बढेर १४७९ दशमलब ८६ अंकमा पुगेको छ । सो दिन ३२ करोड रुपैयाँ बराबरको सेयर कारोबार भएको छ । बुधबारको तुलनामा कारोबार रकममा भने ४ करोड रुपैयाँ कमी हो । बिहीबार १२० कम्पनीको २६ लाख ७७ हजार कित्ता सेयर किनबेच भएको छ । बजारमा सबैभन्दा बढी खानीखोला हाइड्रोपावर कम्पनीको सेयर मूल्य करिब १० प्रतिशतले बढेको छ । सो दिन कम्पनीको सेयर मूल्य करिब ३५३ रुपैयाँ रहेको छ । सबैभन्दा बढी कर्नाली डेभलपमेन्ट बैंकका लगानीकर्ताले झन्डै १० प्रतिशत गुमाएका छन् । बजारमा कारोबार भएका होटल समूह र अन्य समूहको परिसूचक बाहेक बाँकी समूहको परिसूचक सामान्य अंकले उकालो लागेका छन् । सबैभन्दा बढी जलविद्युत समूहको परिसूचक करिब १० अंकले उकालो लागेको छ । होटल र अन्य समूहको परिसूचक क्रमशः ३० र २ अंकले ओरालो लागेका छन् ।
३९ हजार पर्यटकले मुस्ताङ भ्रमण गरे, गत वर्षभन्दा १५ हजार सात सय बढी
मुस्ताङ, २८ पुस । पर्यटकीय जिल्ला मुस्ताङमा एक वर्षमा ३९ हजारभन्दा बढी बाह्य पर्यटकले भ्रमण गरेका छन् । अन्नपूर्ण संरक्षण क्षेत्र आयोजना (एक्याप)ले दिएको जानकारीअनुसार, सन् २०१६ मा ३९ हजार १७ पर्यटकले मुस्ताङ भ्रमण गरेका हुन् । राउन्ड अन्नपूर्ण पदमार्गअन्तर्गत पर्ने मुस्ताङमा प्राकृतिक सुन्दरता र पदयात्रामा रमाउने, लोमान्थाङ, पूर्वमुस्ताङी राजदरबार, तिब्बती कलासंस्कृतिको अध्ययन र मुक्तिनाथ दर्शनका लागि विभिन्न मुलुकबाट पर्यटक आउने गरेका छन् । सन् २०१५ भन्दा १६ मा १५ हजार सातसय ४५ बढी पर्यटक भित्रिएको एक्याप जोमसोमका प्रमुख तुलसी दाहालले जानकारी दिए । “सन् २०१५ मा जम्मा २३ हजार दुईसय ७२ जना मात्र पर्यटक आएको तथ्याङ्क छ । भूकम्प त्रास र प्रतिकूल मौसमका कारण गत वर्ष कम पर्यटक भित्रिएका हुन्”, प्रमुख दाहालले भने, “सन् २०१६ को सङ्ख्या उत्साहजनक छ ।” पर्यटकको आवागमन बढेसँगै मुस्ताङका होटल तथा पर्यटन व्यवसायी उत्साहित बनेका छन् । एक्यापका अनुसार मुस्ताङ भ्रमणमा आउने पर्यटकमध्ये १५ हजार चारसय ७८ भारतीय र २३ हजार पाँचसय ३५ अन्य देशका छन् । गत वर्ष मे महिनामा सबैभन्दा धेरै ६ हजार आठसय १६ र जनवरी महिनामा सबैभन्दा थोरै तीनसय ६५ जना पर्यटक मुस्ताङ आएको प्रमुख दाहालले जानकारी दिए। एक्यापले मुस्ताङ भित्रिने बाह्य पर्यटकको जोमसोम र कागबेनीबाट तथ्याङ्क सङ्कलन गर्दै आएको छ । रासस
